ಲಾಕ್‌ಡೌನ್ ಎಫೆಕ್ಟ್​: ಏಪ್ರಿಲ್ 17ರವರೆಗೆ ಜಿಯೋಫೋನ್ ಬಳಕೆದಾರರಿಗೆ ಉಚಿತ ಕರೆ ಸೌಲಭ್ಯ

ಡಿಜಿಟಲ್ ಯುಗದಲ್ಲಿ ಎಲ್ಲಿಂದ ಯಾವಾಗ ಬೇಕಾದರೂ ರಿಚಾರ್ಜ್ ಮಾಡಿಕೊಳ್ಳಬಹುದು. ಆದರೆ ದೇಶಾದ್ಯಂತ  21 ದಿನಗಳ ಲಾಕ್​ಡೌನ್​ನಿಂದ ಸಂಕಷ್ಟಕ್ಕೆ ಈಡಾದವರು ಮಧ್ಯಮ ವರ್ಗದವರು ಮತ್ತು ಬಡವರು.

ಏಕೆಂದರೆ ಹೆಚ್ಚಿನ ಮೊಬೈಲ್ ಬಳಕೆದಾರರು ಆನ್​ಲೈನ್ ಮೂಲಕವೇ ರಿಚಾರ್ಜ್ ಮಾಡಿಕೊಳ್ಳುತ್ತಾರೆ. ಆದರೆ ಲಾಕ್​ಡೌನ್ ಪರಿಣಾಮ ಮೊಬೈಲ್ ಶಾಪ್​ಗೆ ತೆರಳಿ ರಿಚಾರ್ಜ್ ಮಾಡಿಸಿಕೊಳ್ಳುತ್ತಿದ್ದವರು ತೊಂದರೆ ಅನುಭವಿಸುತ್ತಿದ್ದಾರೆ.

ಇದನ್ನು ಗಮನದಲ್ಲಿರಿಸಿ ರಿಲಯನ್ಸ್ ಜಿಯೋ, ಯುಪಿಐ, ಎಟಿಎಂ, ಎಸ್‌ಎಂಎಸ್, ಕಾಲ್ ಸೇರಿದಂತೆ ರೀಚಾರ್ಜ್ ಮಾಡಲು ಅನೇಕ ಆಯ್ಕೆಗಳನ್ನು ನೀಡಿದೆ.

ಇದರ ಹೊರತಾಗಿಯೂ ಅನೇಕ ಜಿಯೋಫೋನ್ ಗ್ರಾಹಕರು ರಿಚಾರ್ಜ್ ವಿಷಯದಲ್ಲಿ ತೊಂದರೆಗಳನ್ನು ಎದುರಿಸುತ್ತಿದ್ದಾರೆ. ಹೀಗೆ ಸಮಸ್ಯೆಗೆ ಸಿಲುಕಿರುವ ಗ್ರಾಹಕರಿಗಾಗಿ ಜಿಯೋ ವಿಶೇಷ ಕೊಡುಗೆಗಳ ಮೂಲಕ ಪರಿಹಾರ ನೀಡಿದೆ.

ಜಿಯೋ ಕಂಪನಿಯು ಜಿಯೋಫೋನ್‌ ಬಳಕೆದಾರಿಗಾಗಿ ಹಲವು ಆಫರ್​ಗಳನ್ನು ಘೋಷಿಸಿದೆ. ಲಕ್ಷಾಂತರ ಜಿಯೋಫೋನ್ ಗ್ರಾಹಕರಿಗೆ 100 ನಿಮಿಷ ಕರೆ ಮತ್ತು 100 ಎಸ್‌ಎಂಎಸ್‌ಗಳನ್ನು ಉಚಿತವಾಗಿ ನೀಡುವುದಾಗಿ ಜಿಯೋ ತಿಳಿಸಿದೆ.

ಈ ವಿಶೇಷ ಆಫರ್ ವಾಲಿಟಿಡಿ  17 ಏಪ್ರಿಲ್  2020. ಅಲ್ಲಿಯವರೆಗೂ ಗ್ರಾಹಕರು  100 ನಿಮಿಷಗಳ ಕರೆ ಮತ್ತು 100 ಎಸ್​ಎಂಎಸ್ ಅನ್ನು ಉಚಿತವಾಗಿ ಬಳಸಬಹುದು. ಆ ಬಳಿಕ ಎಂದಿನಂತೆ ಗ್ರಾಹಕರಿಗೆ ಒಳಬರುವ ಕರೆಗಳ ಸೌಲಭ್ಯ ಮುಂದುವರೆಯಲಿದೆ ಎಂದು ಜಿಯೋ ತಿಳಿಸಿದೆ.

ಇಷ್ಟೇ ಅಲ್ಲದೆ ರಿಲಯನ್ಸ್ ಕಂಪೆನಿಯು #CoronaHaaregaIndiaJeetega ಎಂಬ ಅಭಿಯಾನವನ್ನು ಪ್ರಾರಂಭಿಸಿದೆ. ಈ ಮೂಲಕ ಜನರಿಗೆ ಆತ್ಮಸ್ಥೈರ್ಯ ತುಂಬುತ್ತಾ ಸೋಂಕನ್ನು ತಡೆಗಟ್ಟಲು ಜಾಗೃತಿ ಮೂಡಿಸುತ್ತಿದ್ದಾರೆ.

ಇದಲ್ಲದೆ ಮೈಜಿಯೋ ಅಪ್ಲಿಕೇಶನ್ ಮೂಲಕ ಕೂಡ ಜಿಯೋ ಕೊರೋನಾ ಸೋಂಕಿನ ಬಗ್ಗೆ ಮಾಹಿತಿ ನೀಡುತ್ತಿದ್ದು, ರೋಗದ ಗುಣಲಕ್ಷಣಗಳ ಬಗ್ಗೆ ಗ್ರಾಹಕರು ಸುಲಭವಾಗಿ ಪರಿಶೀಲಿಸಬಹುದು.