WhatsApp: ಗ್ರೂಪ್​ ಅಡ್ಮಿನ್​​ಗಳಿಗಾಗಿ ವಾಟ್ಸಾಪ್​ನಿಂದ ಹೊಸ ಅಪ್ಡೇಟ್​! ಹೇಗಿದೆ ಗೊತ್ತಾ ಫೀಚರ್ಸ್?

ಜನಪ್ರಿಯ ಇನ್‌ಸ್ಟೆಂಟ್ ಮೆಸೇಜಿಂಗ್ ಪ್ಲಾಟ್‌ಫಾರ್ಮ್ ವಾಟ್ಸಾಪ್ ಇತ್ತೀಚೆಗೆ ಹೊಸ ಹೊಸ ಅಪ್ಡೇಟ್​​ಗಳನ್ನು ನೀಡುವ ಮೂಲಕ ಭಾರೀ ಜನಪ್ರಿಯತೆಯಲ್ಲಿದೆ. ಇದೀಗ ವಾಟ್ಸಾಪ್​ ಗ್ರೂಪ್​ ಅಡ್ಮಿನ್​​ಗಳಿಗಾಗಿ ಕಂಪೆನಿ ಹೊಸ ಅಪ್ಡೇಟ್​ ಅನ್ನು ಪರಿಚಯಿಸಿದ್ದು, ಈ ಬಗ್ಗೆ ಮೆಟಾ ಸಿಇಓ ಮಾರ್ಕ್ ಜುಗರ್​ಬರ್ಗ್​ ತಮ್ಮ ಇನ್​ಸ್ಟಾಗ್ರಾಮ್​ ಪೇಜ್​ನಲ್ಲಿ ಶೇರ್​ ಮಾಡಿಕೊಂಡಿದ್ದರು.

ಗ್ರೂಪ್‌ಗಳು ಮೆಸೇಜಿಂಗ್ ಅಪ್ಲಿಕೇಶನ್‌ನ ಪ್ರಮುಖ ಭಾಗವಾಗಿದೆ ಎಂದು ವಾಟ್ಸಾಪ್ ಕಂಪೆನಿ ಹೇಳಿದೆ. ಈ ಹೊಸ ವೈಶಿಷ್ಟ್ಯಗಳು ವಾಟ್ಸಾಪ್ ಗುಂಪುಗಳನ್ನು ನಿರ್ವಹಿಸಲು ಅಡ್ಮಿನ್‌ಗಳಿಗೆ ಅನುಕೂಲಕರವಾಗಿಸುತ್ತದೆ. ಹಾಗಿದ್ರೆ ಆ ಹೊಸ ಫೀಚರ್​ ಯಾವುದು ಎಂಬುದನ್ನು ಈ ಲೇಖನದಲ್ಲಿ ತಿಳಿಸಲಾಗಿದೆ.

ವಾಟ್ಸಾಪ್ ಗುಂಪಿನಲ್ಲಿ ಅಡ್ಮಿನ್‌ಗಳಿಗೆ ನಿಯಂತ್ರಣ: ಗ್ರೂಪ್ ಅಡ್ಮಿನ್‌ಗಳಿಗೆ ಗೌಪ್ಯತೆಗಾಗಿ ಉತ್ತಮ ನಿಯಂತ್ರಣಗಳನ್ನು ನೀಡುವುದು ವಾಟ್ಸಾಪ್​ನ ಮುಖ್ಯ ಕರ್ತವ್ಯ. ಅದಕ್ಕಾಗಿ, ಇನ್ಮುಂದೆ ವಾಟ್ಸಾಪ್ ಗ್ರೂಪ್​ಗೆ ಯಾರು ಸೇರಬಹುದು ಎಂಬುದನ್ನು ನಿರ್ಧರಿಸಲು ಅಡ್ಮಿನ್​ಗಳು ನಿರ್ಧರಿಸಬಹುದು. ಜೊತೆಗೆ ಗ್ರೂಪ್​​ ಲಿಂಕ್​ಗಳನ್ನು ಸಹ ಯಾರೆಲ್ಲಾ ಶೇರ್​ ಮಾಡ್ಬಹುದು ಎಂದು ಸಹ ಸೆಟ್ ಮಾಡಬಹುದಾಗಿದೆ.

ವಾಟ್ಸಾಪ್ ಗ್ರೂಪ್‌ಗಳಿಗೆ ಹೆಚ್ಚಿನ ಸದಸ್ಯರನ್ನು ಸೇರಿಸಬಹುದು: ಕಂಪೆನಿಯು ವಾಟ್ಸಾಪ್ ಗ್ರೂಪ್‌ಗೆ ಸೇರಿಸಬಹುದಾದ ಸದಸ್ಯರ ಸಂಖ್ಯೆಯನ್ನು ಇದೀಗ ಮತ್ತೆ ಹೆಚ್ಚು ಮಾಡಿದೆ. ಪ್ರಸ್ತುತ ವಾಟ್ಸಾಪ್ ಗುಂಪಿನಲ್ಲಿ ಕೇವಲ 512 ಜನರು ಮಾತ್ರ ಇರಬಹುದಿತ್ತು. ಆದರೆ ಇನ್ಮುಂದೆ 1024 ಸದಸ್ಯರನ್ನು ಆ್ಯಡ್​ ಮಾಡಬಹುದಾಗಿದೆ. ವಾಟ್ಸಾಪ್ ಕಳೆದ ವರ್ಷ ಈ ಫೀಚರ್ ಅನ್ನು ಘೋಷಿಸಿದ್ದರೂ ಈಗ ಅದನ್ನು ಲಭ್ಯವಾಗುವಂತೆ ಮಾಡುತ್ತಿದೆ.

