VIP Tree: ಅಬ್ಬಾ! ಈ ಮರಕ್ಕೆ ಸಿಕ್ತಿದೆ ವಿಐಪಿ ಭದ್ರತೆ! ರಕ್ಷಣೆಗೆ 24 ಗಂಟೆ ಪೊಲೀಸ್ ಕಾವಲು, ತಿಂಗಳಿಗೆ ಬರೋಬ್ಬರಿ 1 ಲಕ್ಷ ಖರ್ಚು!

ಸಿಎಂ, ಪಿಎಂ, ಮಂತ್ರಿಗಳು, ರಾಜಕಾರಣಿಗಳು ಹಾಗೂ ಸೆಲೆಬ್ರೆಟಿಗಳಿಗೆ ಭದ್ರತೆ ನೀಡುವುದನ್ನ ನೀವು ನೋಡಿರುತ್ತೀರಾ ಅಥವಾ ಕೇಳಿರುತ್ತೀರಾ. ಆದರೆ ಮರವೊಂದಕ್ಕೆ ದಿನದ 24 ಗಂಟೆಗಳು ಭದ್ರತೆ ನೀಡಲಾಗುತ್ತಿದೆ. ಇದು ಆಶ್ಚರ್ಯವೆನಿಸಿದರೂ ಸತ್ಯ. ಮಧ್ಯಪ್ರದೇಶದಲ್ಲಿ ಭೋಪಾಲ್​ ಮತ್ತು ವಿಧಿಶಾ ಮಧ್ಯೆ ಸಾಲ್ಮತ್​ಪುರ್​ ಎಂಬಲ್ಲಿ ಒಂದು ಅರಳಿ ಮರಕ್ಕೆ ಪೊಲೀಸ್​ ಭದ್ರತೆ ಒದಗಿಸಲಾಗುತ್ತಿದೆ.

ಮಧ್ಯಪ್ರದೇಶ ಸರ್ಕಾರವೇ ಈ ಬೋಧಿ ಮರ ಅಥವಾ ಅರಳಿ ಮರಕ್ಕೆ ವಿಐಪಿ ಭದ್ರತೆ ನೀಡುತ್ತಿದೆ. ಮಧ್ಯಪ್ರದೇಶ ರಾಜಧಾನಿ ಭೋಪಾಲ್ ಹಾಗೂ ವಿಧಿಶಾ ನಗರಗಳ ನಡುವೆ ಇರುವ ಯುನೆಸ್ಕೋ ವಿಶ್ವ ಪಾರಂಪರಿಕ ತಾಣವಾದ ಸಾಂಚಿ ಬುದ್ಧಿಸ್ಟ್ ಕಾಂಪ್ಲೆಕ್ಸ್​ಗೆ 5 ಕಿ.ಮೀ ದೂರದಲ್ಲಿ ಈ ಅರಳಿ ಮರ ಇದೆ

ಈ ಅರಳಿ ಮರವನ್ನು ಸೆಪ್ಟೆಂಬರ್​ 21, 2012ರಲ್ಲಿ ಆಗಿನ ಶ್ರೀಲಂಕಾ ಅಧ್ಯಕ್ಷ ಮಹಿಂದಾ ರಾಜಪಕ್ಷ ಇಲ್ಲಿ ನೆಟ್ಟಿದ್ದರು. ಬೌದ್ದ ಧರ್ಮದಲ್ಲಿ ಬೋಧಿ ವೃಕ್ಷವನ್ನು ಪವಿತ್ರವಾದ ಮರವೆಂದು ಭಾವಿಸಲಾಗುತ್ತದೆ. ಹಾಗಾಗಿ ಈ ಮರವನ್ನು ತುಂಬಾ ಜಾಗೃತವಾಗಿ ನೋಡಿಕೊಳ್ಳಲಾಗುತ್ತಿದೆ.

ಶ್ರೀಲಂಕಾದ ಅಧ್ಯಕ್ಷರು ಈ ಗಿಡವನ್ನು ನೆಟ್ಟಾಗ, ಅವರೊಂದಿಗೆ ಮುಖ್ಯಮಂತ್ರಿ ಶಿವರಾಜ್ ಸಿಂಗ್ ಚೌಹಾಣ್​ ಕೂಡ ಇದ್ದರು. ಹಾಗಾಗಿ ಮಧ್ಯಪ್ರದೇಶ ಸರ್ಕಾರವು ಈ ಮರದ ರಕ್ಷಣೆಗಾಗಿ ಪ್ರತಿವರ್ಷ 12 ಲಕ್ಷ ರೂಪಾಯಿಗಳನ್ನು ವ್ಯಯಿಸುತ್ತಿದೆ.

ಈ ಮರವನ್ನು ರಕ್ಷಿಸಲು 15 -ಅಡಿ ಬೇಲಿಯನ್ನು ನಿರ್ಮಿಸಲಾಗಿದೆ. ಭದ್ರತಾ ಸಿಬ್ಬಂದಿಯನ್ನು 24 ಗಂಟೆಗಳ ಕಾಲ ರಕ್ಷಣೆಗಾಗಿ ನೇಮಿಸಲಾಗಿದೆ.

ಸಾಂಚಿ ಪುರಸಭೆ, ಪೊಲೀಸ್, ಆದಾಯ ಮತ್ತು ತೋಟಗಾರಿಕೆ ವಿಭಾಗಗಳು ಯಾವಾಗಲೂ ಇದರ ಮೇಲೆ ಗಮನ ಇಟ್ಟಿರುತ್ತವೆ. ಇದನ್ನು ಪ್ರತಿ 15 ದಿನಗಳಿಗೊಮ್ಮೆ ಕೃಷಿ ತಜ್ಞರಿಂದ ಪರೀಕ್ಷೆ ಮಾಡಿಸಲಾಗುತ್ತದೆ. ಅದಕ್ಕೆ ತಕ್ಕಂತೆ ರಸಗೊಬ್ಬರ ಮತ್ತು ನೀರನ್ನು ಒದಗಿಸುತ್ತದೆ.

ಬೌದ್ಧ ಧರ್ಮದ ಸಂಸ್ಥಾಪಕ ಗೌತಮ ಬುದ್ಧನಿಗೆ ಬೋಧಿ ಮರದ ಕೆಳಗೆ ಜ್ಞಾನೋದಯವಾಯಿತು ಎಂಬ ನಂಬಿಕೆಯಿದೆ. ಇನ್ನೂ ಅಶೋಕ ಚಕ್ರವರ್ತಿಗೆ ಶಾಂತಿಯ ಹಾದಿಯನ್ನು ತೋರಿಸುವಲ್ಲಿ ಬೋಧಿ ಮರವೂ ಪ್ರಮುಖ ಪಾತ್ರವನ್ನು ವಹಿಸಿದೆ. ಈ ಸ್ಥಳವು ಪ್ರಸಿದ್ಧ ಪ್ರವಾಸಿ ತಾಣವಾಗಿದ್ದು, ಸಾಂಚಿಯಿಂದ 8 ಕಿ.ಮೀ ದೂರದಲ್ಲಿದ್ದು, ಜನರು ಮರವನ್ನು ನೋಡಲು ಇಲ್ಲಿಗೆ ಆಗಮಿಸುತ್ತಿರುತ್ತಾರೆ.