Reliance Jio: ಅಗ್ಗದ ಇವೆರಡು ಪ್ರಿಪೇಯ್ಡ್​ ಪ್ಲಾನ್​ಗಳನ್ನ ನಿಲ್ಲಿಸಿದ ರಿಲಯನ್ಸ್ ಜಿಯೋ!

ಟೆಲಿಕಾಂ ಕ್ಷೇತ್ರದಲ್ಲಿ ತನ್ನದೇ ಆತ ಸ್ಥಾನ ಪಡೆದಿರುವ ರಿಲಯನ್ಸ್ ಜಿಯೋ ಗ್ರಾಹಕರಿಗಾಗಿ ಅಧಿಕ ಪ್ರಯೋಜನವಿರುವ ಪ್ಲಾನ್​ಗಳನ್ನು ಪರಿಚಯಿಸುತ್ತಾ ಬಂದಿದೆ. ಆದರೀಗ ಅಗ್ಗದ ಬೆಲೆಯಲ್ಲಿ ಲಭ್ಯವಿರುವ ಎರಡು ಪ್ರಿಪೇಯ್ಡ್ ಜಿಯೋಫೋನ್ ಪ್ಲಾನ್ ಗಳನ್ನು ಸ್ಥಗಿತಗೊಳಿಸಿದೆ.

ಹೌದು. ಟೆಲಿಕಾಂ ಆಪರೇಟರ್ ಜಿಯೋ 39 ರೂ. ಮತ್ತು 69 ರೂ.ವಿನ ಪ್ರಿಪೇಯ್ಡ್ ಜಿಯೋಫೋನ್​ ಪ್ಲಾನ್ ಗಳನ್ನು ತೆಗೆದು ಹಾಕಿರುವಂತೆ ತೋರುತ್ತಿದೆ. ಏಕೆಂದರೆ ಜಿಯೋ ಅಧಿಕೃತ ವೆಬ್ ಸೈಟ್ ಅಥವಾ ಮೈಜಿಯೋ ಆಪ್ ನಲ್ಲಿ ಈ ಯೋಜನೆಗಳು ಕಣ್ಮರೆಯಾಗಿವೆ.

ಕಂಪನಿಯು ಈ ಯೋಜನೆಗಳನ್ನು ಏಕೆ ತೆಗೆದುಹಾಕಿದೆ ಎಂಬುದು ಪ್ರಸ್ತುತ ತಿಳಿದಿಲ್ಲ, ಆದರೆ ಜಿಯೋ ತನ್ನ ಮುಂಬರುವ ಜಿಯೋಫೋನ್ ನೆಕ್ಸ್ಟ್ ಸ್ಮಾರ್ಟ್ ಫೋನ್ ಗಾಗಿ ಈ ಹೊಸ ಯೋಜನೆಗಳನ್ನು ಮತ್ತೆ ಆರಂಭಿಸುವ  ಸಾಧ್ಯತೆಯಿದೆ. ರಿಲಯನ್ಸ್ ಜಿಯೋ ಮತ್ತು ಗೂಗಲ್ ಮಾಡಿದ ಇತ್ತೀಚಿನ ಪ್ರಕಟಣೆಯ ಪ್ರಕಾರ ದೀಪಾವಳಿಗೂ ಮುನ್ನ 4G ಫೋನ್ ಖರೀದಿಗೆ ಲಭ್ಯವಿರುತ್ತದೆ.

ಜಿಯೋ 39 ರೂ ಪ್ರಿಪೇಯ್ಡ್ ಪ್ಲಾನ್ ಮೂಲಕ 100MB ದೈನಂದಿನ ಡೇಟಾ ಹಾಗೂ ಭಾರತದ ಯಾವುದೇ ನೆಟ್ವರ್ಕ್ಗೆ ಅನಿಯಮಿತ ಧ್ವನಿ ಕರೆ ಪ್ರಯೋಜನ ಒದಗಿಸುತ್ತಿತ್ತು. ಈ ಯೋಜನೆಯು 14 ದಿನಗಳ ವ್ಯಾಲಿಡಿಟಿಯೊಂದಿಗೆ 100 SMS ಅನ್ನು ಒಳಗೊಂಡಿತ್ತು.

69 ರೂ.ವಿನ ಪ್ರಿಪೇಯ್ಡ್ ಯೋಜನೆ ಮೂಲಕ 0.5GB ದೈನಂದಿನ ಡೇಟಾ, ಅನಿಯಮಿತ ಧ್ವನಿ ಕರೆ ಮತ್ತು ಒಟ್ಟು 100 SMSಗಳನ್ನು ಈ ಪ್ಲಾನ್ ಒಳಗೊಂಡಿತ್ತು. 14 ದಿನಗಳ ವ್ಯಾಲಿಡಿಟಿ ಅವಧಿಯೊಂದಿಗೆ ಪರಿಚಯಿಸಿತ್ತು.ಆದರೀಗ ಇವೆರಡು ಪ್ಲಾನ್ ಜಿಯೋ ಅಧಿಕೃ ವೆಬ್ಸೈಟ್ನಿಂದ ಕಣ್ಮರೆಯಾಗಿವೆ.

ಮಾತ್ರವಲ್ಲದೆ, ರಿಲಾಯನ್ಸ್ ಜಿಯೋ "1 ಖರೀದಿಸಿ 1 ಉಚಿತ" ಆಫರ್ ಅನ್ನು ತೆಗೆದುಹಾಕಿದೆ, ಈ ಹಿಂದೆ ಜಿಯೋಫೋನ್ ಬಳಕೆದಾರರಿಗೆ ಲಭ್ಯವಿತ್ತು. ಈ ಆಫರ್ ಗ್ರಾಹಕರಿಗೆ ಮೊದಲ ರೀಚಾರ್ಜ್ಗೆ ಪಾವತಿಸಿದ ನಂತರ ಮುಂದಿನ ರೀಚಾರ್ಜ್ ಅನ್ನು ಉಚಿತವಾಗಿ ನೀಡುತ್ತಿತ್ತು.

ಸಾಂಕ್ರಾಮಿಕ ಸಮಯದಲ್ಲಿ ಜಿಯೋಫೋನ್ ಬಳಕೆದಾರರಿಗೆ ಸಹಾಯ ಮಾಡಲೆಂದು ರಿಲಯನ್ಸ್ ಜಿಯೋ ‘‘1 ಖರೀದಿಸಿ 1 ಉಚಿತ" ಆಫರ್ ಪ್ರಾರಂಭಿಸಿತು, ಆದರೆ ಆಫರ್ ಅನ್ನು ಈಗ ಸೈಟ್ನಿಂದ ತೆಗೆದುಹಾಕಲಾಗಿದೆ.