World Idli Day: ಭಾರತದಲ್ಲಿ ಈ ವರ್ಷ ಸ್ವಿಗ್ಗಿಯಲ್ಲಿ ಆರ್ಡರ್ ಮಾಡಿದ್ದು 3 ಕೋಟಿಗೂ ಹೆಚ್ಚು ಇಡ್ಲಿ! 8428 ಪ್ಲೇಟ್ ಒಬ್ಬನೇ ಬುಕ್ ಮಾಡಿದ್ದ ಭೂಪ!

ಪ್ರತಿ ವರ್ಷ ಮಾರ್ಚ್ 30 ರಂದು ವಿಶ್ವ ಇಡ್ಲಿ ದಿನದ ಆಚರಿಸಲಾಗುತ್ತದೆ.  ಭಾರತದ ಪ್ರಮುಖ ಫುಡ್​ ಡೆಲಿವರಿ ಪ್ಲಾಟ್‌ಫಾರ್ಮ್ ಸ್ವಿಗ್ಗಿ,  ಈ ಸಂದರ್ಭದಲ್ಲಿ ಸ್ವಿಗ್ಗಿ  ವಿಶೇಷ  ಅಂಕಿ-ಅಂಶಗಳನ್ನು ಬಿಡುಗಡೆ ಮಾಡಿದೆ. ಈ ಅಂಕಿ ಅಂಶದ ಪ್ರಕಾರ ಮಾರ್ಚ್ 30,2022 ರಿಂದ ಮಾರ್ಚ್ 25, 2023 ರವರೆಗಿನ ಅವಧಿಯಲ್ಲಿ ದಕ್ಷಿಣ ಭಾರತದ ನೆಚ್ಚಿನ ಬ್ರೇಕ್​ ಫಾಸ್ಟ್​ ಇಡ್ಲಿಯನ್ನು ಎಷ್ಟು ಜನ ಸೇವಿಸಿದ್ದಾರೆ ಎನ್ನುವುದನ್ನು ಬಹಿರಂಗಪಡಿಸಿದೆ.

ಸ್ವಿಗ್ಗಿ ಬಿಡುಗಡೆ ಮಾಡಿರುವ ಅಂಕಿ ಅಂಶದ ಪ್ರಕಾರ ಇಡ್ಲಿಯನ್ನು ಹೆಚ್ಚು ಆರ್ಡರ್ ಮಾಡುವ ಟಾಪ್  5 ನಗರಗಳೆಂದರೆ, ಬೆಂಗಳೂರು, ಹೈದರಾಬಾದ್, ಚೆನ್ನೈ, ಮುಂಬೈ, ಕೊಯಮತ್ತೂರು ಎಂದು ತಿಳಿಸಿದೆ.

ಇನ್ನು ಸ್ವಿಗ್ಗಿ ಮಾಹಿತಿಯ ಪ್ರಕಾರ ಬೆಳಿಗ್ಗೆ 8 ರಿಂದ 10 ರವರೆಗೆ ಹೆಚ್ಚಿನ ಇಡ್ಲಿಯನ್ನು ಆರ್ಡರ್​ ಮಾಡುತ್ತಾರಂತೆ. ಚೆನ್ನೈ, ಹೈದರಾಬಾದ್, ಬೆಂಗಳೂರು, ಕೊಯಮತ್ತೂರು ಮತ್ತು ಮುಂಬೈನ ಬಳಕೆದಾರರು ಊಟದ ಸಮಯದಲ್ಲಿಯೂ ಇಡ್ಲಿಯನ್ನು ಆರ್ಡರ್ ಮಾಡುತ್ತಾರೆ ಎಂದು ಸ್ವಿಗ್ಗಿ ತಿಳಿಸಿದೆ.

ಇಡ್ಲಿ ಪ್ರಿಯರಿಗೆ ನೆಚ್ಚಿನ ಇಡ್ಲಿಗಳನ್ನು ಪ್ರಾಂತ್ಯವಾರು ಅಂಕಿ ಅಂಶವನ್ನು ಸ್ವಿಗ್ಗಿ ನೀಡಿದೆ. ಬೆಂಗಳೂರಿಗರು ರವಾ ಇಡ್ಲಿ, ಚೆನ್ನೈನವರು ತುಪ್ಪದ ಪೋಡಿ ಇಡ್ಲಿ, ಹೈದರಾಬಾದಿಗಳು ಕಾರಂ ಪೋಡಿ ತುಪ್ಪದ ಇಡ್ಲಿ, ಮುಂಬೈನವರು ಇಡ್ಲಿ- ವಡಾವನ್ನು ಹೆಚ್ಚಾಗಿ ಆರ್ಡರ್ ಮಾಡಿದ್ದಾರೆ. ಪ್ರತಿ ಪ್ಲೇಟ್ ​ 2 ಇಡ್ಲಿಗಳನ್ನು ಹೊಂದಿರುತ್ತದೆ.

