Scam News: ಯೂಟ್ಯೂಬ್​ ಬಳಕೆದಾರರೇ ಎಚ್ಚರ! ವಿಡಿಯೋ ನೋಡಿದ್ರೂ ಹ್ಯಾಕ್ ಆಗುತ್ತೆ ಮೊಬೈಲ್​

ಇಂಟರ್ನೆಟ್ ಬಳಕೆದಾರರ ಬ್ಯಾಂಕ್ ಖಾತೆಗಳನ್ನು ಖಾಲಿ ಮಾಡಲು ಸೈಬರ್ ಕ್ರಿಮಿನಲ್‌ಗಳು ಇತ್ತೀಚೆಗೆ ಹೊಸ ಮಾರ್ಗಗಳನ್ನು ಕಂಡುಕೊಳ್ಳುತ್ತಿದ್ದಾರೆ. ಈ ಬಾರಿ ಅವರ ಕಣ್ಣು ಯೂಟ್ಯೂಬ್ ಬಳಕೆದಾರರ ಮೇಲೆ ಬಿದ್ದಿದೆ. ಇದೀಗ ಯೂಟ್ಯೂಬ್​ ವೀಕ್ಷಕರ ಡೇಟಾ ಹ್ಯಾಕ್​ ಮಾಡಲು ಮುಂದಾಗಿದ್ದಾರೆ. 

ಇತ್ತೀಚಿನ ದಿನಗಳಲ್ಲಿ ಮಾಲ್‌ವೇರ್ ಲಿಂಕ್‌ಗಳನ್ನು ಹೊಂದಿರುವ ಯೂಟ್ಯೂಬ್ ವಿಡಿಯೋಗಳು ಬಹಳಷ್ಟು ಯೂಟ್ಯೂಬ್​ನಲ್ಲಿ ಕಂಡುಬರುತ್ತಿದೆ ಎಂದು ಸೈಬರ್‌ಸೆಕ್ಯುರಿಟಿ ಸಂಶೋಧಕರು ಇತ್ತೀಚೆಗೆ ಕಂಡುಕೊಂಡಿದ್ದಾರೆ. AI ಸೈಬರ್-ಸೆಕ್ಯುರಿಟಿ ಸಂಸ್ಥೆ CloudSEK ನ ಸಂಶೋಧನೆಯ ಪ್ರಕಾರ, ಇತ್ತೀಚಿನ ದಿನಗಳಲ್ಲಿ ಯೂಟ್ಯೂಬ್ ನಲ್ಲಿ ಮಾಲ್‌ವೇರ್ ಲಿಂಕ್‌ಗಳನ್ನು ಹೊಂದಿರುವ ವಿಡಿಯೋಗಳು 200 ರಿಂದ 300 ಪಟ್ಟು ಹೆಚ್ಚಾಗಿದೆ ಎಂದು ತಿಳಿದುಬಂದಿದೆ.

Infostealer ಎಂದು ಕರೆಯಲ್ಪಡುವ ಈ ಮಾಲ್‌ವೇರ್ ಫೇಕ್​ ವೆಬ್‌ಸೈಟ್‌ಗಳು, ಡೌನ್‌ಲೋಡ್‌ಗಳು ಮತ್ತು ಯೂಟ್ಯೂಬ್ ಟ್ಯುಟೋರಿಯಲ್‌ಗಳ ಮೂಲಕ ಬಳಕೆದಾರರ ಕಂಪ್ಯೂಟರ್‌ಗಳನ್ನು ಪ್ರವೇಶಿಸುತ್ತದೆ. ಈ ಮಾಲ್‌ವೇರ್ ಕದ್ದ ಮಾಹಿತಿಯನ್ನು ಹ್ಯಾಕರ್ಸ್​​ಗಳ ಸರ್ವರ್‌ಗೆ ಕಳುಹಿಸುತ್ತದೆ. ನಂತರ ಇದು ಬಳಕೆದಾರರ ಬ್ಯಾಂಕ್ ಖಾತೆಯನ್ನು ಖಾಲಿ ಮಾಡುತ್ತದೆ.

ಹೆಚ್ಚಿನ ಅಪಾಯ: ಸೈಬರ್ ಅಪರಾಧಿಗಳು ಹೆಚ್ಚಿನ ಜನರನ್ನು ಬಲೆಗೆ ಬೀಳಿಸಲು AI- ರಚಿತ ವಿಡಿಯೋಗಳನ್ನು ಬಳಸುತ್ತಿದ್ದಾರೆ. ಇನ್ಫೋಸ್ಟೀಲರ್‌ಗಳು ಬಳಕೆದಾರರ ಕಂಪ್ಯೂಟರ್‌ಗಳಿಗೆ ಮಾಲ್‌ವೇರ್ ಕಳುಹಿಸಲು ಯೂಟ್ಯೂಬ್​ ಅನ್ನು ಬಳಸುತ್ತಾರೆ. ಕ್ಲೌಡ್‌ಸೆಕ್ ಸಂಶೋಧಕ ಪವನ್ ಕಾರ್ತಿಕ್ ಈ ಪ್ರವೃತ್ತಿಯ ಬಗ್ಗೆ ವ್ಯಕ್ತಪಡಿಸಿದ್ದಾರೆ.

