Switzerland: ಈ ದೇಶದ ಇಂತಹ ಗ್ರಾಮದಲ್ಲಿ ನೀವು ಇದ್ರೆ, ನಿಮಗೆ ಸಿಗುತ್ತೆ ಕೋಟಿಗಟ್ಟಲೆ ಹಣ!

ಸ್ವಿಜರ್ಲ್ಯಾಂಡ್ ಅಂದ್ರೆ ಯಾರಿಗೆ ತಾನೆ ಇಷ್ಟ ಇಲ್ಲ ಹೇಳಿ? ಹನಿಮೂನ್ ಸ್ಪಾಟ್ ಅಂತಲೇ ಹೇಳಬಹುದು ಇದನ್ನ. ಇಲ್ಲಿನ ವಾತಾವರಣ, ಸ್ವಚ್ಛತೆ, ಪ್ರವಾಸಿ ತಾಣಗಳು ಎಲ್ಲವೂ ಪ್ರವಾಸಿಗರನ್ನು ಆಕರ್ಷಿಸುತ್ತದೆ.

ಆದರೆ, ಎಲ್ಲರಿಗೂ ಎಲ್ಲಿಗೆ ತೆರಳಲು ಅಸಾಧ್ಯ. ಯಾಕೆಂದ್ರೆ ಆರ್ಥಿಕ ಸಮಸ್ಯೆ. ಲಕ್ಷಗಟ್ಟಲೆ ಹಣ ಬೇಕಾಗುತ್ತದೆ ಎಂದೇ ಅದೆಷ್ಟೋ ಜನರು ತಮ್ಮ ಆಸೆಗಳನ್ನು ಬಚ್ಚಿಟ್ಟು ಸುಮ್ಮನೆ ಇರುತ್ತಾರೆ. ಆದರೆ, ನಿಮಗಾಗಿ ಒಂದು ಗುಡ್ ನ್ಯೂಸ್!

ಸ್ವಿಜರ್ಲ್ಯಾಂಡ್‌ನ ಈ ಗ್ರಾಮದಲ್ಲಿ ನೆಲೆಸಿದ್ರೆ ನಿಮಗೆ ಸಿಗುತ್ತೆ ಕೋಟಿ ಕೋಟಿ ಹಣ. ಎಸ್, ಸುಳ್ಳಲ್ಲ ಕಣ್ರೀ, ಯಾಕೆ, ಏನು ಅಂತ ಯೋಚನೆ ಮಾಡ್ತಾ ಇದ್ದೀರ? ಇಲ್ಲಿದೆ ಇದರ ಸಂಪೂರ್ಣ ವಿವರ.

ಸ್ವಿಜರ್ಲ್ಯಾಂಡ್‌ನ ವಲೈಸ್ ಕ್ಯಾಂಟನ್‌ನಲ್ಲಿರುವ ಅಲ್ಬಿನೆನ್ (Albinen) ಗ್ರಾಮವು ಈ ಅವಕಾಶ ನೀಡ್ತಿದೆ. ಸುಂದರವಾದ ಪರ್ವತ ಕಣಿವೆಯ (Mountain Valley) ಹಳ್ಳಿಗೆ ನಿಮ್ಮ ಕುಟುಂಬದೊಡನೆ ಸ್ಥಳಾಂತರಿಸಲು ಒಂದು ಅನನ್ಯ ಅವಕಾಶವನ್ನು ನೀಡುತ್ತಿದೆ. ಈ ಗ್ರಾಮವು ಸಮುದ್ರ ಮಟ್ಟದಿಂದ 4,265 ಅಡಿ ಎತ್ತರದಲ್ಲಿದ್ದು, ಮತ್ತು ಹಿಮದಿಂದ ಆವೃತವಾದ ಶಿಖರಗಳ ಸುಂದರ ಅನುಭವ ನೀಡುತ್ತದೆ.

ಈ ಗ್ರಾಮದಲ್ಲಿದ್ದ ಹೆಚ್ಚಿನ ನಿವಾಸಿಗರು ಸುತ್ತಮುತ್ತಲಿನ ನಗರಗಳಲ್ಲಿ ಸೆಟಲ್‌ ಆಗಲು ಗ್ರಾಮೀಣ ಸಮುದಾಯವನ್ನು ತೊರೆಯುತ್ತಿರುವುದರಿಂದ ಸಣ್ಣ ಹಳ್ಳಿಯು ಜನಸಂಖ್ಯೆಯ ಕೊರತೆಯ ಭೀತಿಯನ್ನು ಎದುರಿಸುತ್ತಿದೆ.

