ಫ್ಯಾನ್ಸಿ ನಂಬರ್ ಚಿಂತೆ ಬಿಡಿ: ನಿಮ್ಮಿಷ್ಟದ ವಾಹನ ಸಂಖ್ಯೆ​ ಉಳಿಸಿಕೊಳ್ಳಲು ಬರಲಿದೆ ಹೊಸ ನಿಯಮ..!

ಭಾರತದಲ್ಲಿ ಇತ್ತೀಚೆಗಿನ ದಿನಗಳಲ್ಲಿ ಫ್ಯಾನ್ಸಿ ನಂಬರ್​ಗಳಿಗೆ ತೀವ್ರ ಬೇಡಿಕೆ ಸೃಷ್ಟಿಯಾಗುತ್ತಿದೆ. ಅದರಲ್ಲೂ ವಾಹನಗಳಿಗೆ ನಿರ್ದಿಷ್ಟ ಸಂಖ್ಯೆ ಬಯಸಿ ಹಲವರ ನಡುವೆ ಪೈಪೋಟಿ ಏರ್ಪಟ್ಟ ನಿದರ್ಶನಗಳಿವೆ. 

ಇದಕ್ಕೆ ವಿಶ್ವದ ಅತಿ ದೊಡ್ಡ ಉದಾಹರಣೆ ಎಂದರೆ ನೆಚ್ಚಿನ ನಂಬರ್​ಗಾಗಿ ದುಬೈ ಉದ್ಯಮಿ ಬರೋಬ್ಬರಿ 5 ಕೋಟಿ ಪಾವತಿಸಿರುವುದು. 'ಎಎ10' ನಂಬರ್ ಪ್ಲೇಟ್​ಗಾಗಿ ಉದ್ಯಮಿ ಮಜೀದ್ ಮುಸ್ತಫಾ ದುಬಾರಿ ಮೊತ್ತ ಪಾವತಿಸಿ ಸುದ್ದಿಯಾಗಿದ್ದರು.

ಇಂತಹ ನಂಬರ್​ ಪೈಪೋಟಿ ಭಾರತದಲ್ಲೂ ಹಲವಾರು ಕಡೆ ಬಂದಿದೆ. ಏಕೆಂದರೆ ಕೆಲವರು ಅದೃಷ್ಟ ಸಂಖ್ಯೆಯನ್ನು ನಂಬುತ್ತಾರೆ. ಹೀಗಾಗಿ ತಮ್ಮ ವಾಹನಗಳಿಗೆ ಅದೇ ನಂಬರ್​ ಇರಬೇಕೆಂದು ದುಬಾರಿ ಬೆಲೆ ನೀಡಿ ಇಷ್ಟದ ನಂಬರ್ ಪಡೆಯುತ್ತಾರೆ. ಆದರೆ...

ನೀವು ವಾಹನವನ್ನು ಮಾರಾಟ ಮಾಡಿದರೆ ಆ ನಂಬರ್ ಕೂಡ ಅದರೊಂದಿಗೆ ಹೋಗುತ್ತಿತ್ತು. ಇದೀಗ ಇದಕ್ಕೂ ಒಂದು ವ್ಯವಸ್ಥೆ ಮಾಡಲು ಸರ್ಕಾರ ಮುಂದಾಗಿದೆ. ಅಂದರೆ...

ನಿಮ್ಮ ಹಳೆಯ ಕಾರಿನ ಅದೃಷ್ಟ ಸಂಖ್ಯೆಯನ್ನು ನಿಮ್ಮೊಂದಿಗೆ ಶಾಶ್ವತವಾಗಿ ಇರಿಸಿಕೊಳ್ಳಬಹುದು. ನೀವು ಕಾರನ್ನು ಮಾರಾಟ ಮಾಡಿದರೂ, ನಂಬರ್​ಗಳನ್ನು ಉಳಿಸಿಕೊಳ್ಳುವ ಹೊಸ ವಾಹನ ನಿಯಮ ದೇಶದಲ್ಲಿ ಜಾರಿಗೆ ಬರಲಿದೆ ಎಂದು ವರದಿಯಾಗಿದೆ.

ನೀವು ವಾಹನವನ್ನು ಮಾರಾಟ ಮಾಡಿದರೆ ಅಥವಾ ಹೊಸ ವಾಹನದೊಂದಿಗೆ ವಿನಿಮಯ ಮಾಡಿಕೊಂಡರೆ ಅದೇ ವಾಹನ ಸಂಖ್ಯೆಯನ್ನು ನಿಮ್ಮ ಮುಂದಿನ ವಾಹನಕ್ಕೆ ಕಾಯ್ದಿರಿಸಿಕೊಳ್ಳಬಹುದು. ಇದಕ್ಕಾಗಿ ವಾಹನ ಸಂಖ್ಯೆ ಪೋರ್ಟಬಿಲಿಟಿ ಯೋಜನೆಯನ್ನು ಶೀಘ್ರದಲ್ಲೇ ದೇಶಾದ್ಯಂತ ಜಾರಿಗೆ ತರಲಾಗುವುದು.

ಅಂದರೆ, ಹೊಸ ಕಾರಿನಲ್ಲಿ ಪೋರ್ಟಬಿಲಿಟಿ ಮೂಲಕ ನಿಮ್ಮ ಹಳೆಯ ಕಾರಿನ ಸಂಖ್ಯೆಯನ್ನು ನೀವು ಬಳಸಬಹುದಾಗಿದೆ. ನಿಮ್ಮ ವಾಹನ ಖರೀದಿಸಿದವರು ಹೊಸ ನಂಬರ್ ಪಡೆಯಬೇಕಾಗುತ್ತದೆ.

ಈ ಯೋಜನೆಯು ಪ್ರಾರಂಭದಲ್ಲಿ ದೆಹಲಿ ಹಾಗೂ ಉತ್ತರ ಪ್ರದೇಶದ ನೋಯ್ಡಾದಲ್ಲಿ ಜಾರಿಗೆ ಬರಲಿದೆ. ನಂಬರ್ ಉಳಿಸಿಕೊಳ್ಳಲು ಏನು ಮಾಡಬೇಕು?

ನೀವು ನಿಮ್ಮ ವಾಹನದ ಹಳೆಯ ನಂಬರ್ ಉಳಿಸಿಕೊಳ್ಳಲು ಪ್ರಾದೇಶಿಕ ಸಾರಿಗೆ ಇಲಾಖೆಗೆ ಹಣ ಪಾವತಿಸಬೇಕಾಗುತ್ತದೆ. ಹಣವೆಷ್ಟು?

[caption id="attachment_263013" align="alignnone" width="924"] ದ್ವಿಚಕ್ರ ವಾಹನಗಳಿಗೆ 20 ಸಾವಿರ ರೂ. ಹಾಗೂ ನಾಲ್ಕು ಚಕ್ರ ವಾಹನಗಳಿಗೆ 50 ಸಾವಿರ ರೂ. ಪಾವತಿಸಬೇಕಾಗುತ್ತದೆ ಎಂದು ವರದಿಯಲ್ಲಿ ತಿಳಿಸಲಾಗಿದೆ.