ಐಡಿಯಾ ಬಳಕೆದಾರರ ಗಮನಕ್ಕೆ: ಜೂನ್ 29 ರಿಂದ ನಿಮ್ಮ ಸೇವೆ ಬದಲಾಗಲಿದೆ..!

ಟೆಲಿಕಾಂ ಸೇವಾ ಕಂಪನಿ ಐಡಿಯಾ (Idea Cellular) ತನ್ನ ಗ್ರಾಹಕರಿಗೆ ಸಂದೇಶ ಕಳುಹಿಸಿದ್ದು, ಜೂನ್ 29 ರಿಂದ ತನ್ನ ನಿರ್ವಾಣ ಪೋಸ್ಟ್‌ಪೇಯ್ಡ್‌ನ ಅಸ್ತಿತ್ವದಲ್ಲಿರುವ ಎಲ್ಲಾ ಗ್ರಾಹಕರನ್ನು ವೊಡಾಫೋನ್ ರೆಡ್‌ಗೆ ವರ್ಗಾಯಿಸಲಾಗುವುದು ಎಂದು ತಿಳಿಸಿದೆ.

ಜೂನ್ 29 ರಿಂದ ಬಿಲ್ಲಿಂಗ್ ವ್ಯವಸ್ಥೆಯನ್ನು ಸಹ ಬದಲಾಯಿಸಲಾಗುತ್ತಿದೆ. ಹೀಗಾಗಿ ಐಡಿಯಾ ನಿರ್ವಾಣ ಪೋಸ್ಟ್‌ಪೇಯ್ಡ್‌ನ ಗ್ರಾಹಕರನ್ನು ಸ್ವಯಂಚಾಲಿತವಾಗಿ ವೊಡಾಫೋನ್‌ಗೆ ವರ್ಗಾಯಿಸಲಾಗುತ್ತದೆ ಎಂದು ಕಂಪನಿ ಹೇಳಿದೆ.

ಇನ್ನು ಪ್ರಸ್ತುತ ಯೋಜನೆಯನ್ನು ವೊಡಾಫೋನ್​ ರೆಡ್​ ಮೂಲಕ ಪಡೆಯಬಹುದಾಗಿದ್ದು, ಐಡಿಯಾ ಪ್ಲ್ಯಾನ್​ನ್ನು ವೊಡಾಫೋನ್ ರೆಡ್ ಪೋಸ್ಟ್‌ಪೇಯ್ಡ್ ಯೋಜನೆಯಾಗಿ ಪರಿವರ್ತಿಸಲಾಗುತ್ತದೆ ಎಂದು ತಿಳಿಸಿದೆ.

ಇದರ ಹೊರತಾಗಿ, ನಂಬರ್​ನಲ್ಲಾಗಲಿ, ಸಿಮ್​ನಲ್ಲಾಗಲಿ ಯಾವುದೇ ಬದಲಾವಣೆ ಮಾಡಲಾಗುವುದಿಲ್ಲ ಎಂದು ಐಡಿಯಾ ತಿಳಿಸಿದೆ. ಇನ್ನು ವೊಡಾಫೋನ್ ರೆಡ್‌ಗೆ ಶಿಫ್ಟ್ ಮಾಡಲಾದ ಬಳಿಕ ಗ್ರಾಹಕರಿಗೆ ಮತ್ತಷ್ಟು ಹೆಚ್ಚುವರಿ ಸೇವೆಗಳು ಲಭ್ಯವಿರಲಿದೆ.

ಇವುಗಳಲ್ಲಿ 80 ದೇಶಗಳಲ್ಲಿ ಅಂತರರಾಷ್ಟ್ರೀಯ ರೋಮಿಂಗ್ ಸೌಲಭ್ಯವಾದ ರೆಡ್​ಎಕ್ಸ್ ಸೇವೆ ಸೇರಿದೆ. ಇದಲ್ಲದೆ, ನಿರ್ವಾಣ ಗ್ರಾಹಕರು ದೇಶಾದ್ಯಂತ 2,500 ಕ್ಕೂ ಹೆಚ್ಚಿನ ವೊಡಾಫೋನ್ ಮತ್ತು ಐಡಿಯಾ ಸ್ಟೋರ್​ಗಳಿಂದ ಯಾವುದೇ ಹೆಚ್ಚುವರಿ ಶುಲ್ಕ ಪಾವತಿಸದೇ ಸೇವೆ ಪಡೆಯಬಹುದಾಗಿದೆ.

