Lizard Dosha: ಹಲ್ಲಿ ದೋಷಕ್ಕೆ ಇಲ್ಲಿ ಸಿಗುತ್ತಂತೆ ಪರಿಹಾರ!

ನೀವು ಅಪ್ಪಿತಪ್ಪಿ ಮನೆಯ ಗೋಡೆಯ ಮೇಲೆ ಹರಿದಾಡುವ ಹಲ್ಲಿಯನ್ನು ಸಾಯಿಸಿಬಿಟ್ಟಿದ್ದೀರಾ? ಈಗ ಏನ್ಮಾಡೋದು? ಜ್ಯೋತಿಷ್ಯದಲ್ಲಿ ಹಲ್ಲಿ ಕೊಂದದ್ದಕ್ಕೆ ಏನು ಪರಿಹಾರವಿದೆ ಎಂದು ತಲೆಬಿಸಿ ಮಾಡಿಕೊಂಡಿದ್ದೀರಾ? ಹಾಗಾದರೆ ಈ ಸುದ್ದಿಯನ್ನು ನೀವು ಓದಲೇಬೇಕು.

ಉತ್ತರ ಕನ್ನಡ ಜಿಲ್ಲೆಯ ಶಿರಸಿ ತಾಲೂಕಿನ ಸೋಂದಾ ಯಾರಿಗೆ ಗೊತ್ತಿಲ್ಲ ಹೇಳಿ? ಹಲವು ಮಠಗಳು ಇರುವ ಪ್ರಸಿದ್ಧ ಊರಿದು. ಇಲ್ಲೇ ಹಲ್ಲಿ ಕೊಂದ ದೋಷಕ್ಕೆ ಪರಿಹಾರವೊಂದಿದೆ ಎಂಬ ನಂಬಿಕೆಯಿದೆ.

ಸೋಂದೆಯ ವಾದಿರಾಜ ಮಠದ ಬಳಿಯೇ ಇರುವ  3 ಚಕ್ರದ ಕಲ್ಲಿನ ರಥ ಭಕ್ತರ ಪಾಲಿನ ಪವಿತ್ರ ತಾಣ. ಈ ಕಲ್ಲಿನ ರಥದ ಮೂಲಕ ಹಲ್ಲಿ ಕೊಂದ ದೋಷವನ್ನು ನಿವಾರಿಸಿಕೊಳ್ಳಬಹುದು ಎಂದು ಭಕ್ತರು ನಂಬುತ್ತಾರೆ.

ಈ ಕಲ್ಲಿನ ರಥದಲ್ಲಿರುವ ದೇವಾಲಯದ ಸುತ್ತಲೂ ವಿಜಯನಗರ ಕಾಲದ ಶಿಲ್ಪಕಲಾ ರಚನೆಯಿದೆ. ಕಲ್ಲಿನ ರಥದಲ್ಲಿ ಹಲ್ಲಿಯನ್ನು ಕೆತ್ತಲಾಗಿದೆ.

ಸೋಂದೆಯಲ್ಲಿ ಇರುವ ಕಲ್ಲಿನ ರಥ ಎಷ್ಟು ಪವಿತ್ರವೋ ಈ ಹಲ್ಲಿಯ ರಚನೆಯೂ ಅಷ್ಟೇ ಪವಿತ್ರ ಎನ್ನಲಾಗಿದೆ. ಹಲ್ಲಿಯ ರಚನೆಯನ್ನು ಮುಟ್ಟಿದರೆ ಹಲ್ಲಿ ಕೊಂದ ಪಾಪಕ್ಕೆ ಪರಿಹಾರವಾಗುತ್ತದೆ ಅನ್ನೋ ನಂಬಿಕೆಯಿದೆ.

ಈ ರಥಕ್ಕೆ ಮೂರೇ ಚಕ್ರಗಳಿವೆ. ರಥಕ್ಕೆ ಯಾವುದೇ ರೀತಿಯ ಮುಕುಟವಿಲ್ಲ, ಧ್ವಜವಿಲ್ಲ ಚಪ್ಪಟೆಯಾಕಾರಾದ ಚತುರಾಶ್ರ ಗರ್ಭಗೃಹದ ಮಾದರಿಯಲ್ಲಿದೆ. ಈಗ ರಮಾದೇವಿಯನ್ನು ಅಲ್ಲಿಟ್ಟು ಪೂಜಿಸುತ್ತಿದ್ದಾರೆ.  ಇದೇ ರಥದಲ್ಲಿರುವ ಹಲ್ಲಿಯ ರಚನೆಯಿಂದ ಹಲ್ಲಿ ಕೊಂದ ದೋಷ ನಿವಾರಣೆಯಾಗುತ್ತೆ ಅಂತಾರೆ ಭಕ್ತರು

ಸೋಂದಾಕ್ಕೆ ಬರಬೇಕೆಂದರೆ  ನಿಮ್ಮ ಊರಿನಿಂದ ಶಿರಸಿಗೆ ಬಂದು ಸೋಂದಾ ಬಸ್ ಹತ್ತಿ ಕೇವಲ 20 ಕಿಲೋಮೀಟರ್ ಪ್ರಯಾಣವಷ್ಟೇ. ಬೆಳಿಗ್ಗೆಯಿಂದ ಸಾಯಂಕಾಲರದವರೆಗೆ  ಶಿರಸಿಯಿಂದ ಸೋಂದಾಗೆ ಬಸ್ಸಿನ ವ್ಯವಸ್ಥೆಯಿದೆ. ಹೀಗೆ ಬಂದರೆ ಸೋಂದಾದ ಈ ಮೂರು ಚಕ್ರದ ಕಲ್ಲಿನ ರಥದ ಹಲ್ಲಿಯ ದರ್ಶನ ನಿಮಗಾಗುತ್ತದೆ.