Intresting Facts: ಮಹಿಳೆಯರ ಶರ್ಟ್​​, ಟೀಶರ್ಟ್​​ಗಳಲ್ಲಿ ಪಾಕೆಟ್​​ಗಳು ಏಕೆ ಇರುವುದಿಲ್ಲ ಗೊತ್ತಾ? ಇಲ್ಲಿದೆ ಇಂಟ್ರೆಸ್ಟಿಂಗ್​​ ಸ್ಟೋರಿ

ಬಟ್ಟೆಯಲ್ಲಿ ಪಾಕೆಟ್ಸ್ ಇರುವುದು ಜನರಿಗೆ ಬಹಳಷ್ಟು ಕೆಲಸವನ್ನು ಸುಲಭಗೊಳಿಸುತ್ತದೆ. ಈ ಪಾಕೆಟ್​​ಗಳಿದ್ದರೆ ಸಣ್ಣ ವಸ್ತುಗಳನ್ನು ಇಡಲು ಪ್ರತ್ಯೇಕ ಚೀಲವನ್ನು ನೇತುಹಾಕುವ ಅಗತ್ಯವಿಲ್ಲ. ಇನ್ನು ಯಾವುದೇ ಮೊಬೈಲ್​, ಪೆನ್​, ಟೆವೆಲ್ ಈ ರೀತಿಯ ವಸ್ತುಗಳನ್ನು ಇಡಲು ಪಾಕೆಟ್​ಗಳು ಬಹಳ ಸಹಕಾರಿಯಾಗುತ್ತದೆ.

ಆದರೆ ಈ ಶರ್ಟ್​ಗಳಲ್ಲಿ ಪಾಕೆಟ್​ಗಳನ್ನು ಪುರುಷರಿಗೆ ಮಾತ್ರ ಏಕೆನೀಡಲಾಗುತ್ತದೆ, ಮಹಿಳೆಯರಿಗೆ ಏಕೆ ನೀಡುವುದಿಲ್ಲ ಎಂದು ನೀವು ಎಂದಾದರೂ ಯೋಚಿಸಿದ್ದೀರಾ?  ಆದರೆ ಇದಕ್ಕೂ ಕೆಲವೊಂದು ಕಾರಣಗಳಿವೆ.

ಪುರುಷರ ಶರ್ಟ್, ಪ್ಯಾಂಟ್, ಜೀನ್ಸ್, ಶಾರ್ಟ್ಸ್ ಮತ್ತು ಟೀ ಶರ್ಟ್‌ಗಳಲ್ಲಿ ಪಾಕೆಟ್‌ಗಳನ್ನು ತಯಾರಿಸಲಾಗುತ್ತದೆ, ಆದರೆ ಮಹಿಳೆಯರ ಶರ್ಟ್‌ಗಳಲ್ಲಿ ಟೀಶರ್ಟ್​ಗಳಲ್ಲಿ ಪಾಕೆಟ್‌ಗಳೇ ಇರುವುದಿಲ್ಲ. ಅವರ ಇತರೆ ಬಟ್ಟೆಗಳಿಗೂ ಪಾಕೆಟ್‌ಗಳ ಕೊರತೆಯಿದೆ. ಇನ್ನು ಪಾಕೆಟ್​ ಇಲ್ಲದ ಹುಡುಗಿಯರ ಜೀನ್ಸ್‌ಗಳನ್ನು ನಾವೆಲ್ಲರು ಸಾಕಷ್ಟು ನೋಡಿರುತ್ತೇವೆ. ಆದರೆ ಇದರ ಹಿಂದೆ ಯಾವುದೇ ವೈಜ್ಞಾನಿಕ ಕಾರಣವಿಲ್ಲ. ಹಿಂದಿನವರ ನಂಬಿಕೆ ಮತ್ತು ಪುರುಷರ ಪ್ರಾಬಲ್ಯದಿಂದ ಈ ಪದ್ದತಿಯನ್ನು ತರಲಾಗಿದೆ.

ಪಾಕೆಟ್​ ಬದಲಿಗೆ ಚೀಲ: ಶತಮಾನಗಳ ಹಿಂದೆ ಪುರುಷರು ಮತ್ತು ಮಹಿಳೆಯರು ಇಬ್ಬರೂ ತಮ್ಮ ಸೊಂಟ ಅಥವಾ ಮೇಲಿನ ಭಾಗದಲ್ಲಿ ಚೀಲಗಳಂತಹ ವಸ್ತುಗಳನ್ನು ನೇತುಹಾಕುತ್ತಿದ್ದರು. ಇನ್ನು ಅದರಲ್ಲಿ ತಮಗೆ ಬೇಕಾದ ವಸ್ತುಗಳನ್ನು ಇಡುತ್ತಿದ್ದರು. ಆದರೆ ಸುಮಾರು 400 ವರ್ಷಗಳ ನಂತರ, ಪುರುಷರ ಬಟ್ಟೆಗಳಲ್ಲಿ ಪಾಕೆಟ್‌ಗಳನ್ನು ಹೊಲಿಯಲು ಆರಂಭಿಸಿದ್ದರು. ನಂತರದಲ್ಲಿ ಪುರುಷರ ಬಟ್ಟೆಗಳಲ್ಲಿ ಪಾಕೆಟ್​​ಗಳ ಪದ್ಧತಿ ಆರಂಭವಾಯಿತು.

