Internet: ವಿಮಾನ ಪ್ರಯಾಣಿಕರಿಗೆ ಸಿಹಿ ಸುದ್ದಿ! ಇನ್ಮುಂದೆ ಆಕಾಶದಲ್ಲೂ ಸಿಗಲಿದೆ ಇಂಟರ್​ನೆಟ್

ಭಾರತವು ಪ್ರಪಂಚದಾದ್ಯಂತ ಅತಿ ಹೆಚ್ಚು ಡೇಟಾ ಬಳಸುವ ರಾಷ್ಟ್ರಗಳಲ್ಲಿ ಒಂದಾಗಿದೆ. ಇಂಟರ್ನೆಟ್ ಸೇವೆ ದೇಶದ ಮೂಲೆ ಮೂಲೆಗಳಿಗೂ ಹರಡಿದ ನಂತರ ಡೇಟಾ ಬಳಕೆಯ ಪ್ರಮಾಣವೂ ಹೆಚ್ಚಿದೆ. ಭಾರತೀಯರು ಇನ್ನೂ ಇಂಟರ್​​ನೆಟ್ ಸೇವೆಯನ್ನು ಬಳಸಲು ಸಾಧ್ಯವಾಗದ ಒಂದು ಪ್ರದೇಶವಿದೆ ಮತ್ತು ಅದು ಆಕಾಶವಾಗಿದೆ.

ಮುಂಬರುವ ಸಮಯದಲ್ಲಿ ಭಾರತೀಯರು ಆಕಾಶದಲ್ಲಿ ಇಂಟರ್​ನೆಟ್ ಅನ್ನು ಬಳಸಲು ಸಾಧ್ಯವಾಗುತ್ತದೆ. ಭಾರತದ ಪ್ರಮುಖ ವಿಮಾನಯಾನ ಸಂಸ್ಥೆಯಾದ  ಸ್ಪೈಸ್ ಜೆಟ್ ಶೀಘ್ರದಲ್ಲೇ ತನ್ನ ವಿಮಾನಗಳಿಗೆ ಬ್ರಾಡ್​ಬ್ಯಾಂಡ್ ಇಂಟರ್​ನೆಟ್ ಅನ್ನು ತರಲು ಮುಂದಾಗಿದೆ.

ಸ್ಪೈಸ್ ಜೆಟ್​ ಅಧ್ಯಕ್ಷ ಅಜಯ್ ಸಿಂಗ್ ಮಾತನಾಡಿ, ಶೀಘ್ರದಲ್ಲೇ ವಿಮಾನಯಾನ ಸಂಸ್ಥೆಯು ತನ್ನ ವಿಮಾನಗಳಲ್ಲಿ ಬ್ರಾಡ್​ಬ್ಯಾಂಡ್ ಇಂಟರ್​ನೆಟ್ ಸೇವೆಯನ್ನು ಪರಿಚಯಿಸಲಿದೆ. ಮುಂದಿನ ಕೆಲವು ತಿಂಗಳುಗಳಲ್ಲಿ ಕಂಪನಿಯು ಬೋಯಿಂಗ್-737 ಮ್ಯಾಕ್ಸ್ ವಿಮಾನವನ್ನು ತನ್ನ ವಿಮಾನದ ಫ್ಲೀಟ್​ಗೆ ಸೇರಿಸಲಿದೆ ಎಂದು ಹೇಳಿದರು.

ಸ್ಪೈಸ್ ಜೆಟ್​ನ ವೆಬ್​ಸೈಟ್​​ ಪ್ರಕಾರ, ವಿಮಾನಯಾನವು 91 ವಿಮಾನಗಳ ಸಮೂಹವನ್ನು ಹೊಂದಿದೆ. ಅದರಲ್ಲಿ 13 MAX ವಿಮಾನಗಳು ಮತ್ತು 46 ಬೋಯಿಂಗ್-737 ವಿಮಾನಗಳ ಹಳೆಯ ಆವೃತ್ತಿಗಳಾಗಿವೆ.

