FastTag: ವಾಹನ ಸವಾರರ ಗಮನಕ್ಕೆ: ಫಾಸ್ಟ್​ಟ್ಯಾಗ್ ಇಲ್ಲದಿದ್ರೆ ಡಿಸೆಂಬರ್​ನಿಂದ ನೀಡಬೇಕು ಡಬಲ್ ಚಾರ್ಜ್

ಡಿಸೆಂಬರ್‌ 1 ರಿಂದ ದೇಶಾದ್ಯಂತ ಫಾಸ್ಟ್‌ಟ್ಯಾಗ್‌ ಟೋಲ್‌ ಸೇವೆ ಜಾರಿಯಾಗಲಿದೆ. ಎಲ್ಲ ರೀತಿಯ ವಾಹನಗಳಿಗೂ ಫಾಸ್ಟ್‌ ಟ್ಯಾಗ್‌ ಕಡ್ಡಾಯಗೊಳಿಸಲಾಗಿದೆ ಎಂದು ಭಾರತದ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ ತಿಳಿಸಿದೆ.

ಈ ಹೊಸ ನಿಯಮದಂತೆ ರಾಜ್ಯದಲ್ಲಿರುವ ಒಟ್ಟು 39 ರಾಷ್ಟ್ರೀಯ ಟೋಲ್ ಪ್ಲಾಜಾಗಳಲ್ಲಿ ಡಿಸೆಂಬರ್​ ತಿಂಗಳಿಂದ ಫಾಸ್ಟ್​ಟ್ಯಾಗ್ ರಿವೀವ್ ನಡೆಯಲಿದೆ. ಇದಕ್ಕಾಗಿ ಎಲ್ಲ ಟೋಲ್​ನಲ್ಲೂ ಸಾಫ್ಟ್ ವೇರ್‌ ಮತ್ತು ಫಾಸ್ಟ್‌ ಟ್ಯಾಗ್‌ ಯಂತ್ರಗಳನ್ನು ಅಳವಡಿಸಲಾಗಿದೆ. ಏನಿದು ಫಾಸ್ಟ್ ಟ್ಯಾಗ್?

ರಾಷ್ಟ್ರೀಯ ಹೆದ್ದಾರಿಗಳ ಮೂಲಕ ಸಂಚರಿಸುವಾಗ ನೀಡಬೇಕಾದ ಡಿಜಿಟಲ್ ಟೋಲ್​ ವ್ಯವಸ್ಥೆ. ಅಂದರೆ ಇನ್ಮುಂದೆ ಟೋಲ್​ನಲ್ಲಿ ಕ್ಯೂ ನಿಂತು ಹಣ ನೀಡಬೇಕಿಲ್ಲ. ಬದಲಾಗಿ ಫಾಸ್ಟ್​ಟ್ಯಾಗ್ ಸ್ಕ್ಯಾನಿಂಗ್ ಮೂಲಕ ನೀವು ಹಣ ಪಾವತಿಸುವುದಾಗಿದೆ.

ನಿಮ್ಮ ವಾಹನದ ಗಾಜಿನ ಮೇಲೆ ಅಥವಾ ಮುಂಭಾಗದಲ್ಲಿ ಫಾಸ್ಟ್​ಟ್ಯಾಗ್ ಸ್ಟಿಕ್ಕರ್ ( ಕ್ಯುರ್​ ಕೋಡ್​ ಮಾದರಿಯ ಸ್ಟಿಕ್ಕರ್) ಅಂಟಿಸಬೇಕಾಗುತ್ತದೆ.

ನೀವು ನ್ಯಾಷನಲ್ ಹೈವೇ ಮೂಲಕ ವಾಹನ ಚಲಿಸುವಾಗ ಫಾಸ್ಟ್​ಟ್ಯಾಗ್ ಸ್ಕ್ಯಾನ್ ಆಗುವ ಮೂಲಕ ಟ್ರಾಫಿಕ್ ಗೇಟ್ ಸ್ವಯಂ ಚಾಲಿತವಾಗಿ ತೆರೆದುಕೊಳ್ಳಲಿದೆ. ಹಾಗೆಯೇ ಸ್ವಯಂ ಚಾಲಿತವಾಗಿ ನಿಮ್ಮ ಖಾತೆಯಿಂದ ಟೋಲ್ ಶುಲ್ಕ ಕಟ್ ಆಗಲಿದೆ.

ಡಿಜಿಟಲ್ ಟೋಲ್ ಎನ್ನಲಾಗಿರುವ ಈ ಫಾಸ್ಟ್​ಟ್ಯಾಗ್​ ಅನ್ನು ರಿಚಾರ್ಜ್ ಮಾಡಿಕೊಳ್ಳಬಹುದು ಅಥವಾ ನಿಮ್ಮ ಬ್ಯಾಂಕ್ ಖಾತೆಯೊಂದಿಗೆ ಲಿಂಕ್ ಮಾಡಿಕೊಳ್ಳಬಹುದಾಗಿದೆ. ಈ ಹೊಸ ನಿಯಮದಿಂದ ಟೋಲ್​ ಪ್ಲಾಜಾಗಳಲ್ಲಿ ಕ್ಯೂ ನಿಲ್ಲಬೇಕಾದ ತಲೆ ಬಿಸಿ ಇರುವುದಿಲ್ಲ. ಅಲ್ಲದೆ ಚಿಲ್ಲರೆ ಸಮಸ್ಯೆ ಹಾಗೂ ಇನ್ನಿತರ ತೊಂದರೆಗಳಿಂದ ಸಹ ಪಾರಾಗಬಹುದು.

