National Mango Day: ಹಣ್ಣುಗಳ ರಾಜ ಮಾವಿಗೂ ಒಂದು ದಿನ! ರುಚಿಯಷ್ಟೇ ಇತಿಹಾಸವೂ ಸ್ವಾದಿಷ್ಟ

ಆರೋಗ್ಯ ಎಂದಾಗ ಮೊದಲಿಗೆ ನೆನಪಾಗುವುದೇ ಪೋಷಕಾಂಶಯುಕ್ತ ಆಹಾರ. ಪೋಷಕಾಂಶ ಎಂದಾಗ ಮೊದಲು ಕಣ್ಣೆದುರು ಬರುವುದೇ ಹಣ್ಣುಗಳು. ಹಣ್ಣುಗಳು ಆರೋಗ್ಯವರ್ಧಕಗಳಾಗಿವೆ. ಸಾಮ್ರಾಜ್ಯಕ್ಕೆ ಒಬ್ಬ ರಾಜನಿರುವಂತೆ ಹಣ್ಣುಗಳಿಗಳಿಗೂ ಒಬ್ಬ ರಾಜನಿದ್ದಾನೆ ಅದುವೇ ಮಾವು. ಜುಲೈ 22 ರಂದು ರಾಷ್ಟ್ರೀಯ ಮಾವು ದಿನವನ್ನಾಗಿ ಆಚರಿಸಲಾಗುತ್ತದೆ.

ಭಾರತದಲ್ಲಿ ಮಾವು ಸುಮಾರು 5000 ವರ್ಷಗಳ ಇತಿಹಾಸವನ್ನು ಹೊಂದಿದೆ. ಇಲ್ಲಿನ ಜಾನಪದ ಮತ್ತು ಧಾರ್ಮಿಕ ಆಚರಣೆಗಳೊಂದಿಗೆ  ಸಂಬಂಧವನ್ನು ಹೊಂದಿದೆ. ಮಾವಿನ ಎಲೆಗಳು, ತೊಗಟೆ, ಸಿಪ್ಪೆ, ಮತ್ತು ಹಣ್ಣನ್ನು ಮುಖ್ಯವಾಗಿ ಧಾರ್ಮಿಕ ವಿಧಿ ವಿಧಾನಗಳಿಗೆ ಪರಿಕರಗಳಾಗಿ ಬಳಸಲಾಗುತ್ತದೆ. ಇದನ್ನು ಪ್ರೀತಿಯ ಮತ್ತು ಸ್ನೇಹದ ಸಂಕೇತವೆಂದು ಕರೆಯುತ್ತಾರೆ.

ಮಾವಿನ ಹಣ್ಣು ಏಷ್ಯಾ ದೇಶದಲ್ಲಿ ಹೆಚ್ಚಾಗಿ ಕಂಡುಬರುತ್ತದೆ. ಇದು ಭಾರತದ ರಾಷ್ಟ್ರೀಯ ಹಣ್ಣು ಮಾತ್ರವಲ್ಲದೇ, ಪಾಕಿಸ್ತಾನ ಮತ್ತು ಫಿಲಿಫೈನ್ಸ್ ದೇಶಗಳ ರಾಷ್ಟ್ರೀಯ ಹಣ್ಣಾಗಿದೆ. ಭಾರತದಲ್ಲಿ ಮಾವು ಹೆಚ್ಚಾಗಿ ಬೆಳೆಯುತ್ತದೆ. ಚೀನಾ ಮತ್ತು ಥೈಲಾಂಡ್ ನಂತರದ ಸ್ಥಾನದಲ್ಲಿದೆ.

ಮಾವು ಪದ ಮನ್ನಾ ಎಂಬ ಪದದಿಂದ ಹುಟ್ಟಿಕೊಂಡಿದೆ. ಇದನ್ನು ಪೋರ್ಚುಗೀಸರು 1490 ರ ದಶಕದಲ್ಲಿ ಮಸಾಲೆ ವ್ಯಾಪಾರಕ್ಕಾಗಿ ಕೇರಳಕ್ಕೆ ಬಂದಾಗ "ಮಂಗಾ" ಎಂದು ಬದಲಾಯಿಸಿದ್ದರು.

ಮಾವು ಗೋಡಂಬಿ ಕುಟುಂಬಕ್ಕೆ ಸೇರಿದ (Cashew Family) ಹಣ್ಣಾಗಿದೆ. ಇದು ಮ್ಯಾಂಗಿಫೆರಾ ಇಂಡಿಕಾ (ಅನಾಕಾರ್ಡಿಯೇಸಿ) ಎಂಬ ವೈಜ್ಞಾನಿಕ ಹೆಸರನ್ನು ಹೊಂದಿದೆ. ಉಷ್ಣವಲಯದಲ್ಲಿ ಅತ್ಯಂತ ಮಹತ್ವದ ಮತ್ತು ವ್ಯಾಪಕವಾಗಿ ಬೆಳೆಯುವ ಹಣ್ಣುಗಳಲ್ಲಿ ಒಂದಾಗಿದೆ.

ಅತ್ಯಂತ ರುಚಿಕರವಾದ ಈ ಹಣ್ಣನ್ನು ಉಪ್ಪಿನಕಾಯಿ ಐಸ್ ಕ್ರೀಮ್ ಸ್ಮೂಥಿಗಳು (Smoothies) ಮಾವಿನ ಶೇಕ್​ಗಳು, ಚಾಕಲೇಟ್, ಜ್ಯೂಸ್ ಹೀಗೆ ವಿವಿಧ ರೀತಿಯಾದ ಪಾಕ ಪದ್ಧತಿಗಳಲ್ಲಿ ಬಳಸಲಾಗುತ್ತದೆ. ಇದು ವಿಶೇಷವಾಗಿ ವಿಟಮಿನ್ ಎ, ಸಿ ಮತ್ತು ಡಿ ಗಳ ಉತ್ತಮ ಮೂಲವಾಗಿದೆ. ಈ ಕಾರಣದಿಂದಾಗಿ, ದೇಹದ ರೋಗನಿರೋಧಕ ಶಕ್ತಿಯು ಉತ್ತಮಗೊಳ್ಳುತ್ತದೆ.

300-400 ಕ್ರಿಶ್ತಶಕದಲ್ಲಿ ಮಾವು ಏಷ್ಯಾದಿಂದ ಮಧ್ಯಪ್ರಾಚ್ಯ, ಪೂರ್ವ ಆಫ್ರಿಕಾ ಮತ್ತು ದಕ್ಷಿಣ ಅಮೇರಿಕಾಕ್ಕೂ ತಲುಪುತ್ತದೆ. ಮುಂದೆ ವಿಶ್ವದ ಇತರೆ ಭಾಗಗಳಿಗೆ ಹರಡುತ್ತದೆ.

ಸುವಾಸನೆ ಮತ್ತು ರುಚಿಯ ಮೂಲಕ ಎಲ್ಲರನ್ನೂ ಆಕರ್ಷಿಸುವ ಹಣ್ಣುಗಳ ರಾಜ ಮಾವು ಧಾರ್ಮಿಕವಾಗಿ, ಜಾನಪದವಾಗಿ ಮತ್ತು ಸಂಸ್ಕೃತಿಯೊಂದಿಗೆ ಬಂಧನವನ್ನು ಹೊಂದಿದ್ದು, ದೇಶದ ಇತಿಹಾಸದ ಅವಿಭಾಜ್ಯ ಅಂಗವಾಗಿದೆ.