ಚಾರ್ಜಿಂಗ್ ವೇಳೆ ಮೊಬೈಲ್ ಸ್ಪೋಟ: ನಿಮ್ಮ ಫೋನ್​ ಕೂಡ ಬ್ಲಾಸ್ಟ್ ಆಗಬಹುದು

ಶಿಯೋಮಿ ಕಂಪನಿಯ MI A1 ಸ್ಮಾರ್ಟ್​ಫೋನ್ ಚಾರ್ಜಿಂಗ್ ವೇಳೆ ಸ್ಫೋಟಗೊಂಡಿರುವ ಘಟನೆ  ನಡೆದಿದೆ.  ಮೊಬೈಲ್​ನ್ನು ಚಾರ್ಜ್​ಗೆ ಇಟ್ಟ ವೇಳೆ ಬೆಂಕಿ ಕಾಣಿಸಿಕೊಂಡು ಬ್ಲಾಸ್ಟ್​ ಆಗಿದೆ ಎಂದು ಗ್ರಾಹಕನು ಕಂಪನಿಯ ಫಾರಂಗೆ ದೂರು ನೀಡಿದ್ದಾನೆ. ಆದರೆ ದೂರು ನೀಡಿದ ವ್ಯಕ್ತಿಯು ತನ್ನ ವೈಯುಕ್ತಿಕ ಮಾಹಿತಿಯನ್ನು ಬಹಿರಂಗ ಪಡಿಸಿಲ್ಲ.

8 ತಿಂಗಳ ಹಿಂದೆಯಷ್ಟೇ ಖರೀದಿಸಲಾದ ಈ ಮೊಬೈಲ್ ಬ್ಲಾಸ್ಟ್​​ನಿಂದ ಸಂಪೂರ್ಣ ಹಾನಿಗೊಳಗಾಗಿದೆ. ದೂರಿನ ಪ್ರಕಾರ ಫೋನ್​ನಲ್ಲಿ ಯಾವುದೇ ಸಮಸ್ಯೆ ಇರಲಿಲ್ಲ.  ಗೆಳೆಯ ಮಲಗಿದ್ದ ಜಾಗದಲ್ಲಿ ಮೊಬೈಲ್​ನ್ನು ಚಾರ್ಜ್​ಗೆ  ಇಡಲಾಗಿತ್ತು. ಈ ವೇಳೆ ಏಕಾಏಕಿ ಮೊಬೈಲ್ ಸ್ಫೋಟಗೊಂಡಿದೆ ಎಂದು ಮಾಲೀಕ ದೂರಿದ್ದಾನೆ.

ಈ ಕುರಿತು ಫೋಟೋಗಳ ಸಹಿತ ಸಮಾಜಿಕ ಜಾಲತಾಣದಲ್ಲಿ ಪೋಸ್ಟ್​ನ್ನು ಹಾಕಿ ಫೋನ್​ ಮಾಲೀಕ ಆಕ್ರೋಶ ವ್ಯಕ್ತಪಡಿಸಿದ್ದಾನೆ. ಈಗಾಗಲೇ ಕಂಪನಿಗೆ ದೂರು ನೀಡಲಾಗಿದ್ದರೂ ಶಿಯೋಮಿ ಕಡೆಯಿಂದ ಯಾವುದೇ ರೀತಿಯ ಅಧಿಕೃತ ಸೂಚನೆಗಳನ್ನು ಬಂದಿಲ್ಲ. ಅಲ್ಲದೆ ಮೊಬೈಲ್​ ಸ್ಪೋಟಗೊಳ್ಳಲು ಕಾರಣವನ್ನು ಕಂಪನಿ ತಿಳಿಸಿರುವುದಿಲ್ಲ ಎಂದು ದೂರುದಾರ  ಹೇಳಿದ್ದಾನೆ.

ಕಳೆದ ಕೆಲ ವರ್ಷಗಳಿಂದ ಶಿಯೋಮಿ ಮೊಬೈಲ್​ನ ಬ್ಯಾಟರಿ ಕುರಿತಾದ ದೂರುಗಳು ಕೇಳಿ ಬರುತ್ತಿದ್ದು, ಅಲ್ಲದೆ ಸ್ಮಾರ್ಟ್​ಫೋನ್​ಗಳ ಬ್ಯಾಟರಿ ಬಾಳಿಕೆಯು ಶೀಘ್ರದಲ್ಲೇ ಮುಗಿಯುತ್ತಿದೆ ಎಂದು ಹೇಳಲಾಗುತ್ತಿದೆ. ಇದರೊಂದಿಗೆ ಈಗ ಮೊಬೈಲ್​ಗಳು ಸ್ಪೋಟಗೊಳ್ಳುತ್ತಿರುವುದರಿಂದ ಕಂಪನಿಯು ಇಕ್ಕಟ್ಟಿಗೆ ಸಿಲುಕಿದೆ.

2017 ರಲ್ಲಿ ಕಡಿಮೆ ಬೆಲೆಯ ಅತ್ಯುತ್ತಮ ಸ್ಮಾರ್ಟ್​ಫೋನ್ ಎಂಬ ಹೆಗ್ಗಳಿಕೆ ​ ಶಿಯೋಮಿ MI A1 ಪಾಲಾಗಿತ್ತು. ಆದರೆ ಇದೀಗ ಇದೇ ಮೊಬೈಲ್​ ಸ್ಪೋಟಗೊಂಡಿರುವುದರಿಂದ ಗ್ರಾಹಕರನ್ನು ಚಿಂತೆಗೀಡು ಮಾಡಿದೆ. ಆದರೆ ರಾತ್ರಿಯ ನಿದ್ರಿಸುವ ವೇಳೆ ಮೊಬೈಲ್ ಚಾರ್ಜ್​ಗಿಟ್ಟು ಮಲಗುವುದರಿಂದ ಫೋನ್ ಸ್ಫೋಟಗೊಳ್ಳುವ ಸಾಧ್ಯತೆ ಹೆಚ್ಚಿದೆ ಎಂದು ಎಲ್ಲ ಮೊಬೈಲ್​ ಕಂಪನಿ ಈಗಾಗಲೇ ಎಚ್ಚರಿಸಿದೆ.