ಟಿವಿಎಸ್ ನೂತನ ಸ್ಕೂಟರ್ ಬಿಡುಗಡೆ: ಮೈಲೇಜ್ ಬರೋಬ್ಬರಿ 75 ಕಿ.ಮೀ

ಕೇಂದ್ರ ಸರ್ಕಾರ ಎಲೆಕ್ಟ್ರಿಕ್​ ವಾಹನಗಳ ತಯಾರಿಕೆಗೆ ಪ್ರೋತ್ಸಾಹ ನೀಡಿದ ಬೆನ್ನಲ್ಲೇ ದೇಶದಲ್ಲಿ ಬ್ಯಾಟರಿ ಚಾಲಿತ ವಾಹನಗಳ ಉತ್ಪಾದನೆಯ ಕಡೆ ಹಲವು ಕಂಪೆನಿಗಳು ಮುಖ ಮಾಡಿದೆ. ಅದರಲ್ಲಿ ಮುಖ್ಯವಾಗಿ ಈಗಾಗಲೇ ಕೆಲವೊಂದು ಕಂಪೆನಿಗಳು ಈಗಾಗಲೇ ಇ-ಸ್ಕೂಟರ್​ಗಳನ್ನು ಪರಿಚಯಿಸಿದೆ.

ಈ ಲೀಸ್ಟ್​​ಗೆ ಮತ್ತೊಂದು ಸೇರ್ಪಡೆ ಎಂದರೆ ಟಿವಿಎಸ್ ಕಂಪೆನಿ. ಹೌದು, ಟಿವಿಎಸ್ ಕಂಪೆನಿ ಕೂಡ ನೂತನ ಎಲೆಕ್ಟ್ರಿಕ್ ಸ್ಕೂಟರ್​ ಅನ್ನು ಮಾರುಕಟ್ಟೆಗೆ ಬಿಡುಗಡೆ ಮಾಡಿದೆ.

ಟಿವಿಎಸ್ ಮೋಟಾರ್ ತನ್ನ ಮೊದಲ ಎಲೆಕ್ಟ್ರಿಕ್ ಸ್ಕೂಟರ್ ಟಿವಿಎಸ್ ಐಕ್ಯೂಬ್ ಅನ್ನು ರಸ್ತೆಗಿಳಿಸಿದೆ. ನೂತನ ಸ್ಕೂಟರ್​ನ್ನು ಬೆಂಗಳೂರಿನಲ್ಲಿ ಬಿಡುಗಡೆ ಮಾಡಲಾಗಿದ್ದು, ಹಾಗೆಯೇ ಬುಕ್ಕಿಂಗ್ ಕೂಡ ಓಪನ್ ಆಗಿದೆ.

"ಟಿವಿಎಸ್ ಮೋಟಾರ್ ಗ್ರಾಹಕರ ಬಯಕೆ ಮತ್ತು ಸಮಸ್ಯೆಗಳನ್ನು ಗಮನದಲ್ಲಿಟ್ಟುಕೊಂಡು ಹೊಸತನವನ್ನು ನೀಡುತ್ತಿದೆ. ನಮ್ಮ ಮೊದಲ ಎಲೆಕ್ಟ್ರಿಕ್ ವಾಹನವು 'ಗ್ರೀನ್ ಅ್ಯಂಡ್ ಕನೆಕ್ಟೆಡ್ ಯೂತ್' ಅನ್ನು ಮನಸ್ಸಿನಲ್ಲಿಟ್ಟು ನಿರ್ಮಿಸಲಾಗಿದೆ" ಎಂದು ಟಿವಿಎಸ್ ಮೋಟಾರ್ ಕಂಪನಿಯ ಅಧ್ಯಕ್ಷ ವೇಣು ಶ್ರೀನಿವಾಸನ್ ಹೇಳಿದ್ದಾರೆ. IQubeನ ವಿಶೇಷತೆಗಳೇನು?

ಬ್ಯಾಟರಿ: ನೂತನ ಟಿವಿಎಸ್ ಎಲೆಕ್ಟ್ರಿಕ್ ಸ್ಕೂಟರ್​ನಲ್ಲಿ 4.5 ಕಿಲೋವ್ಯಾಟ್ ಲಿಥಿಯಂ-ಐಯಾನ್ ಬ್ಯಾಟರಿಯನ್ನು ನೀಡಲಾಗಿದೆ. ಇದು ಕೇವಲ 5 ಗಂಟೆಗಳಲ್ಲಿ ಸಂಪೂರ್ಣ ಚಾರ್ಜ್ ಆಗಲಿದೆ.