ಏರ್​ಲೈನ್ಸ್​​ನ 17 ನೇ ವಾರ್ಷಿಕೋತ್ಸವದಂದು, ಸ್ಪೈಸ್ ಜೆಟ್ ಮಾಸಿಕ ಆಧಾರದ ಮೇಲೆ ಹೆಚ್ಚಿನ ಪ್ರಯಾಣಿಕರೊಂದಿಗೆ ಹಾರಾಟ ನಡೆಸುತ್ತಿದೆ ಮತ್ತು ಮುಂಬರುವ ತಿಂಗಳುಗಳಲ್ಲಿ ಇದು ಹೆಚ್ಚಾಗುವ ನಿರೀಕ್ಷೆಯಿದೆ ಎಂದು ಅಜಯ್ ಸಿಂಗ್ ಅವರು ಉದ್ಯೋಗಿಗಳಿಗೆ ತಮ್ಮ ಇಮೇಲ್​ನಲ್ಲಿ ತಿಳಿಸಿದ್ದಾರೆ.

ನಂತರ ಮಾತನಾಡಿದ ಅಜಯ್ ಸಿಂಗ್, "ಬೋಯಿಂಗ್ 737 MAX ವಿಮಾನವು ಯಶಸ್ವಿಯಾಗಿ ಸೇವೆಗೆ ಮರಳಿದೆ ಮತ್ತು ಪ್ರಯಾಣಿಕರಿಂದ ಉತ್ತಮ ಪ್ರತಿಕ್ರಿಯೆಯನ್ನು ಪಡೆದುಕೊಂಡಿದೆ. ಏರ್​ಲೈನ್ ತನ್ನ ಎಲ್ಲಾ ಹಳೆಯ ವಿಮಾನಗಳನ್ನು MAX ನೊಂದಿಗೆ ಬದಲಾಯಿಸಲು ಮತ್ತು ಮುಂದಿನ ಕೆಲವು ತಿಂಗಳುಗಳಲ್ಲಿ ಹಲವಾರು MAX ವಿಮಾನಗಳನ್ನು ಸೇರಿಸಲು ಯೋಜಿಸಿದೆ ಎಂದು ಹೇಳಿದ್ದಾರೆ.

“ನಾವು ಈ ವರ್ಷ ನಮ್ಮ ನೆಟ್​ವರ್ಕ್​ಗೆ ಹೊಸ ಉತ್ಪನ್ನಗಳು ಮತ್ತು ಹೊಸ ಮಾರ್ಗಗಳನ್ನು ಸೇರಿಸುತ್ತೇವೆ. ಸ್ಪೈಸ್ ಕ್ಲಬ್​, ನಮ್ಮ ಲಾಯಲ್ಟಿ ಪ್ರೋಗ್ರಾಂ, ಇತ್ತೀಚೆಗೆ ಅದರ ಸಹ-ಬ್ರಾಂಡೆಡ್ ಕ್ರೆಡಿಟ್ ಕಾರ್ಡ್ ಅನ್ನು ಪರಿಚಯಿಸಿತು. ಶೀಘ್ರದಲ್ಲೇ ನಮ್ಮ ವಿಮಾನದಲ್ಲಿ ಬ್ರಾಡ್​ಬ್ಯಾಂಡ್ ಇಂಟರ್ನೆಟ್ ಸೇವೆಯನ್ನು ಹೊಂದುವ ನಿರೀಕ್ಷೆಯಿದೆ ಎಂದು ಅವರು ಹೇಳಿದರು. " ಭಾರತ ಮತ್ತು ಪ್ರಪಂಚದಾದ್ಯಂತ ಹೊಸ ಸ್ಥಳಗಳನ್ನು ಸಂಪರ್ಕಿಸಲು ಸ್ಪೈಸ್ ಜೆಟ್​ನ ನೆಟ್​​ವರ್ಕ್​ ಅನ್ನು ವಿಸ್ತರಿಸಲಾಗುವುದು ಎಂದು ಅಜಯ್​ ಸಿಂಗ್​  ತಿಳಿಸಿದ್ದಾರೆ.