Crime: ನಾಯಿಗೆ ಗುಂಡು ಹಾರಿಸಿದ್ದಕ್ಕೆ 21 ವರ್ಷ ಜೈಲು ಶಿಕ್ಷೆ!

ಈ ಭೂಮಿ ಮೇಲೆ ಮನುಷ್ಯರಷ್ಟೇ ಪ್ರಾಣಿಗಳಿಗೂ ಬದುಕುವ ಹಕ್ಕು- ಸ್ವಾತಂತ್ರ್ಯ ಇದೆ. ಮೂಕ ಪ್ರಾಣಿಗಳಿಗೆ ತೊಂದರೆ ಕೊಟ್ಟರೆ, ಪ್ರಾಣ ಹಾನಿ ಮಾಡಿದರೆ ಮನುಷ್ಯರಿಗೂ ಶಿಕ್ಷೆ ನೀಡುವ ಕಾನೂನುಗಳಿವೆ. ಆದರೆ ಅವು ಪುಸ್ತಕಕ್ಕೆ ಮಾತ್ರ ಸೀಮಿತವಾಗಿದ್ದು, ಕಾರ್ಯರೂಪಕ್ಕೆ ಬಂದಿಲ್ಲ. ಆದರೆ ಬೇರೆ ದೇಶಗಳಲ್ಲಿ ಹೀಗಿಲ್ಲ. ಪ್ರಾಣಿ ಹಿಂಸೆ ಮಾಡಿದರೆ ಅಲ್ಲಿ ನೀಡುವ ಶಿಕ್ಷೆಗಳು ಕಠಿಣವಾಗಿರುತ್ತವೆ. ಅಂತಹದ್ದೇ ಒಂದು ಘಟನೆ ಇಲ್ಲಿ ನಡೆದಿದೆ.

ಪಾಪ್ ಗಾಯಕಿ ಲೇಡಿ ಗಾಗಾ ಎಂಬುವರ ನಾಯಿ ವಾಕರ್​​ಗೆ ಗುಂಡು ಹಾರಿಸಿ ಗಾಯಗೊಳಿಸಿದ ಮೂವರಲ್ಲಿ ಒಬ್ಬ ಆರೋಪಿಗೆ ಸುಮಾರು 21 ವರ್ಷಗಳ ಕಾಲ ಜೈಲು ಶಿಕ್ಷೆ ವಿಧಿಸಲಾಗಿದೆ ಎಂದು ಲಾಸ್​ ಏಂಜಲೀಸ್ ಕೌಂಟಿ ಡಿಸ್ಟ್ರಿಕ್ಟ್​ ಅಟಾರ್ನಿ ಅಧಿಕಾರಿಗಳು ತಿಳಿಸಿದ್ದಾರೆ.

ಗುಂಡಿನ ದಾಳಿಯಿಂದಾಗಿ ನಾಯಿಯು ಗಂಭೀರವಾಗಿ ಗಾಯಗೊಂಡಿದೆ ಎಂದು ಲೇಡಿ ಗಾಗಾ ಪರ ವಕೀಲರು ಸೋಮವಾರ ಕೋರ್ಟ್​​ನಲ್ಲಿ ತಿಳಿಸಿದ್ದಾರೆ. ಕಳೆದ ವರ್ಷ ಹಾಲಿವುಡ್​​ನಲ್ಲಿ ಪಾಪ್​ ಗಾಯಕಿ ಲೇಡಿ ಗಾಗಾ ಅವರ 2 ಫ್ರೆಂಚ್​ ಬುಲ್​ಡಾಗ್​​ಗಳ ಕಳ್ಳತನದ ಸಂದರ್ಭದಲ್ಲಿ ಈ ಘಟನೆ ನಡೆದಿತ್ತು.

ಈ ನಾಯಿಗಳು ಲೇಡಿ ಗಾಗಾ ಅವರದ್ದು ಎಂದು ಮೂವರು ಶಂಕಿತರಿಗೆ ತಿಳಿದಿರಲಿಲ್ಲ ಎಂದು ಲಾಸ್ ಏಂಜಲೀಸ್ ಪೊಲೀಸರು ತಿಳಿಸಿದ್ದಾರೆ. ಫ್ರೆಂಚ್ ಬುಲ್​ಡಾಗ್​ಗಳು ಜನಪ್ರಿಯ ತಳಿಯಾಗಿದ್ದು, ಸಾವಿರಾರು ಡಾಲರ್​​ಗಳಿಗೆ ಮಾರಾಟ ಮಾಡಬಹುದು.