ಇನ್ನು ನೆಟ್​ವರ್ಕ್​ ವರ್ಗಾವಣೆಯೊಂದಿಗೆ ಗ್ರಾಹಕರಿಗೆ ನೆಟ್‌ಫ್ಲಿಕ್ಸ್ ಮತ್ತು ಅಮೆಜಾನ್ ಪ್ರೈಮ್‌ಗೆ ಸಹ ಪ್ರವೇಶ ಸಿಗಲಿದೆ. ಹಾಗೆಯೇ ಮುಂದಿನ ದಿನಗಳಲ್ಲಿ ಯಾವುದೇ ರೀತಿಯ ಮಾಹಿತಿಗಾಗಿ ನಿರ್ವಾಣ ಗ್ರಾಹಕರು, ವೊಡಾಫೋನ್‌ನ ವೆಬ್‌ಸೈಟ್‌ಗೆ ಹೋಗಬೇಕಾಗುತ್ತದೆ ಎಂದು ಕಂಪನಿ ತಿಳಿಸಿದೆ.

ಐಡಿಯಾ ತನ್ನ ಗ್ರಾಹಕರಿಗೆ ಎರಡು ನಿರ್ವಾಣ ಪೋಸ್ಟ್‌ಪೇಯ್ಡ್ ಯೋಜನೆಗಳನ್ನು ಪರಿಚಯಿಸಿತ್ತು. 399 ರೂ.ವಿನ ಈ ಯೋಜನೆಯಲ್ಲಿ ಅನಿಯಮಿತ ಕರೆ, 40 ಜಿಬಿ ಡೇಟಾ ಮತ್ತು 100 ಎಸ್‌ಎಂಎಸ್ 399 ರೂಪಾಯಿ ಯೋಜನೆಯಲ್ಲಿ ಲಭ್ಯವಿದೆ.

ಹಾಗೆಯೇ 499 ರೂ. ಪ್ಲ್ಯಾನ್​ನಲ್ಲಿ ಗ್ರಾಹಕರು 75 ಜಿಬಿ ಡೇಟಾ ಮತ್ತು 100 ಎಸ್ಎಂಎಸ್ ಹಾಗೂ ಅನಿಯಮಿತ ಕರೆ ಸೌಲಭ್ಯ ಪಡೆಯಲಿದ್ದಾರೆ. ಈಗ ಐಡಿಯಾ ಗ್ರಾಹಕರಿಗೆ ವೊಡಾಫೋನ್ ರೆಡ್ ಮೂಲಕ ಈ ಸೌಲಭ್ಯಗಳನ್ನು ಮುಂದುವರೆಸಲಿದೆ.

2018 ರಲ್ಲಿ ವೊಡಾಫೋನ್ ಮತ್ತು ಐಡಿಯಾವನ್ನು ವಿಲೀನವಾಗಿತ್ತು. ಇದಾಗಿ ಎರಡು ವರ್ಷಗಳು ಕಳೆದರೂ ಕಂಪೆನಿಯು ಎರಡು ವಿಭಿನ್ನ ಬ್ರಾಂಡ್‌ಗಳ ಮೂಲಕ ಬಳಕೆದಾರರಿಗೆ ಸೇವೆಯನ್ನು ಒದಗಿಸುತ್ತಾ ಬರುತ್ತಿದೆ. ಇದೀಗ ಒಂದೊಂದೇ ಯೋಜನೆಯನ್ನು ವಿಲೀನಗೊಳಿಸಲು ವೊಡಾಫೋನ್ ಕಂಪೆನಿ ಮುಂದಾಗಿದ್ದು, ಅದರ ಮೊದಲ ಹಂತ ಐಡಿಯಾ ನಿರ್ವಾಣ ಪೋಸ್ಟ್​ಪೇಯ್ಡ್​ ಪ್ಲ್ಯಾನ್ ಶಿಫ್ಟ್ ಎನ್ನಲಾಗಿದೆ.