Golden Lake Hotel: ವಿಶ್ವದ ಮೊದಲ ಚಿನ್ನ ಲೇಪಿತ ಹೋಟೆಲ್​! ಇಲ್ಲಿ ಟಾಯ್ಲೆಟ್​ ಬೇಸಿನ್​ ಕೂಡಾ 24 ಕ್ಯಾರೆಟ್​ ಗೋಲ್ಡ್​ ಗುರೂ!

ಒಂದು ಗ್ರಾಂ ಚಿನ್ನದ ಬೆಲೆ ಇಷ್ಟು ಹೆಚ್ಚಾಗಿರುವಾಗ ಈ ಜಗತ್ತಿನಲ್ಲಿ 24 ಕ್ಯಾರೆಟ್ ಚಿನ್ನದಿಂದ ಒಂದು ಹೋಟೆಲ್ ಕಟ್ಟಿದ್ದಾರೆ ಎಂದರೆ ನೀವು ನಂಬ್ತೀರಾ? ಹೌದು ಅಂತಹದೇ ಒಂದು 6 ಸ್ಟಾರ್ ಹೋಟೆಲ್​ ಇದೆ. ಅದರ ಬಗ್ಗೆ ಕಂಪ್ಲೀಟ್ ಮಾಹಿತಿ ಈ ಲೇಖನದಲ್ಲಿದೆ.

ಹಲವಾರು ಪ್ರವಾಸಿಗರನ್ನು ಆಕರ್ಷಿಸುವ ವಿಯೆಟ್ನಾಂನ ರಾಜಧಾನಿ ಹನೋಯಿಯಲ್ಲಿರುವ ಹನೋಯಿ ಗೋಲ್ಡನ್ ಲೇಕ್ ಹೋಟೆಲ್‌ ಇದಾಗಿದೆ. ಇದರ ಒಳ ಮತ್ತು ಹೊರಭಾಗ ಎರಡಕ್ಕೂ 24 ಕ್ಯಾರೆಟ್​​ ಚಿನ್ನದಿಂದ ಲೇಪಿತವಾಗಿದೆ. ಇದೇ ವಿಶ್ವದ ಮೊದಲ ಚಿನ್ನದ ಲೇಪಿತ ಹೋಟೆಲ್ ಆಗಿದೆ.

2009 ರಲ್ಲಿ ನಿರ್ಮಿಸಲಾದ ಈ ಡೋಲ್ಸ್ ಹನೋಯಿ ಗೋಲ್ಡನ್ ಲೇಕ್‌ನಲ್ಲಿ ಅತಿಥಿಗಳಿಗಾಗಿ ಕಾಫಿಯನ್ನು ಗೋಲ್ಡನ್ ಕಪ್‌ನಲ್ಲಿ ನೀಡಲಾಗುತ್ತಿತ್ತು. ಇನ್ನು ಇಲ್ಲಿ ಬಟ್ಟಲು, ಲೋಟ, ಚಮಚ ಎಲ್ಲವೂ ಚಿನ್ನದೇ ಆಗಿತ್ತು. ಆದರೆ ಈಗ ಇಡೀ ಹೋಟೆಲ್ ಅನ್ನೇ ಚಿನ್ನದಿಂದ ಮಾಡಿದ್ದಾರೆ.

ಅಲ್ಲದೆ ಇಲ್ಲಿರುವ ಈಜುಕೊಳ, ಟೆರೇಸ್ ಮತ್ತು​ ಬಾತ್ ಟಬ್ ಗೆ ಸಹ ಚಿನ್ನ ಲೇಪಿತವಾಗಿದೆ. ಅಲ್ಲಿನ ಟಾಯ್ಲೆಟ್ ಸೀಟ್ ಕೂಡ ಚಿನ್ನದಿಂದ ಲೇಪಿತವಾಗಿದೆ. ಚಿನ್ನವು ಒತ್ತಡವನ್ನು ಕಡಿಮೆ ಮಾಡುತ್ತದೆ ಎಂದು ನಂಬಲಾಗಿದೆ. ಇದೇ ಕಾರಣಕ್ಕಾಗಿ ಹೋಟೆಲ್ ಸಂಪೂರ್ಣ ಚಿನ್ನದಿಂದ ಮಾಡಲ್ಪಟ್ಟಿದೆ ಎಂದು ಆಡಳಿತ ಮಂಡಳಿ ಹೇಳಿದೆ.

ಸುಮಾರು 54,000 ಅಡಿ ನಡೆಯುವ ಮಾರ್ಗ, ಈಜುಕೊಳ, ಗೋಡೆ ಮತ್ತು ನೆಲವನ್ನು ಚಿನ್ನದ ಲೇಪನದಿಂದ ಮುಚ್ಚಲಾಗಿದೆ. ವಾಸ್ತವವಾಗಿ, ಇಲ್ಲಿ ಎಲ್ಲವೂ ಚಿನ್ನದಿಂದಲೇ ಕೂಡಿದೆ ಅಂತ ಹೇಳ್ಬಹುದು. ಈ ಹೋಟೆಲ್ ಸುಮಾರು 25 ಮಹಡಿಗಳನ್ನು ಹೊಂದಿದೆ. ಇದು ಒಟ್ಟು 400 ಅತಿಥಿ ಕೊಠಡಿಗಳನ್ನು ಹೊಂದಿದೆ.

ಇನ್ನು ಈ ಹೋಟೆಲ್ "ಅತಿ ಶ್ರೀಮಂತರಿಂದ ಹಿಡಿದು ಸಾಮಾನ್ಯ ಜನರಿಗೆ ಸಹ ಚೆಕ್-ಇನ್ ಮಾಡಲು ಅವಕಾಶ ನೀಡಲಾಗಿದೆ. ಇದರಿಂದನೇ ಸಾಮಾಜಿಕ ಮಾಧ್ಯಮದಲ್ಲಿ ಜನಪ್ರಿಯವಾಗಿದೆ" ಎಂದು ಹೋಟೆಲ್ ಮಾಲೀಕತ್ವದ ಹೋವಾ ಬಿನ್ಹ್ ಗ್ರೂಪ್‌ನ ಅಧ್ಯಕ್ಷ ನ್ಗುಯೆನ್ ಹು  ಡುವಾಂಗ್ ಹೇಳಿದರು.

ಹಾಗೆಯೇ ಈ ಐಷಾರಾಮಿ ಚಿನ್ನದ ಹೋಟೆಲ್‌ನಲ್ಲಿ ಒಂದು ದಿನ ಉಳಿಯಲು $250 ವೆಚ್ಚವಾಗುತ್ತದೆ. ಅಮದರೆ ಇದು ಭಾರತೀಯ ಕರೆನ್ಸಿಯಲ್ಲಿ ಇಪ್ಪತ್ತು ಸಾವಿರದಷ್ಟು ಖರ್ಚು ಮಾಡಬೇಕು. ಇದೇ ವೇಳೆ ಡಬಲ್ ಬೆಡ್ ರೂಂ ಬಾಡಿಗೆ 75 ಸಾವಿರವಾಗುತ್ತದೆ.