Mother's Day 2023: ಅಮ್ಮನಿಗೊಂದು ಥ್ಯಾಂಕ್ಸ್ ಹೇಳಲು ಈ ದಿನವೇ ವಿಶೇಷ! ನಿಮ್ಮ ತಾಯಿಗೆ ಲೈಫ್​ ಲಾಂಗ್​ ನೆನಪಿರುವಂತಹ ಗಿಫ್ಟ್​ ಕೊಡಿ

ದೇವರು ಎಲ್ಲಾ ಕಡೆ ಇರುವುದಕ್ಕೆ ಸಾಧ್ಯವಿಲ್ಲ ಅಂತಾನೆ ತಾಯಿಯನ್ನು ಸೃಷ್ಟಿ ಮಾಡಿದ್ದಾರೆ ಅಂತ ಹೇಳುವ ಮಾತನ್ನು ನಾವು ಕೇಳಿರುತ್ತೇವೆ. ಈ ಮಾತು ತುಂಬಾನೇ ನಿಜ ಕಣ್ರೀ, ತ್ಯಾಗಕ್ಕೆ, ಪ್ರೀತಿಗೆ ಮತ್ತು ವಾತ್ಸಲ್ಯಕ್ಕೆ ಇನ್ನೊಂದು ಹೆಸರೇ ಆ ತಾಯಿ. ಜೀವನ ಪರ್ಯಂತ ಅಪ್ಪ-ಅಮ್ಮನ ಬಗ್ಗೆ, ಒಡಹುಟ್ಟಿದವರ ಬಗ್ಗೆ, ಗಂಡನ ಮನೆಯವರ ಬಗ್ಗೆ ಮತ್ತು ತನ್ನ ಮಕ್ಕಳ ಬಗ್ಗೆ ಆಲೋಚಿಸುವವಳೇ ಆ ತಾಯಿ.

ನೀವು ಕಲಿಯುಗದ ಭೀಮ ಚಿತ್ರದ ‘ಈ ತಾಯಿಯ ಹಾರ್ಟು ಆ ಮೌಂಟ್ ಎವರೆಸ್ಟು, ಆ ಶಿಖರದ ವೇಟು ತಿಳಿದವರೆಷ್ಟು’ ಅನ್ನೋ ಹಾಡಿನ ಸಾಲುಗಳನ್ನು ಕೇಳಿಯೇ ಇರುತ್ತೀರಿ. ಹೌದು.. ನಿಜಕ್ಕೂ ತಾಯಿಯ ಪ್ರೀತಿ, ವಾತ್ಸಲ್ಯದ ಆಳ ಬಹುಶಃ ಯಾರಿಗೂ ತಿಳಿದಿರುವುದಿಲ್ಲ.

ಈ ವರ್ಷ ತಾಯಂದಿರ ದಿನವನ್ನು ಮೇ 14 ರಂದು ಆಚರಿಸಲಾಗುವುದು. ಇಂತಹ ತಾಯಿಗೆ ಪ್ರತಿದಿನ ನಾವು ಚಿರರುಣಿಯಾಗಿರಲೇಬೇಕು, ಅಂತಹದರಲ್ಲಿ ಮೇ ತಿಂಗಳಿನ ಎರಡನೇ ಭಾನುವಾರವನ್ನು ಪ್ರತಿ ವರ್ಷ ತಾಯಂದಿರ ದಿನವಾಗಿ ಆಚರಿಸಲಾಗುತ್ತದೆ.

ಸೆಲೆಬ್ರೇಷನ್ ಮಾಡುವ ಮುನ್ನ ತಾಯಿಯ ಆರೋಗ್ಯದ ಬಗ್ಗೆ ಇರಲಿ ಕಾಳಜಿ: ಅದರಲ್ಲೂ ಈಗ ಹೆಚ್ಚಿನ ತಾಯಂದಿರು ಈ ಸಕ್ಕರೆ ಕಾಯಿಲೆಯಿಂದ ಬಳಲುತ್ತಿರುವುದನ್ನು ನಾವೆಲ್ಲಾ ನೋಡುತ್ತಿದ್ದೇವೆ. ಅಂತಹದರಲ್ಲಿ ಹೀಗೆ ತುಂಬಾನೇ ಸಿಹಿಯಾದ ಕೇಕ್ ಆಗಲಿ, ಇನ್ನಿತರೆ ಸಿಹಿ ತಿಂಡಿಗಳನ್ನು ತಾಯಂದಿರಿಗೆ ತಿನ್ನಿಸುವುದು ಅವರ ಸಕ್ಕರೆ ಕಾಯಿಲೆಯನ್ನು ಜಾಸ್ತಿ ಮಾಡಬಹುದು.

ಮಕ್ಕಳು ತಮ್ಮ ತಾಯಿಗೆ ಒಳ್ಳೆಯ ರೆಸ್ಟೋರೆಂಟ್ ನಲ್ಲಿ ಊಟ ಮಾಡಿಸಬೇಕು, ಸಿಹಿ ತಿನ್ನಿಸಬೇಕು ಅಂತೆಲ್ಲಾ ಆಸೆ ಇರುವುದು ಸಹಜ. ಆದರೆ ತಾಯಂದಿರ ದಿನದಂದು ಮಧುಮೇಹ ಹೊಂದಿರುವ ತಾಯಂದಿರಿಗೆ ಸ್ವಲ್ಪ ಸವಾಲಿನ ಸಮಯವಾಗಿದೆ, ಏಕೆಂದರೆ ಅನೇಕ ಸಾಂಪ್ರದಾಯಿಕ ಸಿಹಿ ತಿಂಡಿಗಳು ಸಕ್ಕರೆಯಿಂದ ಮಾಡಿರುತ್ತಾರೆ ಮತ್ತು ಇವುಗಳಲ್ಲಿ ಕಾರ್ಬೋಹೈಡ್ರೇಟ್ ಗಳು ಅಧಿಕವಾಗಿರುತ್ತವೆ.

