Valentines Day 2023: ಈ ದೇಶಗಳಲ್ಲಿ ಪ್ರೇಮಿಗಳ ದಿನದ ಆಚರಣೆ ಇಲ್ಲ, ಸೆಲೆಬ್ರೇಶನ್​​ ಮಾಡಿದ್ರೆ ಜೈಲು ಶಿಕ್ಷೆ ಫಿಕ್ಸ್!

ಪ್ರೇಮಿಗಳ ದಿನ ಸಮೀಪಿಸುತ್ತಿದೆ. ಪ್ರತಿ ವರ್ಷ ಫೆಬ್ರವರಿ 14 ರಂದು ಪ್ರೇಮಿಗಳ ದಿನವನ್ನು ಆಚರಿಸಲಾಗುತ್ತದೆ. ಜನರು ತಮ್ಮ ಪ್ರೀತಿಯನ್ನು ವ್ಯಕ್ತಪಡಿಸಲು ವರ್ಷವಿಡೀ ಈ ದಿನಕ್ಕಾಗಿ ಕಾಯುತ್ತಾರೆ. ಪ್ರಪಂಚದ ವಿವಿಧ ದೇಶಗಳಲ್ಲಿ ಪ್ರೀತಿಯ ದಿನವನ್ನು ಭರ್ಜರಿಯಾಗಿ ಆಚರಿಸಲಾಗುತ್ತದೆ.

ಆದರೆ ಕೆಲವು ದೇಶಗಳಲ್ಲಿ ಪ್ರೇಮಿಗಳ ದಿನವನ್ನು ಆಚರಿಸುವುದೇ ಇಲ್ಲ. ಇಲ್ಲಿ ಜನರು ಪ್ರೀತಿಸುವುದಿಲ್ಲ ಎಂದಲ್ಲ, ಆ ದೇಶಗಳಲ್ಲಿ ಪ್ರೀತಿಯನ್ನು ಸಾರ್ವಜನಿಕವಾಗಿ ವ್ಯಕ್ತಪಡಿಸುವುದನ್ನು ನಿಷೇಧಿಸಲಾಗಿದೆ.

ಇಂಡೋನೇಷ್ಯಾ: ಇಲ್ಲಿ ಯಾವುದೇ ಕಾನೂನು ಇದನ್ನು ನಿಷೇಧಿಸದಿದ್ದರೂ, ಇಲ್ಲಿ ಯಾರೂ ಪ್ರೇಮಿಗಳ ದಿನವನ್ನು ಆಚರಿಸುವುದಿಲ್ಲ. ಮುಸ್ಲಿಮರು ಈ ದೇಶದ ಸುರಬಯಾ ಮತ್ತು ಮಕಸ್ಸರ್ ಮುಂತಾದ ಸ್ಥಳಗಳಲ್ಲಿ ವಾಸಿಸುತ್ತಿದ್ದಾರೆ. ಇದಲ್ಲದೇ ಕೆಲವು ಪ್ರದೇಶಗಳಲ್ಲಿ ವ್ಯಾಲೆಂಟೈನ್ಸ್ ಡೇ ವಿರೋಧಿ ಮೆರವಣಿಗೆಗಳು ನಡೆಯುವುದರಿಂದ ಇಲ್ಲಿ ಈ ದಿನದ ಆಚರಣೆಯನ್ನು ನಿಷೇಧಿಸಲಾಗಿದೆ. ಮುಸ್ಲಿಂ ಕಾನೂನು ಇದನ್ನು ಅನುಮತಿಸುವುದಿಲ್ಲ, ಆದ್ದರಿಂದ ಇದನ್ನು ಇಲ್ಲಿ ವಿರೋಧಿಸಲಾಗಿದೆ.

ಇರಾನ್: ಇದೂ ಕೂಡ ಮುಸ್ಲಿಂ ರಾಷ್ಟ್ರವಾಗಿದೆ. ಇಲ್ಲಿ ಧಾರ್ಮಿಕ ಮುಖಂಡರ ಅಧಿಕಾರ ನಡೆಯುತ್ತದೆ. ವ್ಯಾಲೆಂಟೈನ್ಸ್ ಡೇ ಉಡುಗೊರೆಗಳು ಮತ್ತು ಸಂಬಂಧಿತ ವಸ್ತುಗಳನ್ನು ಇಲ್ಲಿ ಸರ್ಕಾರ ನಿಷೇಧಿಸಿದೆ. ಇದನ್ನು ಪಾಶ್ಚಿಮಾತ್ಯ ಸಂಸ್ಕೃತಿ ಎಂದು ಪರಿಗಣಿಸಲಾಗಿದೆ ಮತ್ತು ನಿಷೇಧಿಸಲಾಗಿದೆ. ವ್ಯಾಲೆಂಟೈನ್ಸ್ ಡೇ ಬದಲಿಗೆ ಮೆಹ್ರಿಗನ್ ಎಂಬ ಹಳೆಯ ಹಬ್ಬವನ್ನು ಆಚರಿಸಲಾಗುತ್ತದೆ ಎಂದು ಹೇಳಲಾಗುತ್ತದೆ. ಈ ಹಬ್ಬವು ಸ್ನೇಹ, ಪ್ರೀತಿ ಮತ್ತು ವಾತ್ಸಲ್ಯಕ್ಕೆ ಸಂಬಂಧಿಸಿದೆ.