ಸಾಮಾನ್ಯವಾಗಿ ಅನೇಕ ಜನರು ವಿವಿಧ ಸಾಫ್ಟ್‌ವೇರ್‌ಗಳ ಪ್ರೀಮಿಯಂ ಆವೃತ್ತಿಯನ್ನು ಪಡೆಯಲು ಬಯಸುತ್ತಾರೆ ಆದರೆ ಅದನ್ನು ಪಾವತಿಸಲು ಅವರ ಬಳಿ ಸಾಕಷ್ಟು ಹಣವಿಲ್ಲ ಅಥವಾ ಅವರು ಕ್ರ್ಯಾಕ್ಡ್ / ಮಾರ್ಪಡಿಸಿದ ಸಾಫ್ಟ್‌ವೇರ್ ಅನ್ನು ಹೇಗೆ ಡೌನ್‌ಲೋಡ್ ಮಾಡುವುದು ಎಂದು ಇಂಟರ್ನೆಟ್‌ನಲ್ಲಿ ಹುಡುಕುತ್ತಾರೆ. ವಿಶೇಷವಾಗಿ ಯೂಟ್ಯೂಬ್​ ವಿಡಿಯೋಗಳನ್ನು ವೀಕ್ಷಿಸಿದ ನಂತರ, ಆ ವಿಡಿಯೋದಲ್ಲಿ ಹೇಳಿದಂತೆ ಮಾಡುತ್ತಾರೆ. ಆದರೆ ಹ್ಯಾಕರ್‌ಗಳು ನಿಖರವಾಗಿ ಅಂತಹವರನ್ನು ಗುರಿಯಾಗಿಸಿಕೊಂಡು ಈ ರೀತಿಯ ಸ್ಕ್ಯಾಮ್​ ಅನ್ನು ಮಾಡಲು ಮುಂದಾಗಿದ್ದಾರೆ.

ಸಂಶೋಧನೆಯ ಪ್ರಕಾರ, ಸೈಬರ್ ಅಪರಾಧಿಗಳು ಕ್ರ್ಯಾಕ್ಡ್ ಸಾಫ್ಟ್‌ವೇರ್ ಡೌನ್‌ಲೋಡ್‌ಗಳು, ದುರುದ್ದೇಶಪೂರಿತ ಲಿಂಕ್‌ಗಳನ್ನು ಹೊಂದಿರುವ 5-10 ವಿಡಿಯೋಗಳನ್ನು ಪ್ರತಿ ಗಂಟೆಗೆ ಯೂಟ್ಯೂಬ್‌ನಲ್ಲಿ ಅಪ್‌ಲೋಡ್ ಮಾಡುತ್ತಿದ್ದಾರೆ. ಈ ವಿಡಿಯೋಗಳು ಮಾಲ್‌ವೇರ್​ಗಳನ್ನು ಡೌನ್‌ಲೋಡ್ ಮಾಡಲು ಬಳಕೆದಾರರನ್ನು ಪ್ರೋತ್ಸಾಹಿಸುತ್ತವೆ. ಈ ಅಪರಾಧಿಗಳು ವಿಡಿಯೋಗಳನ್ನು ಅಪ್‌ಲೋಡ್ ಮಾಡುವಾಗ ಯೂಟ್ಯೂಬ್​ ಅಲ್ಗಾರಿದಮ್‌ನಿಂದ ಗಮನಕ್ಕೆ ಬರದಂತೆ ಎಚ್ಚರಿಕೆ ವಹಿಸುತ್ತಾರೆ.

ಇವು AI ಜನರೇಟರ್ ವಿಡಿಯೋಳಾಗಿವೆ. ಆದ್ದರಿಂದ ಆ ವಿಡಿಯೋಗಳನ್ನು ಗುರುತಿಸಲು ಅಥವಾ ತೆಗೆದುಹಾಕಲು ಕಷ್ಟವಾಗುತ್ತದೆ. ನವೆಂಬರ್ 2022 ರಿಂದ ಯೂಟ್ಯೂಬ್ ವಿಡಿಯೋಗಳಲ್ಲಿ ವಿಡಾರ್, ರೆಡ್‌ಲೈನ್, ರಕೂನ್‌ನಂತಹ ಇನ್ಫೋಸ್ಟೀಲರ್ ಮಾಲ್‌ವೇರ್ ಅನ್ನು ಸಂಶೋಧಕರು ಕಂಡುಕೊಂಡಿದ್ದಾರೆ. ಈ ಮಾಲ್‌ವೇರ್ ಕ್ರೆಡಿಟ್ ಕಾರ್ಡ್ ವಿವರಗಳು, ಬ್ಯಾಂಕ್ ಖಾತೆ ಸಂಖ್ಯೆಗಳು, ಪಾಸ್‌ವರ್ಡ್‌ಗಳಂತಹ ಸೂಕ್ಷ್ಮ ಮಾಹಿತಿಯನ್ನು ಕದಿಯುತ್ತದೆ.

ಇನ್ನು ಯೂಟ್ಯೂಬ್ ಬಳಕೆದಾರರಿಗಾಗಿ ಯೂಟ್ಯೂಬ್​ನಲ್ಲಿ ಟ್ಯಟೋರಿಯಲ್​​ನಂತಹ ಹಲವಾರು ವಿಡಿಯೋಗಳಿವೆ. ಇನ್ನು ಇದನ್ನೇ ಗುರಿಯಾಗಿಸಿಕೊಂಡು ಹ್ಯಾಕರ್ಸ್​​ಗಳು ಮಾಲ್​​ವೇರ್​ ಲಿಂಕ್​ಗಳನ್ನು ಕಮೆಂಟ್​ ಬಾಕ್ಸ್​ಗಳಲ್ಲಿ ಹಾಕಿದ್ದಾರೆ. ಈ ಮೂಲಕ ಬಳಕೆದಾರರ ಡೇಟಾವನ್ನು ದೋಚಲು ಮುಂದಾಗುತ್ತಿದ್ದಾರೆ.