ಈ ಮುಖಭಾವ ನಿಮ್ಮಲ್ಲಿದ್ದರೆ ಸಿಗುತ್ತೆ 92 ಲಕ್ಷ ರೂಪಾಯಿ..!

ಟೆಕ್ನಾಲಜಿ ಬೆಳೆಯುತ್ತಿದ್ದಂತೆ ಚಿಂತನೆಗಳು ಸಹ ಬದಲಾಗುತ್ತಿದೆ. ಈಗಾಗಲೇ ಚೀನಾ, ಜಪಾನ್​ ಸೇರಿ ಸಾಕಷ್ಟು ದೇಶಗಳಲ್ಲಿ ಮೆಡಿಕಲ್​ ಶಾಪ್​, ಹೋಟೆಲ್​ ಹೀಗೆ ಅನೇಕ ಕಡೆಗಳಲ್ಲಿ ರೋಬೋಟ್​ ಸೇವೆ ಆರಂಭವಾಗಿದೆ.

ಇನ್ನು ಚೀನಾದಲ್ಲಿ ರೋಬೋಟ್​ನಿಂದ ನ್ಯೂಸ್ ಆ್ಯಂಕರಿಂಗ್ ಮಾಡಿಸುವ ಮೂಲಕ ವಿಶ್ವದ ಗಮನ ಸೆಳೆದಿತ್ತು. ಹಾಗೆಯೇ ಭಾರತದಲ್ಲೂ ಅಲ್ಲಲ್ಲಿ ರೋಬೋ ಸೇವೆ ಆರಂಭಗೊಂಡಿದೆ.

ಸಾಮಾನ್ಯವಾಗಿ ಮೊದಲ ನೋಟಕ್ಕೆ ರೋಬೋಟ್​ಗಳು ಯಂತ್ರ ಎಂಬುದು ಅದರ ವಿನ್ಯಾಸದಿಂದಲೇ ತಿಳಿಯುತ್ತದೆ. ಇದೀಗ ಅದಕ್ಕೂ ಹೊಸ ಟಚ್ ನೀಡಲು ಲಂಡನ್ ಮೂಲದ ಟೆಕ್ ಕಂಪೆನಿಯೊಂದು ಮುಂದಾಗಿದೆ.

ಜಿಯೋಮಿಕ್ ಎಂಬ ಟೆಕ್​ ಕಂಪೆನಿಯು ತನ್ನ ನೂತನ ರೋಬೋಟ್‌ಗಾಗಿ ಮುಖವೊಂದರ ಹುಡುಕಾಟದಲ್ಲಿದೆ. ಕೇಳಲು ಅಚ್ಚರಿಯಾದರೂ ಇದು ಸತ್ಯ.

ಕಂಪೆನಿಯು ಬಿಡುಗಡೆ ಮಾಡಲಿರುವ ಹೊಸ ರೋಬೋಟ್​​ಗೆ ಮನುಷ್ಯನ ಮುಖ ರೂಪವನ್ನು ನೀಡಲಿದೆ. ಅದಕ್ಕಾಗಿ ದಯೆ ಮತ್ತು ಸ್ನೇಹಪರ ಮುಖಭಾವ ಹೊಂದಿರುವ ಮುಖವೊಂದನ್ನು ಹುಡುಕಾಡುತ್ತಿದೆ.

ಅಂತಹದೊಂದು ಚಹರೆ ನಿಮ್ಮದಾಗಿದ್ದರೆ ಅದೇ ವಿನ್ಯಾಸದಲ್ಲಿ ರೋಬೋಟ್​ನ ಮುಖ ರೂಪಿಸಲಾಗುತ್ತದೆ. ಇದಕ್ಕಾಗಿ ಕಂಪೆನಿ ನಿಮ್ಮೊಂದಿಗೆ ಒಪ್ಪಂದವನ್ನು ಕೂಡ ಮಾಡಿಕೊಳ್ಳಲಿದೆ. ಈ ಒಪ್ಪಂದದ ಪ್ರಕಾರ...

ಕಂಪೆನಿಯು ಆ ವ್ಯಕ್ತಿಗೆ  92 ಲಕ್ಷ ರೂ. ನೀಡುವುದಾಗಿ ಹೇಳಿಕೊಂಡಿದೆ. ಅಂದರೆ ನಿಮ್ಮ ಮುಖದಲ್ಲಿರುವ ದಯೆ ಹಾಗೂ ಸ್ನೇಹಪರತೆ ಗುಣ ತಂತ್ರಜ್ಞರಿಗೆ ಇಷ್ಟವಾದರೆ ನಿಮಗೆ ಈ ಭರ್ಜರಿ ಮೊತ್ತ ಸಿಗಲಿದೆ.

ಅಂದಹಾಗೆ ಈ ರೋಬೋಟ್​ ವಿನ್ಯಾಸವನ್ನು ವರ್ಚುವಲ್ ಸ್ನೇಹಿತನ ಹೆಸರಿನಲ್ಲಿ ಪರಿಗಣಿಸಲಾಗುತ್ತದೆ ಎಂದು ಜಿಯೋಮಿಕ್ ಕಂಪನಿ ತಿಳಿಸಿದೆ.

ಮುಂದಿನ ವರ್ಷದೊಳಗೆ ಈ ರೋಬೋಟ್ ಪೂರ್ಣಗೊಳ್ಳಲಿದ್ದು, ಇದಕ್ಕಾಗಿ ಮುಖದ ಹುಡುಕಾಟ ಈಗಾಗಲೇ ಪ್ರಾರಂಭವಾಗಿದೆ. ಇದಕ್ಕಾಗಿ ಅನೇಕ ಮುಖಗಳನ್ನು ಪರೀಕ್ಷಿಸಿದ್ದೇವೆ ಎಂದು ಕಂಪೆನಿ ಹೇಳಿದೆ.

ಆದರೂ ನಮಗೆ ಬೇಕಾದ ಮುಖವಿನ್ನೂ ಸಿಕ್ಕಿಲ್ಲ. ಇದು ವಿಭಿನ್ನ ರೀತಿಯ ಹುಡುಕಾಟ ಎಂಬುದು ನಮಗೆ ತಿಳಿದಿದೆ. ಹಾಗಾಗಿಯೇ ಕೆಲ ಅಪರೂಪದ ಮುಖಕ್ಕಾಗಿ ನಾವು ಹುಡುಕಾಟವನ್ನು ಮುಂದುವರೆಸಿರುವುದಾಗಿ ಕಂಪೆನಿ ಹೇಳಿಕೊಂಡಿದೆ.

ಈ ರೋಬೋಟ್ ಮುಖವು ಮನುಷ್ಯನಂತೆ ಕಾಣಲಿದ್ದು, ಅಂದರೆ ಆಯ್ಕೆಯಾದ ವ್ಯಕ್ತಿಯ ತದ್ರೂಪಿ ಯಂತ್ರಮಾನವನಾಗಿ ಈ ರೋಬೋಟ್ ಪ್ರಪಂಚಕ್ಕೆ ಕಾಲಿಡಲಿದ್ದಾನೆ ಎಂದು ಕಂಪೆನಿ ಹೇಳಿದೆ.