Second Hand Cars: ಸೆಕೆಂಡ್ ಹ್ಯಾಂಡ್ ವಾಹನ ಖರೀದಿಸುವ ಮುನ್ನ ಈ ಅಂಶಗಳನ್ನು ತಪ್ಪದೇ ಗಮನಿಸಿ!

ಕೊರೋನಾ ಪ್ರಕರಣ ದಿನದಿಂದ ದಿನಕ್ಕೆ ಹೆಚ್ಚುತ್ತಲೇ ಇದೆ. ಹೀಗಾಗಿ ಬಸ್ಗಳ ಮೇಲೆ ಓಡಾಡುವವರ ಸಂಖ್ಯೆ ಕಡಿಮೆ ಆಗುತ್ತಿದೆ. ಜನರು ಹೆಚ್ಚೆಚ್ಚು ತಮ್ಮದೇ ವಾಹನಗಳಲ್ಲಿ ಕಚೇರಿಗೆ ತೆರಳುತ್ತಿದ್ದಾರೆ.

ಮಧ್ಯಮ ವರ್ಗದವರಿಗೆ ಹೊಸ ಕಾರು ಖರೀದಿ ಮಾಡಬೇಕು ಎಂದರೆ ಅದು ಕಷ್ಟಸಾಧ್ಯವಾಗಬಹುದು. ಹೀಗಾಗಿ, ಸೆಕೆಂಡ್ ಹ್ಯಾಂಡ್ ವಾಹನಗಳಿಗೆ ಬೇಡಿಕೆ ಹೆಚ್ಚುತ್ತಿದೆ. ಬೇಡಿಕೆ ಹೆಚ್ಚಿದಂತೆ ಮೋಸ ಮಾಡುವವರ ಸಂಖ್ಯೆಯೂ ಅಧಿಕವಾಗಿದೆ.

ಕೆಲವೊಮ್ಮೆ ಸೆಕೆಂಡ್ ಹ್ಯಾಂಡ್ ವಾಹನಗಳು ಉತ್ತಮ ಕಂಡಿಷನ್ ನಲ್ಲಿ ಇದ್ದಂತೆ ಕಂಡರೂ ಅಸಲಿಯತ್ತು ಬೆರೇಯೆ ಇರುತ್ತದೆ. ಹಾಗಾದರೆ ಸೆಕೆಂಡ್ ಹ್ಯಾಂಡ್ ವಾಹನ ಖರೀದಿಸುವ ಮುನ್ನ ಯಾವ ಅಂಶವನ್ನು ಗಮನಿಸಬೇಕು? ಅದಕ್ಕೆ ಇಲ್ಲಿದೆ ಉತ್ತರ.

ಸೆಕೆಂಡ್ ಹ್ಯಾಂಡ್ ವಸ್ತುಗಲ ಮಾರಾಟ ತಾಣ ಒಎಲ್ ಎಕ್ಸ್ ನಡೆಸಿದ ಒಂದು ಸಮೀಕ್ಷೆ ಪ್ರಕಾರ ಮುಂದಿನ ಮೂರರಿಂದ ಆರು ತಿಂಗಳಲ್ಲಿ ಕಾರು ಖರೀದಿಸಲು ಯೋಜಿಸುತ್ತಿರುವವರಲ್ಲಿ 54% ಜನರು ಸೆಕೆಂಡ್ ಹ್ಯಾಂಡ್ ಕಾರುಗಳಿಗೆ ಆದ್ಯತೆ ನೀಡುತ್ತಾರೆ.

