ಜಿಯೋ ಡಿಟಿಹೆಚ್​ ಎಫೆಕ್ಟ್: ಗ್ರಾಹಕರಿಗೆ ಉಚಿತ ಸೇವೆ, ಕ್ಯಾಶ್​ಬ್ಯಾಕ್ ಆಫರ್ ​ನೀಡಿದ ಡಿಶ್ ಟಿವಿ ಕಂಪೆನಿಗಳು

ಟೆಲಿಕಾಂ ಕ್ಷೇತ್ರದಲ್ಲಿ ಜಿಯೋ ಮೂಲಕ ಕ್ರಾಂತಿ ಸೃಷ್ಟಿಸಿದ ರಿಲಯನ್ಸ್​ ಸಂಸ್ಥೆಯು ಶೀಘ್ರದಲ್ಲೇ ಜಿಯೋ ಡಿಟಿಹೆಚ್ (ಜಿಯೋ ಫೈಬರ್)​ ಅನ್ನು ಬಿಡುಗಡೆ ಮಾಡಲಿದೆ. ಈ ಹಿನ್ನೆಲೆಯಲ್ಲಿ ಏರ್​ಟೆಲ್ ಡಿಜಿಟಲ್​ ಟಿವಿ ಹಾಗೂ ಡಿಶ್ ಟಿವಿ ನೆಟ್​ವರ್ಕ್ ಕಂಪೆನಿಗಳು​ ವಿಲೀನವಾಗಲಿದೆ ಎಂದು ವರದಿಯಾಗಿತ್ತು.

ಆದರೀಗ ಡಿಟಿಹೆಚ್​ ಕಂಪನಿಗಳು ತಮ್ಮ ದೀರ್ಘಾವಧಿಯ ಯೋಜನೆಗಳ ರೀಚಾರ್ಜ್ ಪ್ಲ್ಯಾನ್​ಗಳನ್ನು ಬದಲಿಸಿ ಗ್ರಾಹಕರನ್ನು ಸೆಳೆಯುತ್ತಿದೆ. ಒಂದೆಡೆ ವಿಶೇಷ ಕೊಡುಗೆ, ಮತ್ತೊಂದೆಡೆ ಪ್ರತಿ ತಿಂಗಳ ರಿಚಾರ್ಜ್​ ಸಂಕಷ್ಟದಿಂದ ಪಾರಾಗಲು ಗ್ರಾಹಕರು ಹೊಸ ಯೋಜನೆಯತ್ತ ಒಲವು ತೋರುತ್ತಿದ್ದಾರೆ.

ಇಂತಹ ಪ್ಲ್ಯಾನ್​ಗಳನ್ನು ಟಾಟಾ ಸ್ಕೈ, ಡಿಶ್ ಟಿವಿ ಮತ್ತು ವಿಡಿಯೋಕಾನ್ ಡಿ 2 ಹೆಚ್ ಪರಿಚಯಿಸಿದೆ. ಕಂಪೆನಿಯು ಈ ಪ್ಲ್ಯಾನ್​ ಅಡಿಯಲ್ಲಿ ರಿಚಾರ್ಜ್ ಮಾಡುವವರಿಗೆ ದೀರ್ಘಾವಧಿಯ ಯೋಜನೆಯೊಂದಿಗೆ ಉಚಿತ ಸೇವೆಯನ್ನು ನೀಡುತ್ತಿದೆ. ಈ ಬಗ್ಗೆ ಹೆಚ್ಚಿನ ವಿವರಗಳು ಕೆಳಗಿವೆ.

ಡಿ 2 ಹೆಚ್ ಯೋಜನೆ- ಪ್ರಸ್ತುತ ಮಾರುಕಟ್ಟೆಯಲ್ಲಿ ಡಿಶ್ ರಿಚಾರ್ಜ್​ ಪ್ಲ್ಯಾನ್​ಗಳಲ್ಲೇ ಡಿ 2 ಹೆಚ್ ಕೊಡುಗೆಗಳು ಉತ್ತಮವಾಗಿವೆ. ಇದರಲ್ಲಿ, ಚಂದಾದಾರರು ದೀರ್ಘಾವಧಿಯ ಯೋಜನೆಯೊಂದಿಗೆ ಹೆಚ್ಚುವರಿ ಉಚಿತ ಸೇವೆಯನ್ನು ಪಡೆಯುತ್ತಾರೆ.

