Karnataka Elections 2023: ಇದು ಮತಗಟ್ಟೆಯೋ, ಮದುವೆ ಮನೆಯೋ!?

ಮತದಾನ ಹೆಚ್ಚಿಸಲು ಸಾರ್ವಜನಿಕರಲ್ಲಿ ಜಾಗೃತಿ ಮೂಡಿಸಲು ವಿವಿಧ ಪ್ರಯೋಗ ಕೈಗೊಳ್ಳಲಾಗುತ್ತಿದೆ. ಇದೇ ವೇಳೆ ಉಡುಪಿಯಲ್ಲಿ ಮರಳು ಶಿಲ್ಪ ಕಲಾಕೃತಿಯೊಂದು ಮತದಾರರ ಗಮನಸೆಳೆಯುತ್ತಿದೆ.

ಅತೀ ಹೆಚ್ಚು ಮತದಾನಕ್ಕಾಗಿ ಮರಳು ಶಿಲ್ಪ ಕಲಾವಿದ ಹರೀಶ್ ಸಾಗ ಮತ್ತು ತಂಡ ಮರಳು ಶಿಲ್ಪ ರಚಿಸಿದೆ. ಮಲ್ಪೆ ಬೀಚ್ ನಲ್ಲಿ ಕರ್ನಾಟಕ ಚುನಾವಣೆ ಕುರಿರು ಅಪರೂಪದ ಮರಳು ಶಿಲ್ಪ ರಚನೆ ಮಾಡಲಾಗಿದೆ.

ಕಡಲ ತೀರಕ್ಕೆ ಭೇಟಿ ನೀಡುವ ಸಾವಿರಾರು ಪ್ರವಾಸಿಗರನ್ನು ಈ ಶಿಲ್ಪ ಕಲಾಕೃತಿ ಗಮನ ಸೆಳೆಯುತ್ತಿದೆ ನಾಲ್ಕಾರು ಗಂಟೆಗಳ ಪರಿಶ್ರಮದ ಬಳಿಕ ಕರ್ನಾಟಕದ ಚಿತ್ರವುಳ್ಳ ಶಿಲ್ಪವನ್ನು ಕಲಾವಿದರು ಪೂರ್ಣಗೊಳಿಸಿದ್ದಾರೆ.

ಇತ್ತ 2023ರ ವಿಧಾನಸಭಾ ಚುನಾವಣೆಗೆ ಮಂಡ್ಯ ಜಿಲ್ಲಾಡಳಿತ ಸಜ್ಜುಗೊಂಡಿದ್ದು, ಸಂಸ್ಕೃತಿ, ಪಾರಂಪರೆ ಸಾರುವ ಮತಕೇಂದ್ರ ಸ್ಥಾಪನೆ ಮಾಡಲಾಗಿದೆ.

ಮಂಡ್ಯದ ಶುಗರ್ ಟೌನ್ನಲ್ಲಿ ವಿಶೇಷ ಮತಕೇಂದ್ರ ಸ್ಥಾಪನೆ ಮಾಡಲಾಗಿದ್ದು, ತಳಿರು, ತೋರಣಗಳಿಂದ ಶೃಂಗಾರ ಮಾಡಲಾಗಿದೆ. ಬಾಳೆ ಕಂಬ, ಮಾವಿನ ಸೊಪ್ಪು ಕಟ್ಟುವ ಮೂಲಕ ಹಬ್ಬದ ವಾತಾವರಣ ನಿರ್ಮಿಸಲಾಗಿದೆ. ಮತ ಕೇಂದ್ರದ ಗೋಡೆಗಳ ಮೇಲೆ ರಾಜ ಮಹಾರಾಜರ ಕಲಾಕೃತಿ ರಚಿಸಲಾಗಿದೆ. ಮತದಾರರ ಜಾಗೃತಿಗಾಗಿ ರಚಿಸಿದ ವಿಶೇಷ ಮತ ಕೇಂದ್ರಕ್ಕೆ ಸಾರ್ವಜನಿಕರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.

ಇತ್ತ ಬಿಸಿಲಿನ ಬೇಗೆಯ ಹಿನ್ನೆಲೆಯಲ್ಲಿ ಮತದಾನಕ್ಕೆ ಶಾಮಿಯಾನ ಬಳಕೆ ಮಾಡಲಾಗುತ್ತಿದೆ. ರಾಯಚೂರಿನಲ್ಲಿ 1840 ಮತಗಟ್ಟೆಗಳ ಪೈಕಿ 855 ಕಡೆ ಶಾಮಿಯಾನ ಬಳಕೆ ಮಾಡಲಾಗುತ್ತಿದೆ ಎಂದು ನ್ಯೂಸ್ 18 ಗೆ ಡಿಸಿ ಚಂದ್ರಶೇಖರ್ ನಾಯಕ್ ಮಾಹಿತಿ ನೀಡಿದ್ದಾರೆ. ಶಾಮಿಯಾನ ಜೊತೆ ಕುಡಿಯುವ ನೀರಿನ ವ್ಯವಸ್ಥೆ ಮಾಡಲಾಗಿದೆ.

ಇವೆಲ್ಲದರ ಜೊತೆಗೆ ಮದುವಣಗಿತ್ತಿಯಂತೆ ಸಿಂಗಾರಗೊಂಡಿದೆ ಸಖಿ ಸೆಂಟರ್! ಹೌದು, ಉಡುಪಿಯಲ್ಲಿ ಸಖಿ ಮತದಾನ ಕೇಂದ್ರ ಎಲ್ಲರ ಗಮನಸೆಳೆಯುತ್ತಿದೆ. ಉಡುಪಿಯ ಸರ್ಕಾರಿ ವಳಕಾಡು ಶಾಲೆಯಲ್ಲಿರುವ ಸಖಿ ಸೆಂಟರ್ ಒಳಹೊಕ್ಕರೆ ಯಾವುದೋ ಮದುವೆಗೆ ಬಂದಂತೆ ಭಾಸವಾಗುವಂತಿದೆ. ಉಡುಪಿ ಜಿಲ್ಲೆಯ ಐದು ವಿಧಾನಸಭಾ ಕ್ಷೇತ್ರದಲ್ಲಿ 25 ಸಖಿ ಕೇಂದ್ರಗಳ ನಿರ್ಮಾಣ ಮಾಡಲಾಗಿದೆ. ಹೂವು, ಕೊಡೆ, ಬಣ್ಣ ಬಣ್ಣದ ಕರ್ಟನ್ ಹೊಂದಿರುವ ಅಲಂಕೃತ ಸಖಿ ಸೆಂಟರ್ ಎಲ್ಲರ ಆಕರ್ಷಣೆ ಕೇಂದ್ರ ಬಿಂದುವಾಗಿದೆ.