ಆದಾಗ್ಯೂ, ಹೊಸ ಕಾರಿಗೆ ಹಣಕಾಸು ನೀಡುವುದಕ್ಕಿಂತ ಸೆಕೆಂಡ್ ಹ್ಯಾಂಡ್ ಕಾರಿಗೆ ಹಣಕಾಸು ಒದಗಿಸುವುದು ತುಂಬಾ ಕಷ್ಟ. ಅಲ್ಲದೆ, ಹೊಸ ಕಾರುಗಳಿಗೆ ಹೋಲಿಸಿದರೆ ಬ್ಯಾಂಕುಗಳು ಸೆಕೆಂಡ್ ಹ್ಯಾಂಡ್ ಕಾರುಗಳಿಗೆ 3-7% ಹೆಚ್ಚಿನ ಬಡ್ಡಿ ವಿಧಿಸುತ್ತವೆ.

ಕಾರಿನ ಕಂಡೀಷನ್ ನೋಡಿ: ಕಾರು ಕಡಿಮೆ ದೂರ ಕ್ರಮಿಸಿದ್ದರೂ ಕೆಲವೊಮ್ಮೆ ಅವು ಕಂಡೀಷನ್ ನಲ್ಲಿ ಇಲ್ಲದೆ ಇರಬಹುದು. ಕಾರಿನ ಮಾಲೀಕ ಕಾರನ್ನು ಹೇಗೆ ನೋಡಿಕೊಂಡಿದ್ದಾನೆ ಎಂಬುದು ಅದಕ್ಕೆ ಕಾರಣ. ಹೀಗಾಗಿ ಕಾರು ಖರೀದಿಗೂ ಮುನ್ನ ಒಮ್ಮೆ ಟೆಸ್ಟ್ ಡ್ರೈವ್ ಮಾಡಿ ನೋಡಿ. ಈ ವೇಳೆ ಇಂಜಿನ್ ಕಂಡೀಷನ್, ಟಾಯರ್ ಸ್ಥಿತಿಗಳನ್ನು ಸೂಕ್ಷ್ಮವಾಗಿ ಗಮನಿಸಿ.

ನೋಂದಣಿ ಕಾರ್ಡ್ ಪರಿಶೀಲಿಸಿ: ವಾಹನದ ಆರ್ ಸಿ ಅಥವಾ ನೋಂದಣಿ ಕಾರ್ಡ್ ಅನ್ನು ಒಮ್ಮೆ ಪರಿಶೀಲಿಸಿ. ಅದರಲ್ಲಿ ಇದು ಎಷ್ಟು ಮಾಲೀಕರ ಕೈಗೆ ಹಸ್ತಾಂತರವಾಗಿದೆ ಎಂಬುದು ಗೊತ್ತಾಗುತ್ತದೆ.

ಕಾರಿನ ವಿಮೆ ಪರಿಶೀಲಿಸಿ: ವಿಮೆ ಪಾಲಿಸಿಯಲ್ಲಿ ಕಾರಿನ ವಿಮೆ ಮೌಲ್ಯವನ್ನು ಪರಿಶೀಲಿಸಿ. ಇದರ ಆಧಾರದ ಮೇಲೆ ನೀವು ಕಾರಿನ ಮೌಲ್ಯವನ್ನು ಕಡಿಮೆ ಮಾಡುವಂತೆ ಕೇಳಬಹುದು.

ಕಳೆದ ಎರಡು ಮೂರು ವರ್ಷಗಳಲ್ಲಿ ಎಷ್ಟು ಬಾರಿ ವಿಮೆ ಹಣ ಪಡೆಯಲಾಗಿದೆ ಎಂಬುದನ್ನೂ ಗಮನಿಸಿ. ಇದರಿಂದ ವಾಹನ ಎಷ್ಟು ಬಾರಿ ಅಪಘಾತಕ್ಕೆ ಒಳಗಾಗಿತ್ತು ಎಂಬುದನ್ನು ಪತ್ತೆ ಹಚ್ಚಬಹುದು.

ಈ ಅಂಶಗಳನ್ನು ಪರಿಶೀಲಿಸಿದ ನಂತರವೇ ಕಾರನ್ನು ಕೊಂಡುಕೊಳ್ಳುವ ನಿರ್ಧಾರಕ್ಕೆ ಬನ್ನಿ.

ಸಾಂದರ್ಭಿಕ ಚಿತ್ರ