Idagunji Ganapati: ಮಹತೋಭಾರ ವಿನಾಯಕನ ಕ್ಷೇತ್ರ ದರ್ಶನ, ಇದು ಇಡಗುಂಜಿ ಗಣಪತಿಯ ಮಹಿಮೆ

ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ಇಡಗುಂಜಿ ಗಣಪತಿಯ ಪ್ರತಿಮೆಯನ್ನು ಉಡುಗೊರೆಯನ್ನಾಗಿ ನೀಡಲಾಗಿದೆ. ಈ ಮೂಲಕ ಉತ್ತರ ಕನ್ನಡದ ಕರಾವಳಿಯಲ್ಲಿ ನೆಲೆಗೊಂಡಿರುವ ದೇವಸ್ಥಾನ ಮುನ್ನೆಲೆಗೆ ಬಂದಿದೆ. ಹಾಗಾದರೆ ಇಡಗುಂಜಿ ಕ್ಷೇತ್ರದ ಇತಿಹಾಸವೇನು? ಇಲ್ಲಿರುವ ಗಣಪನ ಐತಿಹ್ಯವೇನು? ಇಲ್ಲಿದೆ ನೋಡಿ ವಿವರ

ಇಡಗುಂಜಿ ಗಣಪತಿಯು ಭಕ್ತರಲ್ಲಿ ಮಹತೋಭಾರ ವಿನಾಯಕ ದೇವರು ಎಂದು ಪ್ರಸಿದ್ಧಿ. ಸುಮಾರು 1500 ಕ್ಕೂ ಹೆಚ್ಚು ವರ್ಷಗಳ ಹಿಂದಿನ ದೇಗುಲವಿದು ಎಂದು ಹೇಳಲಾಗುತ್ತದೆ. ಅಲ್ಲದೇ, ಸ್ಕಂದ ಪುರಾಣದಲ್ಲಿಯೂ ಇಡಗುಂಜಿ ಕ್ಷೇತ್ರದ ಉಲ್ಲೇಖವಿದೆಯಂತೆ.  ತ್ರೇತಾಯುಗದಲ್ಲಿ ನಾರದರಿಂದ ಪ್ರತಿಷ್ಠಾಪಿಸಲ್ಪಟ್ಟ ದೇವಸ್ಥಾನವಿದು ಎಂಬ ನಂಬಿಕೆಯಿದೆ. ಇಲ್ಲಿಯೇ ನಾರದರು ವಟು ರೂಪಿ ಬಾಲ ಗಣಪನನ್ನು ಪ್ರತಿಷ್ಠಾಪಿಸಿ ಸಂಕಷ್ಟನಾಶಕ ಗಣೇಶ ಸ್ತೋತ್ರ ಬರೆದಿದ ಕುರಿತು ನಾರದ ಫುರಾಣದಲ್ಲಿದೆ ಉಲ್ಲೇಖವಿದೆ ಎಂದು ಭಕ್ತರು ಹೇಳುತ್ತಾರೆ.

ಇಡಗುಂಜಿ ಗಣಪನ ಮೂರ್ತಿಯೇ ಭಕ್ತರ ಗಮನ ಸೆಳೆಯುವಂತಿದೆ. ಇಲ್ಲಿನ ಕಪ್ಪುಶಿಲೆಯ ಗಣಪ ನಿಂತುಕೊಂಡಿದ್ದಾನೆ. ಅಲ್ಲದೇ, ಎರಡು ಕೈಗಳಲ್ಲಿ ಮೋದಕ ಮತ್ತು ಕಮಲವನ್ನು ಹಿಡಿದು ಪ್ರಸನ್ನಚಿತ್ತನಾಗಿದ್ದಾನೆ.

ವಿಶೇಷವಾಗಿ ಇಡಗುಂಜಿ ವಿನಾಯಕನಲ್ಲಿಗೆ ಮದುವೆ ಮುಂತಾದ ವಿಶೇಷ ಸಮಾರಂಭಗಳು ನಿರ್ವಿಘ್ನವಾಗಿ ನಡೆಯಲು ಹರಕೆ ಹೇಳಿಕೊಳ್ಳುವುದು ಚಾಲ್ತಿಯಲ್ಲಿದೆ. ಇಲ್ಲಿಯ ಸಮುದ್ರ ತೀರದಲ್ಲಿ ಸೂರ್ಯಾಸ್ತ ಮತ್ತು ಸೂರ್ಯೋದಯ ನೋಡಲಂತೂ ಎರಡು ಕಣ್ಣು ಸಾಲದು!

ಕರಾವಳಿಯ 6 ಗಣಪತಿ ಕ್ಷೇತ್ರಗಳಲ್ಲಿ ಇಡಗುಂಜಿ ತುಂಬಾ ಮುಖ್ಯವಾದದ್ದು.  ಇಡಗುಂಜಿ ಕ್ಷೇತ್ರಗಳ ದರ್ಶನ ಮಾಡುವುದು ಆಸ್ತಿಕರು ಪುಣ್ಯದ ಪ್ರಯಾಣವೆಂದೇ ಭಾವಿಸುತ್ತಾರೆ.

ಇಡಗುಂಜಿಯ ಸಮೀಪವೇ ಇನ್ನೊಂದು ಪ್ರಸಿದ್ಧ ಕ್ಷೇತ್ರ ಮುರುಡೇಶ್ವರ, ಗೋಕರ್ಣವಿದೆ. ಗೋಕರ್ಣದಿಂದ 65 ಕಿಲೋ ಮೀಟರ್, ಮುರುಡೇಶ್ವರದಿಂದ ಸುಮಾರು 15 ಕಿಲೋ ಮೀಟರ್ ದೂರದಲ್ಲಿರುವ ಇಡಗುಂಜಿ ದೇಗುಲ ತಾಲೂಕಾ ಕೇಂದ್ರ ಹೊನ್ನಾವರದಿಂದ 14 ಕಿಲೋ ಮೀಟರ್ ದೂರದಲ್ಲಿದೆ.

ನೀವು ಸಹ ಉತ್ತರ ಕನ್ನಡಕ್ಕೆ ಬಂದರೆ ಈ ವಿಶೇಷ ಕ್ಷೇತ್ರದ ದರ್ಶನ ಮಾಡಬಹುದು ನೋಡಿ. ಜೊತೆಗೆ ಸಮುದ್ರ ತೀರದಲ್ಲಿ ಒಂದಷ್ಟು ಸಮಯ ಖುಷಿಯಿಂದ ಕಾಲ ಕಳೆಯಬಹುದು ಕೂಡ!