Yadgir Viral News: 1 ವರ್ಷ ಭಿಕ್ಷೆ ಬೇಡಿದ ಹಣದಲ್ಲಿ ನಾಮಪತ್ರ ಸಲ್ಲಿಸಿದ ಅಭ್ಯರ್ಥಿ!

ಕರ್ನಾಟಕ ವಿಧಾನಸಭಾ ಚುನಾವನೆಗೆ ಇನ್ನೇನು ದಿನಗಣನೆ ಆರಂಭವಾಗಿದೆ. ವಿವಿಧ ಪಕ್ಷಗಳ ಅಭ್ಯರ್ಥಿಗಳು ನಾಮಪತ್ರ ಸಲ್ಲಿಸುತ್ತಿದ್ದಾರೆ. ಇದೇ ವೇಳೆ ಅಭ್ಯರ್ಥಿಯೋರ್ವರು ವಿಶಿಷ್ಟ ರೀತಿಯಲ್ಲಿ ನಾಪತ್ರ ಸಲ್ಲಿಸಿ ಗಮನ ಸೆಳೆದಿದ್ದಾರೆ. (ಸಾಂದರ್ಭಿಕ ಚಿತ್ರ)

ಒಂದು ರೂಪಾಯಿಯ 10 ಸಾವಿರ ನಾಣ್ಯವನ್ನು ಠೇವಣಿ ಹಣವನ್ನಾಗಿ ನೀಡಿ ಪಕ್ಷೇತರ ಅಭ್ಯರ್ಥಿಯೋರ್ವರು ನಾಮಪತ್ರ ಸಲ್ಲಿಸಿದ್ದಾರೆ. ಈ ಮೂಲಕ ನಾಮಪತ್ರ ಸಲ್ಲಿಸುವಾಗಲೇ ಸುದ್ದಿಯಾಗಿದ್ದಾರೆ.

ಯಾದಗಿರಿಯ ರಾಮಸಮುದ್ರ ಗ್ರಾಮದ ಯೆಂಕಪ್ಪ ಪಕ್ಷೇತರ ಅಭ್ಯರ್ಥಿಯಾಗಿ ಕಣಕ್ಕಿಳಿದಿದ್ದಾರೆ. ಯೆಂಕಪ್ಪ ಅವರು ಯಾದಗಿರಿ ತಹಶಿಲ್ದಾರ ಕಚೇರಿಯಲ್ಲಿ ಚುನಾವಣೆ ಅಧಿಕಾರಿಗೆ ನಾಮಪತ್ರ ಸಲ್ಲಿಸಿದ್ದಾರೆ.

ಯೆಂಕಪ್ಪ ಅವರು ಭಿಕ್ಷೆ ಬೇಡಿದ ಹಣ ಸಂಗ್ರಹಿಸಿ ಚುನಾವಣೆಗೆ ಸ್ಪರ್ಧೆ ಮಾಡುತ್ತಿದ್ದಾರೆ. ಸಾರ್ವಜನಿಕರ ಬಳಿ ಭಿಕ್ಷೆ ಬೇಡಿ ಒಂದು ರೂ. ಗಳ 10 ಸಾವಿರ ರೂಪಾಯಿ ನಾಣ್ಯಗಳನ್ನು ಭಿಕ್ಷೆ ಬೇಡುವ ಮೂಲಕ ಯೆಂಕಪ್ಪ ಸಂಗ್ರಹಿಸಿದ್ದಾರೆ.

ನಾಮಪತ್ರ ಸಲ್ಲಿಸುವಿಕೆಗಾಗಿ ಠೇವಣಿ ಹಣ ಪಾವತಿ ಮಾಡಲು 10 ಸಾವಿರ ನಾಣ್ಯದೊಂದಿಗೆ ಯೆಂಕಪ್ಪ ಆಗಮಿಸಿದ್ದಾರೆ. ಯೆಂಕಪ್ಪ ಅವರು ಸಮಾನತೆಯ ರಥಯಾತ್ರೆ ಮೂಲಕ ಯಾದಗಿರಿ ವಿಧಾನಸಭೆ ಕ್ಷೇತ್ರದಾದ್ಯಂತ ಸಂಚರಿಸಿದ್ದಾರೆ. ರಥಯಾತ್ರೆ ಮೂಲಕ ಚುನಾವಣೆಯಲ್ಲಿ ಸ್ಪರ್ಧೆ ಮಾಡಲು ಹಣ ಸಂಗ್ರಹಿಸಿದ್ದಾರೆ.

ಕಳೆದ ಒಂದು ವರ್ಷದಿಂದ ರಥಯಾತ್ರೆ ನಡೆಸಿದ ಯೆಂಕಪ್ಪ ಅವರು ಈ ವೇಳೆ 118 ಹಳ್ಳಿಗಳಿಗೆ ಸಂಚರಿಸಿ ಹಣ ಸಂಗ್ರಹಿಸಿದ್ದಾರೆ. ಮತ ನೀಡಿ ನಾನು ನಿಮಗೆ ಬಡತನದಿಂದ ಸ್ವಾತಂತ್ರ್ಯ ಕೊಡಿಸುವೆ ಎಂಬ ಘೋಷಣೆ ವಾಕ್ಯದೊಂದಿಗೆ ಯೆಂಕಪ್ಪ ಅವರು ಭಿಕ್ಷೆ ಬೇಡಿ ಹಣ ಸಂಗ್ರಹಿಸಿದ್ದಾರೆ.

ಆದರೆ ಯೆಂಕಪ್ಪ ಅವರು 10 ಸಾವಿರ ನಾಣ್ಯಗಳ ಮೂಲಕ ನಾಮಪತ್ರ ಸಲ್ಲಿಸಿರುವುದು ಚುನಾವಣೆ ಸಿಬ್ಬಂದಿಗಳಿಗೆ ತಲೆನೋವು ತಂದಿದೆ. ಚುನಾವಣಾ ಸಿಬ್ಬಂದಿ ನಾಣ್ಯ ಎಣಿಕೆಗೆ ಹರಸಾಹಸ ಪಟ್ಟಿದ್ದು, ನಾಣ್ಯ ಎಣಿಕೆ ಮಾಡಲು ಬರೋಬ್ಬರಿ ಎರಡು ಗಂಟೆ ಬೇಕಾಗಿದೆ.