ಇದರಿಂದಾಗಿ ಗ್ರಾಮವನ್ನು ಖಾಲಿಯಾಗದಂತೆ ತಡೆಯಲು ಆಲ್ಬಿನೆನ್‌ಗೆ ತೆರಳಲು ಕುಟುಂಬಗಳಿಗೆ £50,000 (₹50 ಲಕ್ಷ) ಕ್ಕಿಂತ ಹೆಚ್ಚು ಪಾವತಿಸುವ ಯೋಜನೆಯನ್ನು 2018 ರಲ್ಲೇ ಪ್ರಾರಂಭಿಸಿದೆ. 50 ಲಕ್ಷ ಅಷ್ಟೇ ಅಲ್ಲ. ನಾಲ್ವರನ್ನು ಒಳಗೊಂಡ ಕುಟುಂಬದ ಪ್ರತಿ ವಯಸ್ಕರಿಗೆ 25,000 ಸ್ವಿಸ್ ಫ್ರಾಂಕ್‌ಗಳನ್ನು (₹22.5 ಲಕ್ಷ) ಮತ್ತು ಪ್ರತಿ ಮಗುವಿಗೆ ಇನ್ನೂ 10,000 ಸ್ವಿಸ್ ಫ್ರಾಂಕ್‌ಗಳನ್ನು (₹9 ಲಕ್ಷ)ವನ್ನು ನೀಡುತ್ತಾರೆ ಎಂದು ತಿಳಿದುಬಂದಿದೆ.

ಈ ಯೋಜನೆಯು ಸಿ ನಿವಾಸದ ಪರವಾನಿಗೆ ಹೊಂದಿರುವ ಸ್ವಿಸ್ ಪ್ರಜೆಗಳಿಗೆ ಮತ್ತು EU ಅಥವಾ ಯುರೋಪಿಯನ್ ಫ್ರೀ ಟ್ರೇಡ್ ಅಸೋಸಿಯೇಷನ್ ದೇಶಗಳ ನಾಗರಿಕರಿಗೆ ಮತ್ತು US ಹಾಗೂ ಕೆನಡಾದ ನಾಗರಿಕರಿಗೆ ಮುಕ್ತವಾಗಿದೆ. ಅವರು ಐದು ವರ್ಷಗಳ ಕಾಲ ಸ್ವಿಟ್ಜರ್ಲೆಂಡ್‌ನಲ್ಲಿ ವಾಸಿಸಿದ ನಂತರ ಈ ಪರವಾನಗಿಯನ್ನು ಪಡೆಯಬಹುದು.

ಅರ್ಜಿದಾರರು 45 ವರ್ಷಕ್ಕಿಂತ ಕಡಿಮೆ ವಯಸ್ಸಿನವರಾಗಿರಬೇಕು ಮತ್ತು ಕನಿಷ್ಠ ಹತ್ತು ವರ್ಷಗಳ ಕಾಲ ಅಲ್ಬಿನೆನ್‌ ಗ್ರಾಮದಲ್ಲಿ ಕನಿಷ್ಠ 200,000 ಸ್ವಿಸ್ ಫ್ರಾಂಕ್‌ಗಳ (₹1.8 ಕೋಟಿ) ಮೌಲ್ಯದ ಮನೆಯಲ್ಲಿ ವಾಸಿಸಲು ಒಪ್ಪಿಕೊಳ್ಳಬೇಕು. ಇನ್ನು, ಒಬ್ಬ ವ್ಯಕ್ತಿಯು 10 -ವರ್ಷದ ಅವಧಿಗೆ ಮುಂಚೆಯೇ ಹೋದರೆ, ಅವರು £50,000 ಹಣವನ್ನು ಮರುಪಾವತಿಸಬೇಕಾಗುತ್ತದೆ. ಅವಶ್ಯಕತೆಗಳು ಕಟ್ಟುನಿಟ್ಟಾಗಿ ತೋರುತ್ತದೆಯಾದರೂ, ಸ್ವಿಟ್ಜರ್ಲೆಂಡ್‌ನಲ್ಲಿ ವಾಸಿಸುವ ಪ್ರಯೋಜನಗಳು ಹಲವಾರು.

ಅಲ್ಬಿನೆನ್ ಗ್ರಾಮವು ಒಳ್ಳೆಯ ಗಾಳಿಯನ್ನು ಜನರಿಗೆ ಕೊಡುತ್ತದೆ. ಒಳ್ಳೆಯ ಸೂರ್ಯನ ಬೆಳಕು ಮತ್ತು ಪ್ರಶಾಂತ ವಾತಾವರಣವನ್ನು ಹೊಂದಿದೆ. ಆದರೆ, ಒಂದು ಕುಟುಂಬಕ್ಕೆ ಒಂದು ಮನೆಗೆ ಮಾತ್ರ ಅವಕಾಶವಿದ್ದು, ಎರಡನೇ ಮನೆ ಮತ್ತು ಹೂಡಿಕೆದಾರರ ಗುಂಪುಗಳ ದೊಡ್ಡ ವಸತಿಗಳು ಈ ಗ್ರಾಮದಲ್ಲಿ ಅನುಮತಿಸಲಾಗುವುದಿಲ್ಲ.