SBI ಗ್ರಾಹಕರ ಗಮನಕ್ಕೆ: ಬ್ಯಾಂಕಿಂಗ್ ವಂಚನೆ ತಡೆಯಲು ಹೀಗೆ ಮಾಡಿ..!

ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (SBI) ತನ್ನ ಗ್ರಾಹಕರ ಸುರಕ್ಷತೆಗಾಗಿ ಹಲವು ಕ್ರಮಗಳನ್ನು ಜಾರಿಗೊಳಿಸಿದೆ. ಇದೀಗ ಎಸ್​ಬಿಐ ಎಟಿಎಂ ಬಳಕೆದಾರರ ಸುರಕ್ಷತೆಯನ್ನು ಗಮನದಲ್ಲಿರಿಸಿ ಹೊಸ ಆಯ್ಕೆಯೊಂದನ್ನು ಗ್ರಾಹಕರಿಗೆ ನೀಡಿದೆ.

SBI ಗ್ರಾಹಕರು ಇನ್ಮುಂದೆ ಎಟಿಎಂಗಳ ಮೂಲಕ ಬ್ಯಾಲೆನ್ಸ್ ಎನ್‌ಕ್ವೈರಿ ಅಥವಾ ಮಿನಿ ಸ್ಟೇಟ್ಮೆಂಟ್‌ಗಾಗಿ ವಿನಂತಿ ಮಾಡಿದ್ರೆ, ಎಸ್‌ಎಂಎಸ್ ಕಳುಹಿಸುವ ಮೂಲಕ ಗ್ರಾಹಕರನ್ನು ಎಚ್ಚರಿಸಲಿದೆ.

ಈ ಮೂಲಕ ಎಸ್‌ಬಿಐ ಆ ಡೆಬಿಟ್ / ಎಟಿಎಂ ಕಾರ್ಡ್‌ ದುರ್ಬಳಕೆಯನ್ನು ತಡೆಯಲಿದೆ. ಅಲ್ಲದೆ ವಂಚಕರು ನಕಲಿ ಕಾರ್ಡ್​ಗಳ ಮೂಲಕ ವಹಿವಾಟು ನಡೆಸುತ್ತಿದ್ರೆ ಅಥವಾ ಕಳೆದು ಹೋದ ಕಾರ್ಡ್​​ನ್ನು ದುರ್ಬಳಕೆ ಮಾಡುತ್ತಿದ್ರೆ ಮೆಸೇಜ್ ಬರಲಿದೆ.

ಈ ವೇಳೆ ತಕ್ಷಣವೇ ಅವರ ಡೆಬಿಟ್ ಕಾರ್ಡ್ ಬಳಕೆಯನ್ನು ನಿರ್ಬಂಧಿಸುವ ಮೂಲಕ ವಂಚನೆಯನ್ನು ತಡೆಯಬಹುದು. ಹೀಗಾಗಿ ಎಸ್​ಬಿಐಯ ಎಚ್ಚರಿಕೆಯ ಮೆಸೇಜ್​ನ್ನು ನಿರ್ಲಕ್ಷಿಸದಿರಿ ಎಂದು ಗ್ರಾಹಕರಿಗೆ ತಿಳಿಸಿದೆ.

ಡಿಜಿಟಲ್ ವಂಚನೆಗಳು ಹೆಚ್ಚಾಗುತ್ತಿದ್ದಂತೆ, ಡಿಜಿಟಲ್ ವಹಿವಾಟಿನ ಸುರಕ್ಷತೆಯನ್ನು ಹೆಚ್ಚಿಸಲು ಎಸ್​ಬಿಐ ಬ್ಯಾಂಕ್ ಈ ಕ್ರಮ ತೆಗೆದುಕೊಂಡಿದೆ. ಕೆಲವು ವರ್ಷಗಳ ಹಿಂದೆ, ಇಂಟರ್ನೆಟ್ ಬ್ಯಾಂಕಿಂಗ್ ಸೌಲಭ್ಯವನ್ನು ಪ್ರವೇಶಿಸಲು ವ್ಯಕ್ತಿಯ ಮೊಬೈಲ್ ಸಂಖ್ಯೆಯನ್ನು ಅವನ / ಅವಳ ಬ್ಯಾಂಕ್ ಖಾತೆಯಲ್ಲಿ ನೋಂದಾಯಿಸಿಕೊಳ್ಳುವುದನ್ನು ಎಸ್‌ಬಿಐ ಕಡ್ಡಾಯಗೊಳಿಸಿತು.

ಮೊಬೈಲ್ ಸಂಖ್ಯೆಯನ್ನು ನೋಂದಾಯಿಸದಿದ್ದರೆ, ವ್ಯಕ್ತಿಗೆ ಇಂಟರ್ನೆಟ್ ಬ್ಯಾಂಕಿಂಗ್ ಸೌಲಭ್ಯಕ್ಕೆ ಪ್ರವೇಶವನ್ನು ನೀಡಲಾಗುವುದಿಲ್ಲ. ಬ್ಯಾಂಕ್ ತನ್ನ ಟ್ವಿಟ್ಟರ್ ಖಾತೆ, ವೆಬ್‌ಸೈಟ್ ಮತ್ತು ಇಮೇಲ್ ಮತ್ತು ಎಸ್‌ಎಂಎಸ್ ಎಚ್ಚರಿಕೆಗಳ ಮೂಲಕ ಡಿಜಿಟಲ್ ವಹಿವಾಟುಗಳನ್ನು ಹೇಗೆ ಸುರಕ್ಷಿತವಾಗಿ ಮಾಡಬೇಕೆಂಬುದರ ಬಗ್ಗೆ ನಿಯಮಿತವಾಗಿ ತನ್ನ ಗ್ರಾಹಕರಿಗೆ ಸಲಹೆಗಳನ್ನು ನೀಡುತ್ತಿದೆ.