YearEnd 2021: ಕೋವಿಡ್ ಮಾತ್ರವಲ್ಲ, ಈ ವರ್ಷ ಜಗತ್ತನ್ನು ಭಯಾನಕವಾಗಿ ಕಾಡಿದ 5 ರೋಗಗಳಿವು...

ಕೋವಿಡ್ ಇನ್ನೂ ಸಂಪೂರ್ಣವಾಗಿ ಜಗತ್ತಿನಿಂದ ಹೋಗಿಲ್ಲ. ಆದರೆ ಕೋವಿಡ್ ಆರ್ಭಟದಲ್ಲಿ ಬೇರೆ ಖಾಯಿಲೆಗಳ ಬಗ್ಗೆ ಹೆಚ್ಚು ಚರ್ಚೆಯಾಗಿಲ್ಲ ಅಷ್ಟೇ. ಸೊಳ್ಳೆಗಳಿಂದ ಹರಡುವ ಡೆಂಘಿ, ಚಿಕೂನ್ ಗುನ್ಯಾ ಕೂಡಾ ಈ ವರ್ಷ ಪ್ರಪಂಚದ ನಾನಾ ಭಾಗಗಳಲ್ಲಿ ಜನರನ್ನು ಕಾಡಿದೆ.

ಪ್ರತೀ ವರ್ಷ ಡೆಂಘಿ ಮತ್ತು ಚಿಕನ್ ಪಾಕ್ಸ್ ಅನೇಕರನ್ನು ಬಾಧಿಸುತ್ತದೆ. ಆದರೆ ಈ ವರ್ಷ ಈ ಖಾಯಿಲೆಗಳಿಂದ ಬಳಲಿದವರ ಸಂಖ್ಯೆ ಐದು ಪಟ್ಟು ಹೆಚ್ಚಿದೆ. ಕೋವಿಡ್ ಗೆ ಸ್ಪರ್ಧೆ ಎನ್ನುವಂತೆ ಹೆಚ್ಚೆಚ್ಚು ಜನ ಬೇರೆ ಖಾಯಿಲೆಗಳಿಂದಲೂ ಬಳಲಿದ್ದಾರೆ.

Black Fungus ಅಥವಾ ಮ್ಯೂಕರ್​ಮೈಕಾಸಿಸ್ ಸೋಂಕು ಜನರಲ್ಲಿ ಕೋವಿಡ್ ಗಿಂತ ಹೆಚ್ಚು ಭಯ ಹುಟ್ಟಿಸಿತ್ತು. ಕೋವಿಡ್ ಚಿಕಿತ್ಸೆಯ ಸಂದರ್ಭದಲ್ಲಿ ನೀಡಿದ್ದ ಸ್ಟೆರಾಯ್ಡ್ ಇಂಜೆಕ್ಷನ್​ಗಳು ಮತ್ತು ಆಕ್ಸಿಜನ್ ನೀಡುವ ಉಪಕರಣಗಳೇ ಇದಕ್ಕೆ ಮುಖ್ಯ ಕಾರಣ ಎನ್ನಲಾಗಿತ್ತು. ದೊಡ್ಡ ಸಂಖ್ಯೆಯಲ್ಲಿ ಬ್ಲಾಕ್ ಫಂಗಸ್ ಈ ವರ್ಷ ಜನರ ಜೀವ ತೆಗೆದಿದೆ.

Vascular Necrosis: ಕೋವಿಡ್ ಸೋಂಕಿನ ನಂತರ ಜನರನ್ನು ಕಾಡುವ ಆರೋಗ್ಯ ಸಮಸ್ಯೆಗಳಲ್ಲಿ ಪ್ರಮುಖವಾದ ಸಮಸ್ಯೆ ಇದು. ಮೂಳೆಗಳಿಗೆ ರಕ್ತಸಂಚಾರವೇ ನಿಂತು ಹೋಗುವಂಥಾ ಭಯಾನಕ ಪರಿಸ್ಥಿತಿ ಇದು. ದೇಹದೊಳಗೆ ಮೂಳೆಗಳನ್ನು ಸಣ್ಣ ತುಂಡುಗಳಾಗಿ ಮಾಡಿಬಿಡುತ್ತದೆ ಈ ಖಾಯಿಲೆ. ಈ ಖಾಯಿಲೆಯನ್ನು ಆರಂಭದಲ್ಲೇ ತಿಳಿಯುವ ಲಕ್ಷಣಗಳಿಲ್ಲ, ಆದರೆ ಇಡೀ ಇನ ವಿಪರೀತ ಗಂಟುಗಳ ನೋವು ಇರುವುದು ಇದರ ಪ್ರಮುಖ ಲಕ್ಷಣವಾಗಿದೆ.