ಪಾಕಿಸ್ತಾನ: ಪಾಕ್​ನಲ್ಲಿ ಪ್ರೇಮಿಗಳ ದಿನವನ್ನು ಸಂಪೂರ್ಣವಾಗಿ ನಿಷೇಧಿಸದಿದ್ದರೂ, ಆಚರಿಸುವುದು ಕಡಿಮೆ ಎನ್ನಬಹುದು. ಫೆಬ್ರವರಿ 7, 2018 ರಂದು ಇಸ್ಲಾಮಾಬಾದ್ ಹೈಕೋರ್ಟ್‌ನಿಂದ ಪ್ರೇಮಿಗಳ ದಿನಾಚರಣೆ ಮತ್ತು ಮಾಧ್ಯಮ ಪ್ರಸಾರದ ಮೇಲೆ ನಿಷೇಧ ಹೇರಲಾಯಿತು. ಪಾಶ್ಚಿಮಾತ್ಯ ಪ್ರಭಾವ ಮತ್ತು ಇಸ್ಲಾಂ ಧರ್ಮದ ವಿರುದ್ಧ ಇದನ್ನು ಪರಿಗಣಿಸಲಾಗಿದೆ ಎಂದು ಪಾಕಿಸ್ತಾನ ಹೇಳುತ್ತದೆ.

ಮಲೇಷ್ಯಾ: ಇಲ್ಲಿ ಪ್ರೇಮಿಗಳ ದಿನದ ಬಗ್ಗೆ 2005ರಲ್ಲಿ ಫತ್ವಾ ಹೊರಡಿಸಲಾಗಿತ್ತು. ಇಸ್ಲಾಂ ವಿರುದ್ಧವಾಗಿ ಇದನ್ನು ಪರಿಗಣಿಸಲಾಗಿದೆ ಮತ್ತು ಪಾಶ್ಚಿಮಾತ್ಯ ನಾಗರಿಕತೆಗೆ ಸಂಬಂಧಿಸಿದೆ ಎಂದು ಪರಿಗಣಿಸಲಾಗಿದೆ ಎಂಬುದು ಇಲ್ಲಿಯೂ ಕಾರಣವಾಗಿದೆ. ಇಲ್ಲಿ ಪ್ರತಿ ವರ್ಷ ವ್ಯಾಲೆಂಟೈನ್ಸ್ ಡೇ ವಿರೋಧಿ ಅಭಿಯಾನವೂ ನಡೆಯುತ್ತದೆ.

ಈ ದೇಶಗಳ ಹೊರತಾಗಿ, ಸೌದಿ ಅರೇಬಿಯಾವು ಬಹಳ ಹಿಂದಿನಿಂದಲೂ ಪ್ರೇಮಿಗಳ ದಿನದ ಬಗ್ಗೆ ಇದೇ ರೀತಿಯ ವಾತಾವರಣವನ್ನು ಹೊಂದಿದೆ. ಇದರಿಂದಾಗಿ 2014ರಲ್ಲಿ 39 ಮಂದಿ ಜೈಲು ಸೇರಬೇಕಾಯಿತು. ಆದಾಗ್ಯೂ, ಈ ನಿಷೇಧವನ್ನು 2018 ರಲ್ಲಿ ತೆಗೆದುಹಾಕಲಾಯಿತು. ಉಜ್ಬೇಕಿಸ್ತಾನ್‌ನಲ್ಲಿ ಕೂಡ 2012ರ ವರೆಗೂ ಈ ದಿನದ ಬಗ್ಗೆ ಇದೇ ರೀತಿಯ ವಾತಾವರಣವಿತ್ತು, ಆದರೆ ನಂತರ ಇಲ್ಲಿ ಪ್ರೇಮಿಗಳ ದಿನವನ್ನು ಆಚರಿಸಲು ಯಾವುದೇ ನಿರ್ಬಂಧಗಳಿಲ್ಲ.