ಸ್ವಿಗ್ಗಿ ಕಳೆದ ವರ್ಷದಲ್ಲಿ 33 ಮಿಲಿಯನ್ (3.3 ಕೋಟಿ ಪ್ಲೇಟ್​) ಪ್ಲೇಟ್​ ಇಡ್ಲಿಗಳನ್ನು ವಿತರಿಸಿದೆ. ಇದು ಗ್ರಾಹಕರಲ್ಲಿ ಈ ಖಾದ್ಯದ ಬಗ್ಗೆ ಇರುವ ಅಪಾರ ಜನಪ್ರಿಯತೆಯನ್ನು ಸೂಚಿಸುತ್ತದೆ. ಬೆಂಗಳೂರು, ಹೈದರಾಬಾದ್ ಮತ್ತು ಚೆನ್ನೈ ಇಡ್ಲಿಗಳನ್ನು ಹೆಚ್ಚು ಆರ್ಡರ್ ಮಾಡುವ ಮೊದಲ ಮೂರು ನಗರಗಳಾಗಿವೆ. ಮುಂಬೈ, ಕೊಯಮತ್ತೂರು, ಪುಣೆ, ವೈಜಾಗ್, ದೆಹಲಿ, ಕೋಲ್ಕತ್ತಾ ಮತ್ತು ಕೊಚ್ಚಿ ಇತರ ನಗರಗಳು ನಂತರದ ಸ್ಥಾನಗಳನ್ನು ಅಲಂಕರಿಸಿವೆ.

ವಿಶೇಷವೆಂದರೆ ಹೈದರಾಬಾದ್‌ನ ಒಬ್ಬನೇ ಗ್ರಾಹಕ ಇಡ್ಲಿಗಾಗಿಯೇ ಕಳೆದ ಒಂದು ವರ್ಷದಲ್ಲಿ ₹ 6 ಲಕ್ಷಕ್ಕೂ ಹೆಚ್ಚು ಖರ್ಚು ಮಾಡಿದ್ದಾರೆ ಎಂದು ಸ್ವಿಗ್ಗಿ ತಿಳಿಸಿದೆ. ಈ ಬಳಕೆದಾರ ಬೆಂಗಳೂರು ಮತ್ತು ಚೆನ್ನೈನಂತಹ ನಗರಗಳಲ್ಲಿ ಪ್ರಯಾಣಿಸುವಾಗ ಸ್ನೇಹಿತರು ಮತ್ತು ಕುಟುಂಬಕ್ಕಾಗಿ ಮಾಡಿದ ಆರ್ಡರ್‌ಗಳನ್ನು ಒಳಗೊಂಡಂತೆ ಕಳೆದ ಒಂದು ವರ್ಷದಲ್ಲಿ ಬರೋಬ್ಬರಿ 8,428 ಪ್ಲೇಟ್ ಇಡ್ಲಿಗಳನ್ನು ಆರ್ಡರ್ ಮಾಡಿದ್ದಾರೆ.

ಇಡ್ಲಿ ಕೇವಲ ಜನಪ್ರಿಯ ಉಪಹಾರ ಮಾತ್ರವಲ್ಲ, ಆರೋಗ್ಯಕರವೂ ಆಗಿದ್ದು, ಇದನ್ನು ಸಾಮಾನ್ಯವಾಗಿ ದಿನನಿತ್ಯದ ಪ್ರಮುಖ ಊಟಗಳಲ್ಲಿ ಒಂದೆಂದು ಹೇಳಲಾಗುತ್ತದೆ. ಮಸಾಲಾ ದೋಸೆಯ ನಂತರ ಇಡ್ಲಿ ಸ್ವಿಗ್ಗಿಯಲ್ಲಿ ಎರಡನೇ ಅತಿ ಹೆಚ್ಚು ಆರ್ಡರ್ ಮಾಡಿದ ಉಪಹಾರ ವಸ್ತುವಾಗಿದೆ ಎಂದು ಸ್ವಗ್ಗಿ ವಿಶ್ಲೇಷಣೆಯಿಂದ ತಿಳಿದುಬಂದಿದೆ.

ಗ್ರಾಹಕರು ತಮ್ಮ ಇಡ್ಲಿಗಳೊಂದಿಗೆ ಸಾಂಬಾರ್, ತೆಂಗಿನಕಾಯಿ ಚಟ್ನಿ, ಮೆದು ವಡೆ, ಸಾಗು, ತುಪ್ಪ, ಕೆಂಪು ಚಟ್ನಿ, ಜೈನ್ ಸಾಂಬಾರ್, ಚಹಾ, ಕಾಫಿ ಮುಂತಾದ ಇತರ ಭಕ್ಷ್ಯಗಳನ್ನು ಆರ್ಡರ್ ಮಾಡುತ್ತಾರೆ ಎಂದು ಸ್ವಿಗ್ಗಿ ತಿಳಿಸಿದೆ.