Multisystem Inflammatory Syndrome: ಕೋವಿಡ್ ಮಕ್ಕಳನ್ನು ಹೆಚ್ಚು ಬಾಧಿಸಿಲ್ಲ. ಅವರಲ್ಲಿ ಸೋಂಕು ಕಂಡರೂ ಅದು ಬಹಳ ಸೌಮ್ಯ ಸ್ವಭಾವದ್ದಾಗಿತ್ತು. ಆದರೆ ಕೋವಿಡ್ ಗುಣವಾದ ನಂತರವೂ ಮಕ್ಕಳಲ್ಲಿ ಎಂಐಎಸ್ ಸಮಸ್ಯೆ ಕಾಣಿಸಿಕೊಂಡಿದೆ. ಅಂಥಾ ಮಕ್ಕಳಲ್ಲಿ ಹೃದಯ, ಮೂತ್ರಪಿಂಡ, ಲಿವರ್, ಕಣ್ಣು ಹೀಗೆ ನಾನಾ ಅಂಗಗಳು ಊದಿಕೊಂಡಿರುವುದು ಕಂಡುಬಂದಿದೆ. ಇದರಿಂದಾಗಿ ಸಾವು ಕೂಡಾ ಸಂಭವಿಸಿದೆ.

Blood Clot and Heart Attacks: ಕೋವಿಡ್ ಸೋಂಕಿನಿಂದ ಬಳಲಿದ ಅನೇಕರಿಗೆ ರಕ್ತನಾಳಗಳಲ್ಲಿ ರಕ್ತ ಹೆಪ್ಪುಗಟ್ಟಿದ್ದು ಮತ್ತು ಹೃದಯ ಸಂಬಂಧಿತ ಸಮಸ್ಯೆಗಳು ಕಂಡುಬಂದಿತ್ತು. ಕೆಲವರಿಗಂತೂ ಕೋವಿಡ್ ಲಸಿಕೆ ಪಡೆದ ನಂತರ ಬ್ಲಡ್ ಕ್ಲಾಟ್ ಅಥವಾ ಹಾರ್ಟ್ ಅಟ್ಯಾಕ್ ಆದ ಸಂದರ್ಭಗಳೂ ವರದಿಯಾಗಿದೆ.

Dengue Fever: ಡೆಂಘಿ ಸಾಕಷ್ಟು ಸಮಯದಿಂದ ಇರುವುದರಿಂದ ಜನ ಇದರ ಬಗ್ಗೆ ಹೆಚ್ಚು ಚರ್ಚೆ ಮಾಡಿಲ್ಲ. ಆದರೆ ಕೋವಿಡ್ ಸೋಂಕಿನಿಂದ ಗುಣಮುಖರಾದ ನಂತರ ಬರುವ ಡೆಂಘಿ ರೋಗಿಯ ಜೀವವನ್ನೇ ಬಲಿ ಪಡೆಯುವಷ್ಟು ತೀವ್ರವಾಗಿದೆ. ಡೆಂಘಿಯ ಸೋಂಕಿನ ತೀವ್ರತೆ ಹೆಚ್ಚಿದ್ದಲ್ಲಿ ಬಾಯಿ ಮತ್ತು ಮೂಗಿನಿಂದ ರಕ್ತ ಬರುವುದು, ತೀವ್ರ ಹೊಟ್ಟೆ ನೋವು ಸೇರಿದಂತೆ ಜೀವಕ್ಕೇ ಎರವಾಗುವ ನಾನಾ ಸಮಸ್ಯೆಗಳು ತಲೆದೋರಬಹುದು.