OLA Electric: 1441 ದ್ವಿಚಕ್ರ ವಾಹನಗಳನ್ನು ವಾಪಸ್ ಕರೆಸಿಕೊಳ್ಳಲು ಓಲಾ ನಿರ್ಧಾರ

ಎಲೆಕ್ಟ್ರಿಕ್ ವಾಹನಗಳಿಗೆ ಬೆಂಕಿ ಹೊತ್ತಿಕೊಂಡ ಘಟನೆಗಳು ಸಾಲು ಸಾಲಾಗಿ ವರದಿಯಾಗುತ್ತಿರುವ ಹಿನ್ನೆಲೆಯಲ್ಲಿ ಓಲಾ ಎಲೆಕ್ಟ್ರಿಕ್ (Ola Electric) ತನ್ನ 1,441 ಎಲೆಕ್ಟ್ರಿಕ್ ದ್ವಿಚಕ್ರ ವಾಹನಗಳ ಘಟಕಗಳನ್ನು ವಾಪಸ್ ಪಡೆದುಕೊಳ್ಳುತ್ತಿದೆ

ಮಾರ್ಚ್ 26ರಂದು ಪುಣೆಯಲ್ಲಿ ಸಂಭವಿಸಿದ ಬೆಂಕಿ ಆಕಸ್ಮಿಕ ಘಟನೆಯ ಕುರಿತು ತನಿಖೆ ನಡೆಯುತ್ತಿದೆ. ಪ್ರಾಥಮಿಕ ತಿಳಿವಳಿಕೆ ಪ್ರಕಾರ ಅದು ದೋಷಯುಕ್ತ ಬೈಕ್ ಎಂದು ಗೊತ್ತಾಗಿದೆ ಎಂಬುದಾಗಿ ಕಂಪೆನಿ ಹೇಳಿದೆ.

"ಪೂರ್ವಭಾವಿ ಕ್ರಮವಾಗಿ ವಿಸ್ತೃತ ಸಮಸ್ಯೆ ಪತ್ತೆ ಕಾರ್ಯ ನಡೆಸುತ್ತಿದ್ದೇವೆ. ಒಂದು ನಿರ್ದಿಷ್ಟ ಬ್ಯಾಚ್‌ನ ಸ್ಕೂಟರ್‌ಗಳ ಆರೋಗ್ಯ ತಪಾಸಣೆ ನಡೆಸಲಾಗುತ್ತದೆ. ಹೀಗಾಗಿ 1,441 ವಾಹನಗಳನ್ನು ಸ್ವಯಂ ಪ್ರೇರಣೆಯಿಂದ ಹಿಂದಕ್ಕೆ ಕರೆಯಿಸಿಕೊಳ್ಳಲಾಗುತ್ತಿದೆ" ಎಂದು ತಿಳಿಸಿದೆ.

ತನ್ನ ಬ್ಯಾಟರಿ (Battery) ವ್ಯವಸ್ಥೆಯು ಭಾರತದ ಇತ್ತೀಚಿನ ಪ್ರಸ್ತಾವಿತ ಗುಣಮಟ್ಟ ಮಾನದಂಡ ಎಐಎಸ್ 156ರಲ್ಲಿ ಪರೀಕ್ಷಿಸಲಾಗಿದ್ದು, ಮಾನದಂಡಗಳನ್ನು ಅದು ಒಳಗೊಂಡಿದೆ. ಇದರ ಜತೆಗೆ ಅದು ಯುರೋಪಿಯನ್ ಗುಣಮಟ್ಟ ಪರೀಕ್ಷೆ ಇಸಿಇ 136 ಮಾನದಂಡಗಳಿಗೂ ಅನುಗುಣವಾಗಿ ಇದೆ ಎಂದು ಹೇಳಿದೆ.

ದೇಶದ ಅನೇಕ ಭಾಗಗಳಲ್ಲಿ ಎಲೆಕ್ಟ್ರಿಕ್ ದ್ವಿಚಕ್ರ ವಾಹನಗಳು ಬೆಂಕಿ ಹೊತ್ತಿಕೊಳ್ಳುವಂತಹ ಘಟನೆಗಳು ವ್ಯಾಪಕವಾಗಿ ನಡೆಯುತ್ತಿವೆ. ಇವೆ.

ಜನರು ಎಲೆಕ್ಟ್ರಿಕ್ ವಾಹನಗಳತ್ತ ಮುಖ ಮಾಡುತ್ತಿರುವಾಗಲೇ ಇಂತಹ ಘಟನೆಗಳು ನಡೆಯುತ್ತಿರುವುದು ಆತಂಕಕಾರಿ ಸಂಗತಿ. ಇವುಗಳ ಸುರಕ್ಷತೆಯ ಬಗ್ಗೆ ಅನುಮಾನಗಳು ಹೆಚ್ಚಾಗುತ್ತಿವೆ. ಈ ಹಿನ್ನೆಲೆಯಲ್ಲಿ ಇವಿ ತಯಾರಕರು ಹಲವು ವಾಹನಗಳನ್ನು ಹಿಂಪಡೆಯುತ್ತಿದ್ದಾರೆ. ಓಕಿನಾವಾ ಕಂಪನಿಯು 3,000 ಯೂನಿಟ್‌ಗಳ EVಗಳನ್ನು ಹಿಂಪಡೆದಿದೆ.