ಮನೆ ಕೆಲಸ ಮಾಡುವವರಿಗೆ ಅಬ್ಬಬ್ಬಾ ಎಂದರೆ ಎಷ್ಟು ಸಂಬಳ ಸಿಗಬಹುದು? ಹತ್ತರಿಂದ ಎಪ್ಪತ್ತು ಸಾವಿರ. ಹೌದು ಭಾರತದಲ್ಲಿ ಸದ್ಯಕ್ಕಂತು ಮನೆ ನೋಡಿಕೊಳ್ಳುವವರಿಗೆ ನೀಡಲಾಗುವ ವೇತನ ಇಷ್ಟೇ. ಆದರೆ ಇಲ್ಲೊಂದು ಲೈಟ್ಹೌಸ್ ಅನ್ನು ನೋಡಿಕೊಳ್ಳುವುದಕ್ಕೆ ಬರೋಬ್ಬರಿ 92 ಲಕ್ಷ ರೂ. ಸಂಬಳ ನೀಡಲಾಗುವುದು ಎಂದು ತಿಳಿಸಿದೆ. ಇಂತಹದೊಂದು ವೇತನ ನೀಡುತ್ತಿರುವುದು ಭಾರತದಲ್ಲಿ ಅಲ್ಲ. ಬದಲಾಗಿ ಅಮೆರಿಕದ ಕ್ಯಾಲಿಫೋರ್ನಿಯಾದಲ್ಲಿರುವ ಸಣ್ಣ ಬಂಗಲೆಯಲ್ಲಿ.
ಸಿಎನ್ಎನ್ ವರದಿ ಪ್ರಕಾರ, ಈಸ್ಟ್ ಬ್ರದರ್ ಲೈಟ್ ಸ್ಟೇಷನ್ ಸ್ಯಾನ್ ಪಾಬ್ಲೋ ಲೈಟ್ ಹೌಸ್ ಅನ್ನು ನೋಡಿಕೊಳ್ಳುವವರ ಅಗತ್ಯವಿದೆ. ಇದಕ್ಕಾಗಿ ಕೆಲಸಗಾರರು ಬೇಕಾಗಿದ್ದಾರೆ ಎಂದು ತಿಳಿಸಲಾಗಿದೆ. ಇಲ್ಲಿ ಕೇರ್ ಟೇಕರ್ಗೆ 130000 ಡಾಲರ್ ವೇತನ ಪಾವತಿಸಲಾಗುತ್ತದೆ. ಅಂದರೆ ಇದು ಭಾರತದ 92 ಲಕ್ಷ 65 ಸಾವಿರ ರೂ.ಗೆ ಸಮವಾಗಿರಲಿದೆ.
ಈ ಬಂಗಲೆಯನ್ನು ನೋಡಿಕೊಳ್ಳುವವರಿಗೆ ನೀಡಲಾಗುತ್ತಿರುವ ಸಾಲೆರಿ ಇದೀಗ ಸಖತ್ ಸುದ್ದಿಯಾಗುತ್ತಿದೆ. 1874 ರಲ್ಲಿ ನಿರ್ಮಿಸಲಾಗಿರುವ ಈ ಲೈಟ್ ಹೌಸ್ ಅನ್ನು ಅಮೆರಿಕದ ಕೋಸ್ಟ್ ಗಾರ್ಡ್ ಇಲಾಖೆ ನೋಡಿಕೊಳ್ಳುತ್ತಿದ್ದು, ಇಲ್ಲಿಗೆ ಇಬ್ಬರು ಕೆಲಸಗಾರರ ಅವಶ್ಯಕತೆಯಿದೆ ಎನ್ನಲಾಗಿದೆ.
ಹಾಗೆಯೇ ಈ ಲೈಟ್ಹೌಸ್ನಲ್ಲಿ ಕೆಲಸ ಗಿಟ್ಟಿಸಿಕೊಳ್ಳಲು ಕೆಲ ಅರ್ಹತೆಗಳನ್ನೂ ಕೂಡ ಹೊಂದಿರಬೇಕಾಗುತ್ತದೆ. ಈಸ್ಟ್ ಬ್ರದರ್ ಲೈಟ್ ಸ್ಟೇಷನ್ ವೆಬ್ಸೈಟ್ ಪ್ರಕಾರ ಇಲ್ಲಿನ ಕೆಲಸಗಳಿಗೆ ಅರ್ಜಿ ಸಲ್ಲಿಸುವ ಅಭ್ಯರ್ಥಿಗಳು ಹಾಸ್ಪಿಟಾಲಿಟಿ ಇಂಡಸ್ಟ್ರಿಯಲ್ಲಿ ಅನುಭವ ಹೊಂದಿರಬೇಕು. ಅಲ್ಲದೆ ಅಮೆರಿಕನ್ ಕೋಸ್ಟ್ ಗಾರ್ಡ್ ಕಮರ್ಷಿಯಲ್ ಬೋಟ್ ಆಪರೇಟರ್ ಲೈಸೆನ್ಸ್ ಪಡೆದಿರಬೇಕಾಗುತ್ತದೆ.
ಇದೊಂದು ಐತಿಹಾಸಿಕ ಕಟ್ಟಡ. ನಾನು ನಲವತ್ತು ವರ್ಷಗಳ ಕಾಲ ಇಲ್ಲಿ ಕಾರ್ಯ ನಿರ್ವಹಿಸಿದ್ದೇನೆ. ಪ್ರವಾಸಿಗರಿಂದ ಉತ್ತಮ ಆದಾಯ ಲಭ್ಯವಾಗುತ್ತಿದ್ದು, ಅದರ ಮೂಲಕವೇ ಇಲ್ಲಿ ಕಾರ್ಯ ನಿರ್ವಹಣೆ ನಡೆಸಲಾಗುತ್ತದೆ ಎನ್ನುತ್ತಾರೆ ಕ್ಯಾಲಿಫೋರ್ನಿಯಾದ ಟಾಮ್ ಬಟ್.