ಮೆಸೇಜ್​​ಗಳನ್ನು ಪಿನ್ ಮಾಡಬಹುದು: ವಾಟ್ಸಾಪ್ ಇದೀಗ ಮೆಸೇಜ್​ಗಳನ್ನು ಗ್ರೂಪ್​ನಲ್ಲಿ ಪಿನ್​ ಮಾಡಿಡುವಂತಹ ಫೀಚರ್ ಅನ್ನು ಪರಿಚಯಿಸಿದೆ. ಈ ಮೂಲಕ ಅಡ್ಮಿನ್​ಗಳು ಯಾವುದೇ ಅಗತ್ಯ ಮೆಸೇಜ್​ ಇದ್ರೆ ಎಲ್ಲರಿಗೂ ಕಾಣುವಂತೆ ಪಿನ್ ಮಾಡಿಡಬಹುದು. ಇದು ವಾಟ್ಸಾಪ್ ಓಪನ್ ಮಾಡ್ಬೇಕಾದ್ರೆ ಗ್ರೂಪ್​​ನ ಮೇಲ್ಭಾಗದಲ್ಲಿ ಕಾಣುತ್ತದೆ.

ಈ ಫೀಚರ್​​ಗಳಲ್ಲಿ ಕೆಲವು ಫೀಚರ್​ಗಳು ಇನ್ನೂ ಅಭಿವೃದ್ಧಿ ಹಂತದಲ್ಲಿದೆ. ಆದರೆ ಕೆಲವೇ ದಿನಗಳಲ್ಲಿ ಎಲ್ಲಾ ಬಳಕೆದಾರರಿಗೂ ಲಭ್ಯವಾಗಲಿದೆ ಎಂದು ವರದಿಗಳು ಹೇಳಿವೆ.

ವಾಟ್ಸಾಪ್​ ಬಳಕೆದಾರರ ಬಹುದಿನದ ಬೇಡಿಕೆ ಇದೀಗ ಸಂಪೂರ್ಣವಾಗಿದೆ. ವಾಟ್ಸಾಪ್ ಕಳೆದ ಬಾರಿ ಸ್ಟೇಟಸ್​ನಲ್ಲಿ ಇನ್ಮುಂದೆ ವಾಯ್ಸ್​ ಮೆಸೇಜ್​ ಅನ್ನು ಶೇರ್​ ಮಾಡಬಹುದೆಂಬ ಸುದ್ದಿಯನ್ನು ನೀಡಿತ್ತು. ಅದೇ ರೀತಿ ಇದೀಗ ಹೊಸ ಅಪ್ಡೇಟ್​ ಅನ್ನು ಬಿಡುಗಡೆ ಮಾಡಿದೆ. ಈ ಮೂಲಕ ವಾಟ್ಸಾಪ್ ಬಳಕೆದಾರರು ಇನ್ಮುಂದೆ ಯಾವುದೇ ವಾಯ್ಸ್​ ಮೆಸೇಜ್​ ಅನ್ನು ಸ್ಟೇಟಸ್​ನಲ್ಲಿ ಶೇರ್ ಮಾಡಿಕೊಳ್ಳಬಹುದಾಗಿದೆ.

ಸೈಲೆಂಟ್ ಅನೌನ್​ ನಂಬರ್ ಕಾಲ್: ವಾಟ್ಸಾಪ್​ ಇದೀಗ ಮತ್ತೆ ಹೊಸ ಫೀಚರ್​ ಅನ್ನು ಅಭಿವೃದ್ಧಿಪಡಿಸುತ್ತಿದೆ ಎಂದು ವರದಿಯಾಗಿದೆ. ಅದರ ಹೆಸರು ಸೈಲೆಂಟ್ ಅನೌನ್​ ನಂಬರ್ ಕಾಲ್​. ಈ ಫೀಚರ್​ ಮೂಲಕ ಯಾವುದೇ ಅಪರಿಚಿತ ನಂಬರ್​ನಿಂದ ಕಾಲ್​ ಬಂದಾಗ ಅದನ್ನು ಕಾಲ್​ ಲೀಸ್ಟ್​ನಿಂದ, ನಾಟಿಫಿಕೇಶನ್​ನಿಂದ ಮ್ಯೂಟ್​ ಮಾಡಬಹುದು.