Coffee: ಬೆಳಗಾಗೆದ್ದು ಕಾಫಿ ಕುಡೀತೀರಾ? ಖಾಲಿ ಹೊಟ್ಟೆಯಲ್ಲಿ ಕಾಫಿ ಕುಡಿದರೆ ಏನಾಗುತ್ತೆ ಗೊತ್ತಾ?

ಖಾಲಿ ಹೊಟ್ಟೆಯಲ್ಲಿ ಕಾಫಿ ಕುಡಿಯುವುದು ಅಷ್ಟು ಒಳ್ಳೆಯದಲ್ಲ ಅಂತಾರೆ ವೈದ್ಯರು. ಕಾಫಿಯೊಳಗಿನ ಕೆಫೀನ್ ನಿಮ್ಮ ಮೆದುಳನ್ನು ಕೂಡಲೇ ಚಾರ್ಜ್ ಮಾಡುತ್ತದೆ ನಿಜ. ಆದರೆ ನಮ್ಮ ಹೊಟ್ಟೆ ಸುಮಾರು ಏಳೆಂಟು ಗಂಟೆಗಳ ಕಾಲ ಖಾಲಿ ಇರೋದ್ರಿಂದ ಮೊದಲು ಕಾಫಿಯೇ ಬಿದ್ದರೆ ಇಡೀ ದಿನದ ಜೀರ್ಣಕ್ರಿಯೆ ನಿಧಾನವಾಗಬಹುದು ಎನ್ನಲಾಗಿದೆ.

ಇನ್ನು ಊಟ ಮತ್ತು ತಿಂಡಿಯ ಮುಂಚೆ ಮತ್ತು ನಂತರ ಕೂಡಾ ಕಾಫಿ ಕುಡಿಯುವ ಅಭ್ಯಾಸ ಅನೇಕರಿಗೆ ಇರುತ್ತದೆ. ತಿಂಡಿ ಜೊತೆಗೆ ಕಾಫಿ, ಅಥವಾ ತಿಂಡಿ ಆದ ಕೂಡಲೇ ಕಾಫಿ ಕುಡಿಯುತ್ತಾರೆ.

ಇದು ಮಾತ್ರ ಸ್ವಲ್ಪವೂ ಒಳ್ಳೆಯದಲ್ಲ ಎನ್ನುತ್ತಾರೆ ವೈದ್ಯರು. ಕಾಫಿ ಮತ್ತು ಟೀ ಎರಡೂ ಊಟ ತಿಂಡಿಯ ಜೊತೆಗೆ ಸೇವಿಸಿದರೆ ಅದು ಆ ಆಹಾರದ ಪೌಷ್ಟಿಕಾಂಶವನ್ನು ದೇಹ ಹೀರಿಕೊಳ್ಳುವುದನ್ನು ತಡೆಯುತ್ತದೆ ಎನ್ನಲಾಗಿದೆ.

ಹಾಗಾಗಿ ಕಾಫಿ ಅಥವಾ ಟೀಯನ್ನು ಕುಡಿಯುವಾಗ ಅದನ್ನು ಯಾವ ಸಂದರ್ಭದಲ್ಲಿ ಕುಡಿಯುತ್ತೇವೆ ಎನ್ನುವ ಬಗ್ಗೆ ಗಮನ ಹರಿಸಬೇಕು. ಬಹುಶಃ ಬೆಳಗ್ಗೆ ಸ್ವಲ್ಪ ತಿಂಡಿ ಸೇವಿಸಿ ಸ್ವಲ್ಪ ಸಮಯದ ನಂತರ ಕಾಫಿ ಕುಡಿಯುವುದು ಇದ್ದುದರಲ್ಲಿ ಒಳ್ಳೆಯ ಆಯ್ಕೆ.

ಆದರೆ ವ್ಯಾಯಾಮ ಮಾಡುವ ಕೆಲ ಸಮಯದ ಮುನ್ನ ಕಾಫಿ ಕುಡಿದರೆ ಹೆಚ್ಚು ಶಕ್ತಿ ಬಂದಂತಾಗುತ್ತದೆ ಎಂದು ಕೆಲ ಕ್ರೀಡಾಪಟುಗಳು ಹೇಳುತ್ತಾರೆ. ಆಗ ದೇಹದೊಳಗೆ ಹೋದ ಹೆಚ್ಚುವರಿ ಕ್ಯಾಲೊರಿ ಕೂಡಾ ಕರಗಿ ಹೋಗೋದ್ರಿಂದ ಹಾನಿಯಿಲ್ಲ ಎನ್ನುವುದು ಅವರ ಲೆಕ್ಕಾಚಾರ.

ಇನ್ನು ರಾತ್ರಿ ಮಲಗುವ ಮುನ್ನ ಕಾಫಿ ಕುಡಿಯುವವರದ್ದೊಂದು ಗುಂಪು. ಇದನ್ನು ಮಾತ್ರ ನೀವು ಎಷ್ಟು ಬೇಗ ಬಿಡುತ್ತೀರೋ ಅಷ್ಟು ಒಳ್ಳೆಯದು ಎನ್ನುತ್ತಾರೆ ವೈದ್ಯರು. ರಾತ್ರಿ ಮಲಗುವ ಮುನ್ನ ಕಾಫಿ ಮತ್ತು ಟೀ ಎರಡೂ ಅಪಾಯಕಾರಿ. ಇವು ನಿದ್ರೆ ನಿಮ್ಮ ಬಳಿ ಸುಳಿಯದಂತೆ ಮಾಡಿಬಿಡುತ್ತವೆ.

ಹಾಗಾದ್ರೆ ಬೆಳಗ್ಗೆ ಎದ್ದ ಕೂಡಲೇ ಕಾಫಿಯ ಬದಲು ಬೇರೆ ಏನನ್ನು ಕುಡಿಯಬಹುದು ಎಂದರೆ ಅದಕ್ಕೆ ನಾನಾ ಆಯ್ಕೆಗಳಿವೆ. ಕಷಾಯ, ಹಾಲು ಅಥವಾ ಬರೀ ಬಿಸಿನೀರು ಕೂಡಾ ಒಳ್ಳೆಯದೇ.

ಕುಡಿದಾಗ ಖುಷಿ ಎನಿಸಿದ್ರೂ ಕಾಫಿ ಆರೋಗ್ಯಕ್ಕೆ ಪ್ರಯೋಜನವನ್ನೇನೂ ಮಾಡಲ್ಲ. ಆದ್ದರಿಂದ ಕಾಫಿ ಮತ್ತು ಟೀ ಎರಡನ್ನೂ ಆದಷ್ಟು ಕಡಿಮೆ ಕುಡಿದರೆ ಒಳ್ಳೆಯದು ಎನ್ನುತ್ತಾರೆ ವೈದ್ಯರು.