ಶೀಘ್ರದಲ್ಲೇ ಭಾರತದಲ್ಲಿ ಬಿಡುಗಡೆಯಾಗಲಿದೆ ನ್ಯೂ ಕಿಯಾ ಕಾರು: ಮೈಲೇಜ್ ಬರೋಬ್ಬರಿ 450 ಕಿ.ಮೀ

ದಕ್ಷಿಣ ಕೊರಿಯಾದ ವಾಹನ ನಿರ್ಮಾಣ ಕಂಪೆನಿ ಕಿಯಾ ಮೋಟಾರ್ಸ್‌ನ ಎಲೆಕ್ಟ್ರಿಕ್ ಎಸ್‌ಯುವಿ ಕಿಯಾ ಸೋಲ್ ಇವಿ ( Kia Soul EV) 15 ನೇ ವಿಶ್ವ ಕಾರು ಪ್ರಶಸ್ತಿಗಳಲ್ಲಿ ವರ್ಷದ ಅರ್ಬನ್ ಕಾರ್ ಎಂಬ ಅವಾರ್ಡ್ ತನ್ನದಾಗಿಸಿಕೊಂಡಿದೆ.

ಕಳೆದ ವರ್ಷ ಲಾಸ್ ಏಂಜಲೀಸ್​ನಲ್ಲಿ ನಡೆದ ಮೋಟಾರ್ ಶೋನಲ್ಲಿ Kia Soul EV ಅನ್ನು ಪರಿಚಯಿಸಲಾಗಿತ್ತು. ಇದೀಗ ಈ ಎಲೆಕ್ಟ್ರಿಕ್ ವಾಹನಕ್ಕೆ ವರ್ಷದ ಅತ್ಯುತ್ತಮ ಅರ್ಬನ್ ಕಾರ್ ಪ್ರಶಸ್ತಿ ಒಲಿದು ಬಂದಿದೆ. ಆದರೆ ಕೊರೋನಾ ಕಾರಣದಿಂದ ಈ ಆವಾರ್ಡ್​ ಕಾರ್ಯಕ್ರಮವನ್ನು ರದ್ದುಪಡಿಸಲಾಗಿದೆ.

ಎಸ್‌ಯುವಿ ಕಿಯಾ ಸೋಲ್ ಇವಿ ( Kia Soul EV) ವಿಶೇಷತೆಗಳೇನು?

Kia Soul EV ಅತ್ಯಾಧುನಿಕ ಸುರಕ್ಷತಾ ಫೀಚರ್​ಗಳೊಂದಿಗೆ ಬಿಡುಗಡೆಯಾದ ವಾಹನ. ಆಕರ್ಷಕ ವಿನ್ಯಾಸ ಹಾಗೂ ಅತ್ಯುತ್ತಮ ಇಂಟಿರೀಯಲ್ ಡಿಸೈನ್ ಹೊಂದಿರುವ ಈ ಕಾರಿನಲ್ಲಿ ಐದು ಮಂದಿ ಆರಾಮಾಗಿ ಕುಳಿತುಕೊಳ್ಳಬಹುದಾದ ಆಸನ ವ್ಯವಸ್ಥೆಯಿದೆ.

ಹಾಗೆಯೇ ಇದರಲ್ಲಿ ಫಾರ್ವಡ್ ಕೊಲಿಜನ್ ಅವೈಂಡನ್ಸ್ ಅಸಿಸ್ಟೆಂಟ್ (ಎಫ್‌ಸಿಎ), ಬ್ಲೈಂಡ್-ಸ್ಪಾಟ್ ಕೊಲೆಜಿನ್ ವಾರ್ನಿಂಗ್ (ಬಿಸಿಡಬ್ಲ್ಯು), ಸ್ಮಾರ್ಟ್ ಕ್ರೂಸ್ ಕಂಟ್ರೋಲ್ (ಎಸ್​ಸಿಸಿ), ಲೇನ್ ಕೀಪ್ ಅಸಿಸ್ಟ್ (ಎಲ್‌ಕೆಎ) ಮತ್ತು ಲೇನ್ ಫಾಲೋ ಅಸಿಸ್ಟ್ (ಎಲ್‌ಎಫ್‌ಎ) ನಂತಹ ವೈಶಿಷ್ಟ್ಯಗಳನ್ನು ನೀಡಲಾಗಿದೆ. ಇದರಿಂದ ಆ್ಯಕ್ಸಿಡೆಂಟ್ ಸೇರಿದಂತೆ ಇನ್ನಿತರ ಅವಘಡ ಸಂಭವಿಸುವುದನ್ನು ಚಾಲಕರಿಗೆ ಎಚ್ಚರಿಸುತ್ತದೆ.

Kia Soul EV ನ ಮುಂಭಾಗ ತೀಕ್ಷ್ಣವಾದ ರೇಜರ್ ಎಲ್ಇಡಿ ಹೆಡ್‌ಲೈಟ್‌ಗಳು, ಲೋವರ್ ಗ್ರಿಲ್, 17 ಇಂಚಿನ ಅಲಾಯ್ ವೀಲ್‌ಗಳನ್ನು ನೀಡಲಾಗಿದೆ. ಕಿಯಾ ಸೋಲ್ ಇವಿ ಉದ್ದ 4195 ಮಿಮೀ, ಅಗಲ 1800 ಎಂಎಂ, ಎತ್ತರ 1605 ಎಂಎಂ ಮತ್ತು ವೀಲ್‌ಬೇಸ್ 2600 ಎಂಎಂ ಹೊಂದಿದೆ.