ಕಳೆದ ವರ್ಷ, ಟೆಕ್ಸಾಸ್‌ನಲ್ಲಿ ಫ್ರೆಂಚ್ ಬುಲ್‌ಡಾಗ್‌ನ ಅಪಹರಣ ಯತ್ನ ನಡೆದಿತ್ತು ಮತ್ತು ವಾಷಿಂಗ್ಟನ್, ಡಿ.ಸಿ.ಯಲ್ಲಿ ಮತ್ತೊಂದು ನಾಯಿಮರಿಯನ್ನು ಬಂದೂಕು ತೋರಿಸಿ ಕರೆದೊಯ್ಯಲಾಗಿತ್ತು.

ಆರೋಪಿಯನ್ನು 20 ವರ್ಷದ ಜೇಮ್ಸ್ ಹೊವಾರ್ಡ್ ಜಾಕ್ಸನ್ ಎಂದು ಗುರುತಿಸಲಾಗಿದೆ. ಈತ ಈ ಹಿಂದೆಯೂ ಸಹ ಇಂತಹದ್ದೇ ಪ್ರಕರಣಗಳಲ್ಲಿ ಭಾಗಿಯಾಗಿದ್ದ ಎಂದು ತಿಳಿದು ಬಂದಿದೆ. ಫೆಬ್ರವರಿ 2021 ರಲ್ಲಿ, ಜಾಕ್ಸನ್ ಮತ್ತು ಇತರ ಇಬ್ಬರು- 21 ವರ್ಷದ ಜೈಲಿನ್ ಕೀಶಾನ್ ವೈಟ್ ಮತ್ತು 28 ವರ್ಷದ ಲಫಯೆಟ್ಟೆ ಶೋನ್ ವೇಲಿ - ಫಿಶರ್​ನ್ನು ಭೇಟಿ ಮಾಡಿ, ಅವರ ಮೂರು ಫ್ರೆಂಚ್ ಬುಲ್​​ಡಾಗ್​ಗಳನ್ನು ಕದಿಯಲು ಪ್ರಯತ್ನಿಸಿದ್ದರು.

ಆರೋಪಿ ಜಾಕ್ಸನ್ ಕ್ಯಾಲಿಬರ್ ಹ್ಯಾಂಡ್‌ಗನ್‌ನಿಂದ ಫಿಶರ್‌ನನ್ನು ಹೊಡೆದನು. ಜಾಕ್ಸನ್ ಮತ್ತು ಅವನ ಸಹಚರರು ಫಿಶರ್ ಜೊತೆ ಹೋಗುತ್ತಿದ್ದ ಮೂರು ನಾಯಿಗಳಲ್ಲಿ ಎರಡನ್ನು ಹಿಡಿದುಕೊಂಡು ವಾಹನವನ್ನು ಹತ್ತಿ ಪರಾರಿಯಾಗಿದ್ದರು.

ಲೇಡಿ ಗಾಗಾ $500,000 ಬಹುಮಾನವನ್ನು ನೀಡಿದ ನಂತರ, 52 ವರ್ಷದ ಜೆನ್ನಿಫರ್ ಮ್ಯಾಕ್‌ಬ್ರೈಡ್ ಸ್ಥಳೀಯ ಪೊಲೀಸ್ ಠಾಣೆಗೆ ನಾಯಿಗಳನ್ನು ಹಿಂದಿರುಗಿಸಿದರು.

ಈ ಪ್ರಕರಣದಲ್ಲಿ ಗುಂಡು ಹಾರಿಸಿದ ವ್ಯಕ್ತಿಗೆ 21 ವರ್ಷ ಜೈಲು ಶಿಕ್ಷೆಯಾಗಿರುವುದರಿಂದ ಕಳೆದ ವರ್ಷ ಇದೇ ರೀತಿಯ ಇನ್ನಷ್ಟು ನಾಯಿ ಕಳ್ಳತನ ಪ್ರಕರಣಗಳಲ್ಲಿ ಭಾಗಿಯಾಗಿರುವ ಅಪರಾಧಿಗಳಿಗೆ ಯಾವ ರೀತಿಯ ಶಿಕ್ಷೆಯಾಗಲಿದೆ ಎಂಬ ಚರ್ಚೆ ನಡೆಯುತ್ತಿದೆ.

ಲೇಡಿ ಗಾಗಾ ನೀಡಿದ ದೂರಿನನ್ವಯ ಪೊಲೀಸರು ತನಿಖೆ ನಡೆಸಿ ಕೆಲವು ದಿನಗಳ ನಂತರ ಅಪರಾಧಿಗಳನ್ನು ಹಿಡಿದಿದ್ದಾರೆ. ಎಲ್ಲಾ ಮೂರು ನಾಯಿಗಳನ್ನು ವಶಪಡಿಸಿಕೊಳ್ಳಲಾಗಿದೆ ಮತ್ತು ಗಾಯಗೊಂಡ ವಾಕರ್ ಅನ್ನು ಆಸ್ಪತ್ರೆಗೆ ಕರೆದೊಯ್ಯಲಾಗಿದೆ.