ಹೆದ್ದಾರಿಯಲ್ಲಿರುವ ಟೋಲ್​ ಬೂತ್​ಗಳಲ್ಲಿ ಒಂದನ್ನು ಹೊರತು ಪಡಿಸಿ ಮಿಕ್ಕವೆಲ್ಲವೂ ಫಾಸ್ಟ್​ಟ್ಯಾಗ್ ಲೇನ್ ಆಗಲಿದ್ದು, ನಿಮ್ಮ ವಾಹನವು ಫಾಸ್ಟ್​ಟ್ಯಾಗ್ ಇಲ್ಲದೇ ಈ ಲೇನ್​ನಲ್ಲಿ ಸಂಚರಿಸಿದರೆ ಡಬಲ್ ಚಾರ್ಜ್​ ನೀಡಬೇಕಾಗುತ್ತದೆ. ಇದರ ಹೊರತಾಗಿಯು ಒಂದು ಲೇನ್​ ಸಾಮಾನ್ಯ ಹಣ ಪಾವತಿಯಲ್ಲಿ ಕಾರ್ಯ ನಿರ್ವಹಿಸಲಿದೆ.

ಸದ್ಯ ಫಾಸ್ಟ್‌ ಟ್ಯಾಗ್‌ ಅನ್ನು ಅಮೆಜಾನ್‌, ಎಸ್‌ಬಿಐ, ಐಸಿಐಸಿಐ, ಆಕ್ಸಿಸ್‌, ಪೆಟಿಎಂ ವ್ಯಾಲೆಟ್‌ , ಎಚ್‌ಡಿಎಫ್ಸಿ, ಕರೂರ್‌ ವೈಶ್ಯ, ಕೊಟ್ಯಾಕ್‌ ಮಹಿಂದ್ರಾ, ಫೆಡರಲ್‌, ಪಂಜಾಬ್‌ ನ್ಯಾಶನಲ್‌, ಸಿಂಡಿಕೇಟ್‌ , ಯೂನಿಯನ್‌ ಬ್ಯಾಂಕ್‌ ಸೇರಿ ಒಟ್ಟು 22 ಬ್ಯಾಂಕ್‌ಗಳ  28,500 ಮಾರಾಟ ಕೇಂದ್ರಗಳಲ್ಲಿ ನೀಡಲಾಗುತ್ತಿದೆ.

ಇನ್ನು ಫಾಸ್ಟ್​ ಟ್ಯಾಗ್ ಬಳಕೆದಾರರಿಗೆ ಶೇ. 2.5 ಕ್ಯಾಶ್‌ ಬ್ಯಾಕ್‌ ಕೂಡ ನೀಡಲಾಗುವುದು ಎಂದು ಭಾರತೀಯ ರಾಷ್ಟ್ರೀಯ ಪ್ರಾಧಿಕಾರ ತಿಳಿಸಿದೆ.

ಫಾಸ್ಟ್​ ಟ್ಯಾಗ್ ಆ್ಯಪ್ ಡೌನ್​ಲೋಡ್ ಮಾಡುವ ಮೂಲಕ ನಿಮ್ಮ ಹತ್ತಿರದ ಫಾಸ್ಟ್​ಟ್ಯಾಗ್ ಮಾರಾಟ ಸ್ಥಳವನ್ನು ಕಂಡುಹಿಡಿಯಬಹುದು. ಹಾಗೆಯೇ ರಾಷ್ಟ್ರೀಯ ಹೆದ್ದಾರಿ ಸಹಾಯವಾಣಿ ಸಂಖ್ಯೆ 1033ಗೆ ಕರೆ ಮಾಡಿ ಮಾರಾಟ ಸ್ಥಳವನ್ನು/ ಉಚಿತವಾಗಿ ಫಾಸ್ಟ್​ ಟ್ಯಾಗ್ ನೀಡುತ್ತಿರುವುದು ಎಲ್ಲಿ ಎಂದು ತಿಳಿದುಕೊಳ್ಳಬಹುದು.

ಫಾಸ್ಟ್​ಟ್ಯಾಗ್ ಎಂಬುದು ಪ್ರಿಪೇಯ್ಡ್ ಸ್ಕ್ಯಾನಿಂಗ್ ಸ್ಟಿಕ್ಕರ್, ಇದನ್ನು ಕಾರಿನ ಗಾಜಿನ ಮೇಲೆ ಅಂಟಿಸಬೇಕು.

ನಿಮ್ಮ ವಾಹನ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಸಂಚರಿಸುವಾಗ ಸ್ವಯಂ ಚಾಲಿತವಾಗಿ ಗೇಟ್ ಓಪನ್ ಆಗುವುದಲ್ಲದೆ, ನಿಮ್ಮ ಖಾತೆಯಿಂದ ಟೋಲ್ ಶುಲ್ಕ ಕಡಿತಗೊಳ್ಳುತ್ತದೆ.

ಇನ್ನು ರಾಜ್ಯ ಸರ್ಕಾರದ ಕೆಆರ್‌ಐಡಿಎಲ್‌ ಅಧೀನದಲ್ಲಿರುವ 90 ಟೋಲ್ ಪ್ಲಾಜಾಗಳಲ್ಲೂ ಫಾಸ್ಟ್‌ ಟ್ಯಾಗ್‌ ಅಳವಡಿಸಿಕೊಳ್ಳಲು ಚಿಂತನೆ ನಡೆಸಲಾಗಿದೆ.