ಮಧುಮೇಹ ಸ್ನೇಹಿ ತಿಂಡಿಗಳು: ಡಾರ್ಕ್ ಚಾಕೊಲೇಟ್, ಕಡಿಮೆ ಕಾರ್ಬ್ ಪ್ರೋಟೀನ್ ಬಾರ್ ಗಳು ಮತ್ತು ತಾಜಾ ಹಣ್ಣುಗಳಂತಹ ಸಕ್ಕರೆ ಮತ್ತು ಕಾರ್ಬೋಹೈಡ್ರೇಟ್ ಗಳು ಕಡಿಮೆ ಇರುವ ಕೆಲವು ರುಚಿಕರವಾದ ತಿಂಡಿಗಳನ್ನು ನೀವು ನಿಮ್ಮ ತಾಯಿಗೆ ಉಡುಗೊರೆಯಾಗಿ ನೀಡಬಹುದು.

ಫಿಟ್ನೆಸ್ ಟ್ರ್ಯಾಕರ್: ನಿಮ್ಮ ತಾಯಿಯೂ ದಿನವಿಡೀ ತನ್ನ ಸಂಸಾರಕ್ಕೆ ಅಂತ ಸತತವಾಗಿ ಬೆಳಗ್ಗೆಯಿಂದ ರಾತ್ರಿ ಮಲಗುವವರೆಗೂ ಒಂದಲ್ಲ ಒಂದು ಕೆಲಸದಲ್ಲಿ ಬ್ಯುಸಿ ಆಗಿರುತ್ತಾರೆ. ಇವರಿಗೆ ನೀವು ಒಂದು ಫಿಟ್ನೆಸ್ ಟ್ರ್ಯಾಕರ್ ಅನ್ನು ಉಡುಗೊರೆಯಾಗಿ ನೀಡಬಹುದು.

ಡಯಾಬಿಟಿಕ್ ಪಾಕವಿಧಾನ ಪುಸ್ತಕಗಳು: ಮಧುಮೇಹ ಸ್ನೇಹಿ ಊಟ ಮತ್ತು ತಿಂಡಿಗಳ ಮೇಲೆ ಕೇಂದ್ರೀಕರಿಸುವ ಕೆಲವು ಪಾಕವಿಧಾನಗಳಿರುವ ಪುಸ್ತಕಗಳನ್ನು ತಾಯಿಗೆ ಉಡುಗೊರೆಯಾಗಿ ನೀಡಬಹುದು.

ನೀರಿನ ಬಾಟಲ್: ಸಕ್ಕರೆ ಕಾಯಿಲೆ ಇರುವವರು ಆಗಾಗ್ಗೆ ಸ್ವಲ್ಪ ಸ್ವಲ್ಪ ತಿಂಡಿಯನ್ನು ತಿನ್ನುತ್ತಾ ನೀರನ್ನು ಕುಡಿಯುತ್ತಿರಬೇಕು ಅಂತ ವೈದ್ಯರು ಹೇಳುತ್ತಾರೆ. ಸದಾ ನೀರನ್ನು ಕುಡಿದುಕೊಂಡು ಹೈಡ್ರೇಟ್ ಆಗಿ ಉಳಿಯಲು ಮತ್ತು ನಿಮ್ಮ ತಾಯಿಯ ನೀರಿನ ಸೇವನೆಯನ್ನು ಟ್ರ್ಯಾಕ್ ಮಾಡಲು ಆಕೆಗೆ ಒಂದು ನೀರಿನ ಬಾಟಲ್ ಅನ್ನು ನೀವು ಉಡುಗೊರೆಯಾಗಿ ನೀಡಬಹುದು.

ಸ್ಪಾ ಗೆ ಕರೆದುಕೊಂಡು ಹೋಗಿ: ಮಾನಸಿಕ ಮತ್ತು ದೈಹಿಕ ಒತ್ತಡವು ರಕ್ತದಲ್ಲಿನ ಸಕ್ಕರೆ ಮಟ್ಟದ ಮೇಲೆ ನಕಾರಾತ್ಮಕ ಪರಿಣಾಮ ಬೀರಬಹುದು, ಆದ್ದರಿಂದ ಮಸಾಜ್ ಅಥವಾ ಸ್ಪಾ ಪ್ಯಾಕೇಜ್ ಗಳನ್ನು ನಿಮ್ಮ ತಾಯಿಗೆ ಉಡುಗೊರೆಯಾಗಿ ನೀಡಿದರೆ, ಅವರು ತಮ್ಮ ಒತ್ತಡವನ್ನು ಕಡಿಮೆ ಮಾಡಿಕೊಳ್ಳಲು ಸಹಾಯವಾಗುತ್ತದೆ.