ಸ್ಪೀಡ್​: ಐಕ್ಯೂಬ್ ಸ್ಕೂಟರ್ 4.2 ಸೆಕೆಂಡುಗಳಲ್ಲಿ 0 ರಿಂದ 40 ಕಿ.ಮೀ ವೇಗವನ್ನು ಪಡೆಯುತ್ತದೆ. ಹಾಗೆಯೇ ಇದರ ಟಾಪ್ ಸ್ಪೀಡ್ ಗಂಟೆಗೆ 78 ಕಿ.ಮೀ.

ಸ್ಮಾರ್ಟ್​ ಕನೆಕ್ಟ್: ಈ ಇ-ಸ್ಕೂಟರ್​ ಸಂಪೂರ್ಣ ವಿದ್ಯುತ್​ ಚಾಲಿತ ವಾಹನ. ಇದರ ಮುಖ್ಯ ವಿಶೇಷತೆ ಎಂದರೆ ಸ್ಪೀಡೋಮೀಟರ್​ ಬದಲಾಗಿ ಸ್ಮಾರ್ಟ್​ ಕನೆಕ್ಟ್​ ಡಿಸ್​ಪ್ಲೇ ನೀಡಲಾಗಿರುವುದು.

ಇದು ಅಂಡ್ರಾಯ್ಡ್​ ಅಪರೇಟಿಂಗ್ ಸಿಸ್ಟಂನಿಂದ ಕಾರ್ಯಾಚರಿಸಲಿದೆ. ಈ ಪ್ರೊಜೆಕ್ಷನ್ ಸಿಸ್ಟಂ ಟಚ್​ ಸ್ಕ್ರೀನ್​ ಆಗಿದ್ದು, ಇಲ್ಲಿ ನೀವು ನೆವಿಗೇಷನ್, ಗೂಗಲ್ ಮ್ಯಾಪ್, ಚಾರ್ಜರ್​ ಸೇರಿದಂತೆ ಅಂಡಾಯ್ಡ್​ ಮೊಬೈಲ್​ನಲ್ಲಿ ಸಿಗುವ ಹಲವು ಮೋಡ್​ಗಳನ್ನು ಬಳಸಿಕೊಳ್ಳಬಹುದು.

ಎಂಜಿನ್ ಸಾಮರ್ಥ್ಯ: ಈ ಸ್ಕೂಟರ್ ಎಲೆಕ್ಟ್ರಿಕ್ ಮೋಟರ್ ಹೊಂದಿದ್ದು ಇದು 6 ಬಿಎಚ್‌ಪಿ ಮತ್ತು 140 ಎನ್‌ಎಂ ಟಾರ್ಕ್ ಉತ್ಪಾದಿಸುತ್ತದೆ.

ಸ್ಕೂಟರ್ ತೂಕ: ಐಕ್ಯೂಬ್​ ಎಲೆಕ್ಟ್ರಿಕ್ ಸ್ಕೂಟರ್‌ನ 118 ಕೆ.ಜಿ. ತೂಕ ಹೊಂದಿದ್ದು, ಇದರ ಬ್ಯಾಟರಿ ನಿರ್ವಹಣಾ ವ್ಯವಸ್ಥೆ ಮತ್ತು ಸಾಫ್ಟ್‌ವೇರ್ ಅನ್ನು ಭಾರತದಿಂದ ಅಭಿವೃದ್ಧಿಪಡಿಸಲಾಗಿದೆ.

ಮೈಲೇಜ್: ಟಿವಿಎಸ್​ ಐಕ್ಯೂಬ್​ ಅನ್ನು ಒಂದು ಬಾರಿ ಸಂಪೂರ್ಣ ಚಾರ್ಜ್ ಮಾಡಿದ್ರೆ 75 ಕಿ.ಮೀ ಮೈಲೇಜ್ ನೀಡುತ್ತದೆ.

ಬೆಲೆ: ನೂತನ ಎಲೆಕ್ಟ್ರಿಕ್ ಸ್ಕೂಟರ್​ನ ಆನ್​ ರೋಡ್ ಬೆಲೆ 1,15000 ರೂ. ಈ ಸ್ಕೂಟರ್​ ಅನ್ನು ಇಎಂಐ ಮೇಲೆ ಖರೀದಿಸುವ ಅವಕಾಶ ಕೂಡ ಇದ್ದು, ಬುಕ್ಕಿಂಗ್ ಚಾರ್ಜ್ 5 ಸಾವಿರ ರೂ. ನಿಗದಿಪಡಿಸಲಾಗಿದೆ.