ಪ್ರವಾಸಿಗರನ್ನು ಸೆಳೆಯುತ್ತಿರುವ 'ಕೈಯಲ್ಲಿರುವ ಸೇತುವೆ'

ನಿಮಗೆ ವಿಶ್ವ ಪರ್ಯಟನೆ ಮಾಡುವ ಹವ್ಯಾಸವಿದ್ದರೆ ಅಥವಾ ವಿದೇಶಕ್ಕೆ ಪ್ರವಾಸಕ್ಕೆ ಹೋಗಬೇಕೆಂದು ಬಯಸಿದರೆ ವಿಯೆಟ್ನಾಂ ದೇಶಕ್ಕೆ ಭೇಟಿ ಕೊಡುವುದು ಉತ್ತಮ. ನೈಸರ್ಗಿಕ ಸೌಂದರ್ಯದ ಪ್ರವಾಸಿ ತಾಣಗಳನ್ನು ಹೊಂದಿರುವ ವಿಯೆಟ್ನಾಂ ಪ್ರವಾಸಿಗರ ನೆಚ್ಚಿನ ತಾಣ ಕೂಡ ಹೌದು. ಇವುಗಳ ನಡುವೆ ಪ್ರವಾಸಿಗರನ್ನು ಹೆಚ್ಚು ಆಕರ್ಷಿಸುತ್ತಿರುವುದು ಆ ದೇಶದಲ್ಲಿರುವ ವಿಶೇಷ ವಿನ್ಯಾಸದ ಸೇತುವೆಯಾಗಿದೆ.

ಸಮುದ್ರ ಮಟ್ಟದಿಂದ ಸುಮಾರು 1400 ಮೀಟರ್ ಎತ್ತರದಲ್ಲಿರುವ ಈ ಸೇತುವೆಯ ಉದ್ದ 150 ಮೀಟರ್. ಪರ್ವತ ಮತ್ತು ಕಾಡುಗಳನ್ನು ಸಂಪರ್ಕಿಸುವ ಈ ಸೇತುವೆಯ ಫೋಟೋಗಳು ಮತ್ತು ವಿಡಿಯೋ ಸಾಮಾಜಿ ಜಾಲತಾಣದಲ್ಲಿ ಸಾಕಷ್ಟು ವೈರಲ್ ಆಗುತ್ತಿದೆ. ವಿಶೇಷ ರೀತಿಯಲ್ಲಿ ವಿನ್ಯಾಸಗೊಳಿಸಿರುವ ಈ ಸೇತುವೆಯ ವೀಕ್ಷಣೆಗೆಂದೇ ಪ್ರವಾಸಿಗಳು ಆಗಮಿಸುತ್ತಿದ್ದಾರೆ. ಇದು ಸದ್ಯ ವಿಯೆಟ್ನಾಂನ ಕುತೂಹಲಕಾರಿ ಪ್ರವಾಸಿ ತಾಣವಾಗಿ ಮಾರ್ಪಟ್ಟಿದ್ದು, ಅತೀ ಹೆಚ್ಚು ಪ್ರವಾಸಿಗರನ್ನು ಆಕರ್ಷಿಸುವ ದೇಶದ ಪ್ರವಾಸಿ ತಾಣ ಎಂಬ ಖ್ಯಾತಿ ಪಡೆದಿದೆ.

ಗೋಲ್ಡನ್ ಬ್ರಿಡ್ಜ್​ ಎಂದು ಖ್ಯಾತಿ ಪಡೆದಿರುವ ಈ ಸೇತುವೆಯನ್ನು ಸ್ಥಳೀಯರು ಕಾ ವಾಂಗ್ ಸೇತುವೆ ಎಂದು ಕರೆಯುತ್ತಾರೆ. ಎರಡು ಕೈಗಳಲ್ಲಿ ಎತ್ತಿ ಹಿಡಿದಿರುವಂತೆ ವಿನ್ಯಾಸಗೊಳಿಸಲಾಗಿರುವ ಈ ಸೇತುವೆ ವಾಸ್ತುಶಿಲ್ಪದ ಅನನ್ಯ ಮಾದರಿಯಂತಿದೆ. ಈ ಸೇತುವೆಯನ್ನು ವೀಕ್ಷಿಸಿ, ಅದರ ಮೂಲಕ ಪರ್ವತದ ಮೇಲೆ ಹೋಗಲು ಇಲ್ಲಿಗೆ ಪ್ರವಾಸಿಗಳು ಬರುತ್ತಾರೆ.

ಡ ನಂಗಸ್ ಬಾನಾ ಪವರ್ತದಲ್ಲಿ ನಿರ್ಮಿಸಲಾಗಿರುವ ಈ ವಿಯೆಟ್ನಾಂನ ಎತ್ತರದ ಸೇತುವೆಗಳಲ್ಲಿ ಒಂದು. ಗುಡ್ಡಗಾಡು ಪ್ರದೇಶದಲ್ಲಿರುವ ಗೋಲ್ಡನ್ ಬ್ರಿಡ್ಜ್ ಮೇಲೆ ನಡೆಯುತ್ತಿದ್ದರೆ ಸ್ವರ್ಗಕ್ಕೆ ಇದೇ ದಾರಿ ಎಂದನಿಸಿ ಬಿಡುತ್ತದೆ. ಅಲ್ಲದೆ ದೇವರೇ ಕೈಗಳನ್ನು ಚಾಚಿ ಸೇತುವೆಯನ್ನು ಹಿಡಿದು ದಾರಿ ಮಾಡಿಕೊಟ್ಟಂತಹ ಅನುಭವ ನಿಮ್ಮದಾಗಲಿದೆ.

ಈ ಸೇತುವೆ ಸೌಂದರ್ಯ ಹೆಚ್ಚಿಸಲು ಲೊಬೆಲಿಯಾ ಕ್ರಿಸೆಂಡಮ್ ಜಾತಿಯ ಹೂವುಗಳನ್ನು ಎರಡೂ ಬದಿಯಲ್ಲಿ ನೆಡಲಾಗಿದೆ. ವಿವಿಧ ಬಣ್ಣಗಳಿಂದ ಕಂಗೊಳಿಸುವ ಹೂವುಗಳು ನಿಮ್ಮನ್ನು ಇನ್ನೊಂದು ಲೋಕಕ್ಕೆ ಕೊಂಡೊಯ್ಯುವುದರಲ್ಲಿ ಸಂಶಯವಿಲ್ಲ. ಮುಂದಿನ ಬಾರಿ ಪ್ರವಾಸವನ್ನು ಪ್ಲಾನ್ ಮಾಡುವಾಗ ಒಮ್ಮೆ ವಿಯೆಟ್ನಾಂ ಕಡೆ ಮುಖ ಮಾಡುವುದು ಉತ್ತಮ.