ಇದರಲ್ಲಿ ಬೀಜ್-ಬ್ಲ್ಯಾಕ್ ಡ್ಯುಯಲ್ ಟೋನ್ ಕ್ಯಾಬಿನ್ ಹೊಂದಿದ್ದು, ಇದರ ಡ್ಯಾಶ್‌ಬೋರ್ಡ್ ಸಮತಟ್ಟಾಗಿದೆ. ಆದರೆ ಇದು ತುಂಬಾ ಉದ್ದವಿಲ್ಲ. ಇದರೊಂದಿಗೆ 10.25-ಇಂಚಿನ ಟಚ್‌ಸ್ಕ್ರೀನ್ ಇನ್ಫೋಟೈನ್‌ಮೆಂಟ್ ವ್ಯವಸ್ಥೆಯನ್ನು ಈ ಕಾರಿನಲ್ಲಿ ನೀಡಲಾಗಿದೆ. ಇದು ಆಂಡ್ರಾಯ್ಡ್ ಆಟೋ ಮತ್ತು ಆಪಲ್ ಕಾರ್​ಪ್ಲೇ ಅನ್ನು ಸಪೋರ್ಟ್ ಮಾಡುತ್ತೆ.

ಹರ್ಮನ್ ಕಾರ್ಡನ್​ನ 10 ಸ್ಪೀಕರ್‌ಗಳು , ಲೆದರ್‌ಫೀಲ್ ಅಪ್ಹೋಲ್ಸ್ಟರಿ, ಡಿಜಿಟಲ್ ಇನ್ಸ್ಟ್ರುಮೆಂಟ್ ಕ್ಲಸ್ಟರ್, ಇಟೆಡ್ ಸಿಸ್ಟಂ ವ್ಯವಸ್ಥೆಯೊಂದಿಗೆ ಇಕೋ, ಇಕೋ ಪ್ಲಸ್, ಕಂಫರ್ಟ್ ಮತ್ತು ಸ್ಪೋರ್ಟ್ ಡ್ರೈವ್ ಮೋಡ್‌ಗಳನ್ನು ಇದರಲ್ಲಿ ನೀಡಲಾಗಿದೆ.

ಇನ್ನು ಈ ವಾಹನದಲ್ಲಿ 64 ಕಿ.ವ್ಯಾ ಲಿಥಿಯಂ ಅಯಾನ್ ಪಾಲಿಮರ್ ಬ್ಯಾಟರಿಯನ್ನು ನೀಡಲಾಗಿದ್ದು, ಇದನ್ನು ಚಾರ್ಜ್ ಮಾಡಲು ಕಿಯಾ ಸೋಲ್ ಇವಿ ಎಸಿ ಚಾರ್ಜರ್‌ ವ್ಯವಸ್ಥೆ ಇದೆ. ಈ ಬ್ಯಾಟರಿ ಸಂಪೂರ್ಣ ಚಾರ್ಜ್ ಆಗಲು ತೆಗೆದುಕೊಳ್ಳುವ ಸಮಯ ಒಂದು ಗಂಟೆ ಮಾತ್ರ. ಹಾಗೆಯೇ ಮನೆಯ 3 ಪಿನ್ ಪ್ಲಗ್ ಮೂಲಕ 7 ರಿಂದ 9 ಗಂಟೆಯೊಳಗೆ ಪೂರ್ತಿ ಚಾರ್ಜ್ ಮಾಡಿಕೊಳ್ಳಬಹುದು.

ಒಂದು ಬಾರಿ ಸಂಪೂರ್ಣ ಚಾರ್ಜ್​ ಮಾಡಿಕೊಂಡರೆ Kia Soul EV ಕಾರಿನಲ್ಲಿ 280 ಮೈಲಿ ಕ್ರಮಿಸಬಲ್ಲದು. ಅಂದರೆ 450 ಕಿ.ಮೀ ಮೈಲೇಜ್ ನೀಡಲಿದೆ.

ಸದ್ಯ ಈ ಕಾರು ದಕ್ಷಿಣ ಕೊರಿಯಾ ಮಾರುಕಟ್ಟೆಗೆ ಮಾತ್ರ ಬಿಡುಗಡೆ ಮಾಡಲಾಗಿದ್ದು, ಶೀಘ್ರದಲ್ಲೇ ಭಾರತದ ರಸ್ತೆಗೆ ಇಳಿಯಲಿದೆ ಎಂದು ಹೇಳಲಾಗಿದೆ. ಅಲ್ಲದೆ ಕಿಯಾ ಎಕ್ಸ್ ಶೋರೂಮ್​ನಲ್ಲಿ Kia Soul EV ಕಾರಿನ ಬೆಲೆ 10 ಲಕ್ಷದಿಂದ ಪ್ರಾರಂಭವಾಗಲಿದೆ.