ಉದಾಹರಣೆಗೆ, ಮೂರು ತಿಂಗಳ ಯೋಜನೆಯನ್ನು ರೀಚಾರ್ಜ್ ಮಾಡಿದರೆ ಹೆಚ್ಚುವರಿ 7 ದಿನಗಳ ಚಂದಾದಾರಿಕೆ ನೀಡುತ್ತಿದೆ. ಹಾಗೆಯೇ 6 ತಿಂಗಳ ರಿಚಾರ್ಜ್ ಮೇಲೆ 15 ದಿನಗಳ ಚಂದಾದಾರಿಕೆಯನ್ನು ಉಚಿತವಾಗಿ ಒದಗಿಸುತ್ತಿದೆ. ಇನ್ನು 11 ತಿಂಗಳ ಚಂದಾದಾರಿಕೆಯ ರಿಚಾರ್ಜ್​ ಮಾಡಿಕೊಂಡರೆ ಗ್ರಾಹಕರಿಗೆ 30 ದಿನಗಳ ಹೆಚ್ಚುವರಿ ಸೇವೆಯನ್ನು ನೀಡಲಾಗುತ್ತದೆ. 22 ತಿಂಗಳ ಯೋಜನೆಯನ್ನು ತೆಗೆದುಕೊಂಡರೆ, 60 ದಿನಗಳ ಚಂದಾದಾರಿಕೆಯನ್ನು ಉಚಿತವಾಗಿ ನೀಡಲಾಗುತ್ತಿದೆ. ಇಷ್ಟೇ ಅಲ್ಲದೆ 33 ತಿಂಗಳ ಚಂದಾದಾರಿಕೆಯಲ್ಲಿ ಹೆಚ್ಚುವರಿ 90 ದಿನಗಳು ಮತ್ತು 44 ತಿಂಗಳ ಚಂದಾದಾರಿಕೆಯಲ್ಲಿ 120 ದಿನಗಳನ್ನು ಉಚಿತವಾಗಿ ಪಡೆಯಬಹುದು.

ಟಾಟಾ ಸ್ಕೈ ಕ್ಯಾಶ್‌ಬ್ಯಾಕ್ ಕೊಡುಗೆ- ಟಾಟಾ ಸ್ಕೈ ದೀರ್ಘಾವಧಿಯನ್ನು ಆಯ್ಕೆ ಮಾಡುವ ಬಳಕೆದಾರರಿಗೆ ಕ್ಯಾಶ್‌ಬ್ಯಾಕ್ ಕೊಡುಗೆಗಳನ್ನು ನೀಡುತ್ತಿದೆ. ಈ ಆಫರ್​​ ಅಡಿಯಲ್ಲಿ 12 ತಿಂಗಳ ಟಾಟಾ ಸ್ಕೈ ರೀಚಾರ್ಜ್ ಮಾಡಿದರೆ, ನಿಮ್ಮ ಖಾತೆಗೆ ಕ್ಯಾಶ್‌ಬ್ಯಾಕ್ ನೀಡಲಾಗುತ್ತದೆ.

ಈ ಕ್ಯಾಶ್‌ಬ್ಯಾಕ್‌ನ ಬೆಲೆ ಒಂದು ತಿಂಗಳ ರೀಚಾರ್ಜ್‌ಗೆ ಸಮಾನವಾಗಿರುತ್ತದೆ. ಇದರರ್ಥ 12 ತಿಂಗಳ ರಿಚಾರ್ಜ್ ಮಾಡಿಕೊಂಡರೆ , ನಿಮಗೆ ಒಂದು ತಿಂಗಳ ಹೆಚ್ಚುವರಿ ಚಂದಾದಾರಿಕೆ ಸಿಗುತ್ತದೆ.

ಡಿಶ್ ಟಿವಿ ಉಚಿತ ಚಂದಾದಾರಿಕೆ-
ಡಿಶ್ ಟಿವಿ ಮತ್ತು ಡಿ 2 ಹೆಚ್ ಯೋಜನೆಗಳ ನಡುವೆ ಹೆಚ್ಚಿನ ವ್ಯತ್ಯಾಸವಿಲ್ಲ. ಡಿಶ್ ಟಿವಿ ಚಂದಾದಾರರಿಗೆ ಗರಿಷ್ಠ 1 ವರ್ಷದ ಮಾನ್ಯತೆಯೊಂದಿಗೆ ಕೊಡುಗೆಗಳನ್ನು ನೀಡುತ್ತಿದೆ.

3 ತಿಂಗಳ ರೀಚಾರ್ಜ್ ಮಾಡುವ ಗ್ರಾಹಕರಿಗೆ 7 ದಿನಗಳ ಹೆಚ್ಚುವರಿ ಚಂದಾದಾರಿಕೆಯನ್ನು ಕಂಪನಿಯು ನೀಡುತ್ತಿದೆ. 6 ತಿಂಗಳ ರೀಚಾರ್ಜ್ ಪಡೆಯುವ ಗ್ರಾಹಕರಿಗೆ 15 ದಿನಗಳು ಮತ್ತು 11 ತಿಂಗಳ ರೀಚಾರ್ಜ್ ಮಾಡುವ ಗ್ರಾಹಕರಿಗೆ 30 ದಿನಗಳು ಹೆಚ್ಚುವರಿ ಚಂದಾದಾರಿಕೆ ನೀಡುತ್ತಿದೆ.