ಆದರೆ ಮಹಿಳೆಯರ ಬಟ್ಟೆಯಲ್ಲಿ ಈ ಬದಲಾವಣೆ ಮಾಡಿಲ್ಲ. ಹೆಣ್ಣಿನ ದೇಹಾಕಾರ ಕೆಟ್ಟದಾಗಿ ಕಾಣಬೇಕು ಎಂದು ಅಂದಿನ ಪುರುಷರು ಬಯಸದೇ ಇರುವುದೇ ಇದಕ್ಕೆ ದೊಡ್ಡ ಕಾರಣ ಎನ್ನಲಾಗಿದೆ. ಪಾಕೆಟ್ ಹೊಂದಿದ್ದರೆ ಆಕೆ ಅದರೊಳಗೆ ಏನನ್ನಾದರೂ ವಸ್ತುಗಳನ್ನು ಇಡುತ್ತಾರೆ. ಆದ್ದರಿಂದ ದೇಹವು ಆಕಾರವಿಲ್ಲದೆ ಕಾಣಿಸಿಕೊಳ್ಳಬಹುದು. ಇದಕ್ಕಾಗಿಯೇ ಪಾಕೆಟ್​​ಗಳನ್ನು ಅಳವಡಿಸಿಲ್ಲ ಎಂದಿದ್ದಾರೆ.

ಎರಡನೆಯ ಕಾರಣವೆಂದರೆ ಆ ಕಾಲದ ಪುರುಷರು ಮಹಿಳೆಯರನ್ನು ದುರ್ಬಲರನ್ನಾಗಿ ಮಾಡಲು ಬಯಸಿದ್ದರು. ಇದೇ ಕಾರಣಕ್ಕೆ ಮಹಿಳೆಯರ ಬಟ್ಟೆಯಲ್ಲಿ ಪಾಕೆಟ್​​ಗಳನ್ನು ನೀಡಲಿಲ್ಲ ಎಂದು ವರದಿಯೊಂದು ಹೇಳುತ್ತದೆ. ಮಹಿಳೆಯರ ಬಟ್ಟೆಯಲ್ಲಿ ಪಾಕೆಟ್ ಸಹ ಕೊಟ್ಟರೆ ಕಳ್ಳತನ, ಲೂಟಿಯ ಭಯವಿಲ್ಲದೆ ನಿರ್ಭಯವಾಗಿ ಎಲ್ಲಿಗೆ ಬೇಕಾದರೂ ಹೋಗಿಬರುತ್ತಾರೆ. ಆದರೆ ಹೆಂಗಸರು ಇಷ್ಟು ಆರಾಮವಾಗಿ ಎಲ್ಲಿಗಾದರೂ ಬಂದು ಹೋಗುವುದು ಗಂಡಸರಿಗೆ ಇಷ್ಟವಿರಲಿಲ್ಲ, ಇದರಿಂದಾಗಿ ಅವರ ಬಟ್ಟೆಯಲ್ಲಿ ಪಾಕೆಟ್​ಗಳನ್ನು ನೀಡುತ್ತಿರಲಿಲ್ಲ.

ಇವೆಲ್ಲಾ ಹಿಂದಿನ ಪದ್ಧತಿಯಾದರೂ, ಈಗಲೂ ಈ ಪದ್ಧತಿ ಅಸ್ತಿತ್ವದಲ್ಲಿದೆ. ಆದರೆ ಕೆಲವರು ತಮ್ಮ ಬಟ್ಟೆಗಳಲ್ಲಿ ಪಾಕೆಟ್​​​ಗಳನ್ನು ಅಳವಡಿಸಿದ್ರೆ ಇನ್ನೂ ಕೆಲವರು ಅಳವಡಿಸದೇ ಇರುತ್ತಾರೆ. ಆದರೆ ಈಗಲೂ ಹೆಚ್ಚಾಗಿ ಮಹಿಳೆಯರ ಶರ್ಟ್​ಗಳು, ಟೀಶರ್ಟ್​​ಗಳು ಪಾಕೆಟ್​​​ ಇಲ್ಲದೆಯೇ ಬರುತ್ತದೆ.

ಆದರೆ ಈಗಿನ ಮಹಿಳೆಯರ ಕೆಲವೊಂದು ಬಟ್ಟೆಗಳಲ್ಲಿ ನಾವು ಪಾಕೆಟ್​ಗಳನ್ನು ನೋಡಬಹುದಾಗಿದೆ. ಏಕೆಂದರೆ ಕೆಲವೊಂದು ಬಟ್ಟೆಗಳಲ್ಲಿ ಈಗ ಪಾಕೆಟ್​​ಗಳನ್ನು ಇರುವುದೇ ಒಂದು ಟ್ರೆಂಡ್ ಆಗಿಬಿಟ್ಟಿದೆ. ಆದ್ದರಿಂದ ಕೆಲವರ ಬಟ್ಟೆಗಳಲ್ಲಿ ಪಾಕೆಟ್​​ಗಳನ್ನು ಅಳವಡಿಸುತ್ತಾರೆ.