Uttara Kannada: ನಾಡಿಗೆ ಬಂದ ಕಾಡುಪಾಪ ಮರಳಿ ಕಾಡಿಗೆ, ಏನಿದರ ವಿಶೇಷತೆ?

ʼಕಾಡುಪಾಪʼ ಅನ್ನೋ ಹೆಸರಷ್ಟೇ ಬಹುತೇಕ ಜನ ಕೇಳಿರುತ್ತಾರೆ. ಬದಲಿಗೆ ಆ ಪ್ರಾಣಿಯನ್ನು ನೋಡಿರುವವರ ಸಂಖ್ಯೆ ತೀರಾ ವಿರಳ ಎನ್ನಬಹುದು.

ಅದಕ್ಕೊಂದು ಕಾರಣನೂ ಇದೆ, ಈ ಪ್ರಾಣಿ ಇದೀಗ ಅಳಿವಿನಂಚಿನಲ್ಲಿರುವ ಪ್ರಾಣಿಯಾಗಿದೆ. ಪುಟ್ಟದಾಗಿರೋ ಈ ಕಾಡುಪಾಪ ನಿಜಕ್ಕೂ ಸಾಧು ಸ್ವಭಾವದ ಪ್ರಾಣಿಯೇ ಸರಿ.

ಕಾಡಿನಲ್ಲಿರುವ ದೊಡ್ಡ ದೊಡ್ಡ ಪ್ರಾಣಿಗಳ ನಡುವೆ ಇವುಗಳದ್ದು ಅಳಿಲಿನಂತಹ ಓಡಾಟ. ಅಂತಹ ಕಾಡುಪಾಪವೊಂದು ಉತ್ತರ ಕನ್ನಡದಲ್ಲಿ ಜನರ ಕಣ್ಣಿಗೆ ಕಾಣಸಿಕ್ಕಿದೆ.

ಉತ್ತರ ಕನ್ನಡ ಜಿಲ್ಲೆಯ ಕುಮಟಾ ತಾಲೂಕಿನ ಕರ್ಕಿಮಕ್ಕಿಯ ಬಸ್ ನಿಲ್ದಾಣದ ಬಳಿ ಕಾಡುಪಾಪವೊಂದು ಮಧ್ಯರಾತ್ರಿ ಕಾಣಿಸಿಕೊಂಡಿದೆ. ಏಕಾಏಕಿ ಜನರ ಕಣ್ಣಿಗೆ ಕಾಣಸಿಕ್ಕ ಈ ಕಾಡುಪಾಪವನ್ನು ಪ್ರಾಣಿಪ್ರೇಮಿಗಳು ರಕ್ಷಿಸಿ ಕಾಡಿಗೆ ಸುರಕ್ಷಿತವಾಗಿ ಬಿಟ್ಟಿದ್ದಾರೆ.

ನಂತರ ಅಲ್ಲೇ ಸಮೀಪದಲ್ಲಿದ್ದ ಮಣಿಕಂಠ ನಾಯ್ಕ, ದರ್ಶನ ನಾಯ್ಕ, ವಿನೋದ್ ಗೌಡ ಅವರು ಚಿಕ್ಕ ಮರಿ ಎಂದು ಭಾವಿಸಿ ರಕ್ಷಿಸಿದ್ದು, ನಂತರ ಉರಗ ತಜ್ಞರಾದ ಸ್ನೇಕ್ ಪವನ್ ಅವರಿಗೆ ವಿಷಯ ತಿಳಿಸಿದ್ದಾರೆ.

ಸ್ಥಳಕ್ಕೆ ಆಗಮಿಸಿದ ಪವನ್, “ಇದು ಮರಿ ಅಲ್ಲ, ವಯಸ್ಕ ಕಾಡುಪಾಪ” ಎಂದು ತಿಳಿಸಿದ್ದಾರೆ. ಸ್ವಲ್ಪ ಸಮಯದಲ್ಲಿಯೇ ಸಮೀಪದ ಸೂಕ್ತ ಸ್ಥಳಕ್ಕೆ ಬಿಡುಗಡೆಗೊಳಿಸಿದ್ದಾರೆ.

ಕಾಡುಪಾಪಗಳಿಗೆ ಸ್ಥಳೀಯವಾಗಿ ʼಕಾಡುಮನುಷ್ಯʼ ಎಂದೂ ಕರೆಯುತ್ತಾರೆ. ಇದರ ಮಾಂಸವನ್ನು ಔಷಧಿಗೆ ಬರುತ್ತದೆ ಎಂದು ಕೆಲವರು ನಂಬಿದ್ದಾರೆ. ಆದರೆ ಇದರ ಮಾಂಸವು ಯಾವುದಕ್ಕೂ ಉಪಯೋಗಕ್ಕೆ ಬರುವುದಿಲ್ಲ ಎಂದು ವೈಜ್ಞಾನಿಕವಾಗಿ ಸಾಬೀತಾಗಿದೆ ಎಂದು ಸ್ನೇಕ್ ಪವನ್ ತಿಳಿಸುತ್ತಾರೆ. ಒಟ್ಟಿನಲ್ಲಿ ಕಾಡುಪಾಪ ಅಳಿವಿನಂಚಿನಲ್ಲಿರುವ ಪ್ರಾಣಿಯಾಗಿದ್ದು, ಇದನ್ನು ರಕ್ಷಿಸುವ ಹೊಣೆ ನಮ್ಮೆಲ್ಲರದ್ದೂ ಆಗಿದೆ.