Vijayapura: ರೈತರೇ, ಎಣ್ಣೆ ಬೆಲೆ ಏರಿಕೆ ತಡೆಯಿರಿ! ಕೃಷಿ ಇಲಾಖೆ ಕರೆ

ರಷ್ಯಾ-ಉಕ್ರೇನ್ ನಡುವಿನ ಯುದ್ಧದಿಂದಾಗಿ ಭಾರತ ನಡೆಸುತ್ತಿದ್ದ ಎಣ್ಣೆ ಆಮದಿನ ಮೇಲೆ ಬಹುದೊಡ್ಡ ಪರಿಣಾಮ ಬಿದ್ದಿದೆ. ಹೀಗಾಗಿ ಕಳೆದ ಆರು ತಿಂಗಳಿನಿಂದ ಭಾರತಕ್ಕೆ ಉಕ್ರೇನ್​ನಿಂದ ಆಮದಾಗುತ್ತಿದ್ದ ಎಣ್ಣೆ ಪದಾರ್ಥಗಳು ಆಮದಾಗಿಲ್ಲ.

ಇದರ ಪರಿಣಾಮ ದೇಶದಲ್ಲಿ ಎಣ್ಣೆ ಬೆಲೆ ಗಗನಕ್ಕೇರಿದೆ. ಆದ್ದರಿಂದ ಈ ಮಾನ್ಸೂನ್ ಋತುವಿನಲ್ಲಿ ಎಣ್ಣೆ ಕಾಳು ಬೆಳೆಸುವಂತೆ ರೈತರಿಗೆ ಕೃಷಿ ಇಲಾಖೆಯು ಕರೆ ನೀಡಿದೆ.

ಇತ್ತೀಚಿನ ಸರ್ಕಾರದ ನಿಯಮಗಳು, ಅಂತರಾಷ್ಟ್ರೀಯ ಮಾರುಕಟ್ಟೆಗಳ ಪ್ರಭಾವ ಮತ್ತು ದೇಶೀಯವಾಗಿ ಸೂರ್ಯಕಾಂತಿ ಬೆಳೆ ಇಳುವರಿಯಲ್ಲಿ ಹೆಚ್ಚಳವಾಗಿದೆ. ಸೂರ್ಯಕಾಂತಿ ಎಣ್ಣೆ ಹೆಚ್ಚು ಉತ್ಪಾದನೆ ಆಗುತ್ತಿದ್ದು, ಸಹಜವಾಗಿ ಬೆಲೆ ಇಳಿಕೆಯತ್ತ ಸಾಗುತ್ತಿದೆ. (ಸಾಂದರ್ಭಿಕ ಚಿತ್ರ)

ಎಣ್ಣೆ ದರ ತಗ್ಗಿಸಲು ಇದೊಂದೇ ದಾರಿ. ರೈತರು ಸೂರ್ಯಕಾಂತಿ ಸಹಿತ ಎಣ್ಣೆ ಕಾಳು ಬಿತ್ತನೆ ಮಾಡುವಂತೆ ಕೃಷಿ ಇಲಾಖೆ ಕರೆ ನೀಡಿದೆ. ಇದರಿಂದ ರೈತರಿಗೂ ಹಿತ, ದೇಶಕ್ಕೂ ಹಿತ ಎಂದು ಕೃಷಿ ಇಲಾಖೆಯು ತಿಳಿಸಿದೆ.

ವಿಜಯಪುರದಲ್ಲಿ ಉತ್ತಮವಾಗಿ ಮುಂಗಾರು ಮಳೆ ಆರಂಭವಾಗಿದೆ. ಈಹಿನ್ನಲೆಯಲ್ಲಿಎಲ್ಲ ರೈತರು ಎಣ್ಣೆಕಾಳು ಬಿತ್ತನೆ ಮಾಡಲು ಮುಂದಾಗಬೇಕೆಂದು ಜಿಲ್ಲೆಯ ಮುದ್ದೇಬಿಹಾಳ ತಾಲೂಕು ಸಹಾಯಕ ಕೃಷಿ ನಿರ್ದೇಶಕ ರೇವಣೆಪ್ಪ ಮನಗೂಳಿ ಅವರು ರೈತರಿಗೆ ಕರೆ ನೀಡಿದ್ದಾರೆ. ಸೂರ್ಯಕಾಂತಿ ಈ ಭಾಗದ ಪ್ರಮುಖ ಎಣ್ಣೆ ಬೆಳೆಯಾಗಿದ್ದು, ಈವರ್ಷ ಮಾರುಕಟ್ಟೆಯಲ್ಲಿ ಬೇಡಿಕೆ ಹೆಚ್ಚಾಗಿದೆ.

ಈಭಾಗದ ರೈತರು ಸೂರ್ಯಕಾಂತಿ ಬೆಳೆಯಲು ಮುಂದಾಗಬೇಕು. ಇದನ್ನ ಕಟಾವು ಮಾಡಿದ ಬಳಿಕ ಹಿಂಗಾರು ಬಿಳಿಜೋಳ ಮತ್ತು ಕಡಲೆಯನ್ನ ಬೆಳೆಯಬಹುದಾಗಿದೆ ಎಂದು ಅವರು ರೈತರಿಗೆ ತಿಳಿಸಿದ್ದಾರೆ.

