ಸ್ಕೂಟರ್ ಬಿಡುಗಡೆ ಮಾಡಿದ ಸ್ಮಾರ್ಟ್​ಫೋನ್ ಕಂಪೆನಿ: ಮೈಲೇಜ್ 70 ಕಿ.ಮೀ

ಜನಪ್ರಿಯ ಸ್ಮಾರ್ಟ್​ಫೋನ್ ಕಂಪನಿ ಶಿಯೋಮಿ ಈಗ ಎಲೆಕ್ಟ್ರಿಕ್ ವೆಹಿಕಲ್ ವಿಭಾಗಕ್ಕೆ ಪ್ರವೇಶಿಸಿದೆ. ಗಿಜ್ಮೊಚೀನಾ ವರದಿಯ ಪ್ರಕಾರ, ಶಿಯೋಮಿ ಎರಡು ಹೊಸ ಸ್ಮಾರ್ಟ್ ಎಲೆಕ್ಟ್ರಿಕ್ ಸ್ಕೂಟರ್‌ಗಳನ್ನು ಪರಿಚಯಿಸಿದೆ.

70mai ಸಹಭಾಗಿತ್ವದಲ್ಲಿ ಶಿಯೋಮಿ ಕಂಪನಿಯು 70mai A1 ಮತ್ತು 70mai A1 Pro ಸ್ಕೂಟರ್ ಅನ್ನು ಬಿಡುಗಡೆ ಮಾಡಿದೆ. ಈ ನೂತನ ಸ್ಕೂಟರ್​ಗಳ ಬೆಲೆ ಮತ್ತು ವೈಶಿಷ್ಟ್ಯ ಈ ಕೆಳಗಿನಂತಿವೆ.

ಪ್ರಸ್ತುತ, ಈ ಎರಡೂ ಸ್ಕೂಟರ್‌ಗಳನ್ನು ಚೀನಾದಲ್ಲಿ ಬಿಡುಗಡೆ ಮಾಡಲಾಗಿದೆ. ಒಂದೇ ಮಾದರಿಯಲ್ಲಿರುವ ಈ ಸ್ಕೂಟರ್‌ಗಳಲ್ಲಿ ಕ್ಸಿಯಾವೋಎಐ ಸ್ಮಾರ್ಟ್ ವಾಯ್ಸ್ ಅಸಿಸ್ಟೆಂಟ್ ಅಳವಡಿಸಲಾಗಿದೆ.

ಇನ್ನು ಬ್ಯಾಟರಿ ಸಾಮರ್ಥ್ಯ ಮತ್ತು ಇತರೆ ವೈಶಿಷ್ಟ್ಯಗಳ ಆಧಾರದ ಮೇಲೆ ಎರಡು ಮಾಡೆಲ್​ಗಳು ವಿಭಿನ್ನವಾಗಿದೆ ಎಂದು ಹೇಳಬಹುದು.

ಕೇವಲ 55 ಕೆ.ಜಿ. ತೂಕದ ಶಿಯೋಮಿಯ ಈ ಸ್ಮಾರ್ಟ್ ಎಲೆಕ್ಟ್ರಿಕ್ ಸ್ಕೂಟರ್‌ಗಳು ಬ್ರಷ್ ರಹಿತ ಡಿಸಿ ಮೋಟಾರ್ ಮತ್ತು ವೇಗದ ಚಾರ್ಜಿಂಗ್ ಬೆಂಬಲದೊಂದಿಗೆ ಲಿಥಿಯಂ ಅಯಾನ್ ಬ್ಯಾಟರಿಯನ್ನು ಹೊಂದಿವೆ.

ಈ ಬ್ಯಾಟರಿಯನ್ನು 7 ಗಂಟೆಗಳಲ್ಲಿ ಸಂಪೂರ್ಣವಾಗಿ ಚಾರ್ಜ್ ಮಾಡಬಹುದು. ಪೂರ್ಣ ಚಾರ್ಜ್ ಮಾಡಿದ ನಂತರ ಎ1 ಸ್ಕೂಟರ್ 60 ಕಿಲೋಮೀಟರ್ ಮೈಲೇಜ್ ನೀಡಿದ್ರೆ, ಎ 1 ಪ್ರೊ 70 ಕಿಲೋಮೀಟರ್ ಚಲಿಸುತ್ತದೆ.ಇದರ ಗರಿಷ್ಠ ವೇಗ ಗಂಟೆಗೆ 25 ಕಿಲೋಮೀಟರ್.

ಈ ಸ್ಮಾರ್ಟ್ ಎಲೆಕ್ಟ್ರಿಕ್ ಸ್ಕೂಟರ್‌ಗಳ ಗ್ರೌಂಡ್ ಕ್ಲಿಯರೆನ್ಸ್ 160 ಎಂಎಂ. ಇವುಗಳಲ್ಲಿ 14 ಇಂಚಿನ ವ್ಯಾಕ್ಯೂಮ್ ಟೈರ್, ಮುಂಭಾಗದಲ್ಲಿ ಡಿಸ್ಕ್ ಮತ್ತು ಹಿಂಭಾಗದಲ್ಲಿ ಡ್ರಮ್ ಬ್ರೇಕ್ ನೀಡಲಾಗಿದೆ.

ಶಿಯೋಮಿಯ ಎರಡೂ ಸ್ಕೂಟರ್‌ಗಳು 6.86-ಇಂಚಿನ ಸ್ಮಾರ್ಟ್ ಸೆಂಟ್ರಲ್ ಕಂಟ್ರೋಲ್ ಸ್ಕ್ರೀನ್ ಹೊಂದಿದ್ದು, ಇದರಲ್ಲಿ XiaoAI ಸ್ಮಾರ್ಟ್ ವಾಯ್ಸ್ ಕಂಟ್ರೋಲ್ ಸಪೋರ್ಟ್ ಇರಲಿದೆ.

A1 ಸ್ಕೂಟರ್‌ನ ಆರಂಭಿಕ ಬೆಲೆ 2999 ಚೈನೀಸ್ ಯುವಾನ್. ಅಂದರೆ ಸುಮಾರು 32 ಸಾವಿರ ರೂಪಾಯಿಗಳು. ಹಾಗೆಯೇ ಎ 1 ಪ್ರೊ ಬೆಲೆ 3999 ಯುವಾನ್. ಅಂದರೆ ಸುಮಾರು 42 ಸಾವಿರ ರೂಪಾಯಿಗಳು.