ಸೂರ್ಯಕಾಂತಿ ಬೆಳೆಯ ತಳಿಗಳಾದ ಗಂಗಾ ಕಾವೇರಿ, ಕಾವೇರಿ ಚಾಂಪ್, ಸಂಕ್ರಾತಿ, ಐಟಿಸಿ, ಸ್ಯಾಂಡೋಜ್, ಪ್ರಮುಖ ಬೆಳೆಗಳಾಗಿವೆ.ಇಂತಹ ತಳಿಗಳನ್ನು ಹೆಚ್ಚು ಬೆಳೆಸುವಂತೆ ಕೃಷಿ ಇಲಾಖೆಯು ರೈತರಿಗೆ ತಿಳಿಸಿದೆ.

ಕೀಟ ಬಾಧೆ ತಪ್ಪಿಸಲು ಪ್ರತಿ ಕೆಜಿ ಬೀಜಕ್ಕೆ 2ಎಂಎಲ್  ಕ್ಲೋರೋಪ್ಯಾರಿಪಾಸ್ದಿಂದ ಬೀಜೋಪಚಾರ ಮಾಡುವುದು ಅತಿ ಅವಶ್ಯಕವಾಗಿದೆ.ಬಿತ್ತನೆಗೂ2-3 ವಾರ ಮೊದಲು ಪ್ರತಿ ಎಕರೆಗೆ ಎರಡು ಟನ್ ಸಾವಯವ ಕೊಟ್ಟಿಗೆ ಗೊಬ್ಬರ ಸೇರಿಸಬೇಕು. ಪ್ರತಿ ಎಕರೆಗೆ 14 ಕೆಜಿ ಸಾರಜನಕ, 20 ಕೆಜಿ ರಂಜಕ ಮತ್ತು 14 ಕೆಜಿ ಪೊಟ್ಯಾಷ್  ಒದಗಿಸುವ ರಸಗೊಬ್ಬರ ನೀಡಬೇಕು ಎಂದು ಕೃಷಿ ಇಲಾಖೆಯು ಉತ್ತಮ ಸಲಹೆಯನ್ನು ನೀಡಿದೆ

ಸೂರ್ಯಕಾಂತಿ ಹೂವು ಬಿಡುವ ಹಂತದಲ್ಲಿ ಪರಾಗಸ್ಪರ್ಶವಾಗುತ್ತದೆ.  ಎಲ್ಲಹೂವುಗಳ ಮೇಲೆ ಪರಾಗಸ್ಪರ್ಶ ಮಾಡಿದರೆ ಕಾಳುಕಟ್ಟುವಿಕೆ ಹೆಚ್ಚಾಗಿ ಜೊಳ್ಳುಹಿಡಿಯುವುದಿಲ್ಲ, ಮೇಲಾಗಿ ಕಾಳುಗಳು ಗಟ್ಟಿಯಾಗಿ ಮತ್ತು ದಪ್ಪವಾಗಿ ಇರುವುದರೊಂದಿಗೆ ಇಳುವರಿ ಹೆಚ್ಚುತ್ತದೆ.

ಕೃಷಿ ಇಲಾಖೆಯು ನೀಡಿದ ಸೂಚನೆ ಪ್ರಕಾರ ಸಮಯಕ್ಕೆ ತಕ್ಕಂತೆ ಸೂರ್ಯಕಾಂತಿ ಎಣ್ಣೆ ಕಾಳು ಬೆಳೆದಲ್ಲಿ ಎಕರೆಗೆ 8ರಿಂದ 10ಕ್ವಿಂಟಾಲ್ ಇಳುವರಿ ಪಡೆಯಲು ಸಾಧ್ಯವಾಗುತ್ತದೆ. ಹಾಗಿದ್ರೆ, ಇನ್ನೇಕೆ ತಡ ವಿಜಯಪುರ ಜಿಲ್ಲೆಯ ರೈತರು ತಮ್ಮ ಜಮೀನಿನಲ್ಲಿ ಸೂರ್ಯಕಾಂತಿ ಬೆಳೆಯುವುದರ ಜೊತೆಗೆ ದೇಶದ ಆರ್ಥಿಕ ಸುಧಾರಣೆಗೂ ಮಹತ್ವದ ಕೊಡುಗೆ ನೀಡುವಂತಾಗಲಿ.

ಸರಿಯಾದ ಬೇಸಾಯ ಕ್ರಮಗಳನ್ನ ಸಕಾಲದಲ್ಲಿಅಳವಡಿಸಿಕೊಂಡರೆ ಉತ್ತಮ ಇಳುವರಿ ಸಾಧ್ಯ ಎಂದು ವಿಜಯಪುರದ ಮುದ್ಧೇಬಿಹಾಳ ತಾಲೂಕಿನ ಸಹಾಯಕ ಕೃಷಿ ನಿರ್ದೇಶಕ ರೇವಣೆಪ್ಪ ಮನಗೂಳಿ ಹೇಳುತ್ತಾರೆ. (ವರದಿ: ಪ್ರಶಾಂತ ಹೂಗಾರ್, ವಿಜಯಪುರ)