PUBG ಪ್ರಿಯರಿಗೆ ಗುಡ್​ ನ್ಯೂಸ್​! ಬ್ಯಾಟಲ್​​ಗ್ರೌಂಡ್ಸ್​ ಮೊಬೈಲ್ ಇಂಡಿಯಾ ಮರಳಿ ಭಾರತಕ್ಕೆ ಎಂಟ್ರಿ

PUBG ಅಂದ್ರೆ ಯಾರಿಗೆ ಗೊತ್ತಿಲ್ಲ ಹೇಳಿ. ಒಂದೆರಡು ವರ್ಷಗಳ ಹಿಂದೆ ಭಾರತದಲ್ಲಿ ಭಾರೀ ಸಂಚಲನ ಸೃಷ್ಟಿಸಿದ ಒಂದು ಮೊಬೈಲ್​​ ಗೇಮಿಂಗ್ ಅಪ್ಲಿಕೇಶನ್ ಇತ್ತೆಂದರೆ ಅದು ಪಬ್ಜಿ. ಆದರೆ ಕ್ರಮೇಣ ಕೆಲವೊಂದು ಕಾರಣಗಳಿಗಾಗಿ ಈ ಅಪ್ಲಿಕೇಶನ್​ ಅನ್ನೇ ಪ್ಲೇಸ್ಟೋರ್​ನಿಂದ ತೆಗೆದುಹಾಕಲಾಯಿತು.

ಆದರೂ ಈ ಪಬ್ಜಿ ಪ್ಲೇಯರ್ಸ್​ ಹ್ಯಾಕ್ಡ್​​ ವರ್ಷನ್​ಗಳನ್ನೆಲ್ಲಾ ಡೌನ್​ಲೋಡ್​ ಮಾಡಿಕೊಂಡು ಸ್ನೇಹಿತರ ಜೊತೆ ಸೇರಿ ಆಡುತ್ತಿದ್ದರು. ಆದರೆ ಇದೀಗ ಪಬ್ಜಿ ಪ್ಲೇಯರ್ಸ್​ಗೆ ಗುಡ್​ ನ್ಯೂಸ್​ ಸಿಕ್ಕಿದೆ. ಅದೇನೆಂದರೆ BGMI ಮೊಬೈಲ್ ಗೇಮಿಂಗ್ ಅಪ್ಲಿಕೇಶನ್​ ಮತ್ತೆ ಬದಲಿದೆ ಎಂದು ಕಂಪನಿ ಹೇಳಿದೆ.

ಹೌದು, BGMI ತಯಾರಕ ಕ್ರಾಫ್ಟನ್ ಅಧಿಕೃತವಾಗಿ ಬ್ಯಾಟಲ್ ಗ್ರೌಂಡ್ಸ್ ಮೊಬೈಲ್ ಇಂಡಿಯಾ (BGMI) ಅನ್ನು ಭಾರತೀಯ ಗೇಮಿಂಗ್ ವಲಯಕ್ಕೆ ಹಿಂತಿರುಗಿಸುವುದಾಗಿ ಘೋಷಿಸಿದೆ. ಈ ಮೂಲಕ ಮತ್ತೆ ದೇಶದಲ್ಲಿ ಸಂಚಲನ ಸೃಷ್ಟಿಸಲಿದೆ ಎನ್ನಬಹುದು.

ಭದ್ರತಾ ಕಾಳಜಿಯ ಕಾರಣದಿಂದಾಗಿ PUBG ಯನ್ನು ಭಾರತದಲ್ಲಿ ಅಧಿಕೃತವಾಗಿ ಬ್ಯಾನ್ ಮಾಡಲಾಗಿತ್ತು. ಆದರ ಇದೀಗ ಮತ್ತೆ ಪ್ರಾರಂಭಿಸುವ ಬಗ್ಗೆ ಅಂತಿಮ ನಿರ್ಧಾರವನ್ನು ತೆಗೆದುಕೊಳ್ಳುವ ಮೊದಲು ಈ ಆಟವು 90 ದಿನಗಳ ಕಟ್ಟುನಿಟ್ಟಾದ ಮೇಲ್ವಿಚಾರಣೆ ಅವಧಿಗೆ ಒಳಗಾಗುತ್ತದೆ ಎಂದು ಭಾರತ ಸರ್ಕಾರ ಹೇಳಿದೆ.

"ಇನ್ನು ಈ ಅಪ್ಲಿಕೇಶನ್​ ಸರ್ವರ್ ಸ್ಥಳಗಳು ಮತ್ತು ಡೇಟಾ ಭದ್ರತೆಯಂತಹ ಇತ್ಯಾದಿ ಸಮಸ್ಯೆಗಳನ್ನು ಕಂಡುಕೊಳ್ಳುವ ಉದ್ದೇಶಕ್ಕಾಗಿ #BGMI ಯನ್ನು 3 ತಿಂಗಳ ಪ್ರಾಯೋಗಿಕವಾಗಿ ಪರೀಕ್ಷಿಸಲಾಗುವುದು " ಎಂದು ಕೇಂದ್ರ ಎಲೆಕ್ಟ್ರಾನಿಕ್ಸ್ ಮತ್ತು ಐಟಿ ರಾಜ್ಯ ಸಚಿವ ರಾಜೀವ್ ಚಂದ್ರಶೇಖರ್ ಟ್ವೀಟ್ ಮಾಡಿದ್ದಾರೆ.

ಕ್ರಾಫ್ಟನ್ ಇಂಕ್ ಇಂಡಿಯಾದ ಸಿಇಒ ಸೀನ್ ಹ್ಯುನಿಲ್ ಸೋಹ್ನ್, “ಬ್ಯಾಟಲ್​ಗ್ರೌಂಡ್ಸ್​ ಮೊಬೈಲ್ ಇಂಡಿಯಾ (ಬಿಜಿಎಂಐ) ಗೇಮಿಂಗ್ ಅಪ್ಲಿಕೇಶನ್​ ಅನ್ನು ಪುನರಾರಂಭಿಸಲು ನಮಗೆ ಅವಕಾಶ ಮಾಡಿಕೊಟ್ಟಿದ್ದಕ್ಕಾಗಿ ನಾವು ಭಾರತೀಯ ಅಧಿಕಾರಿಗಳಿಗೆ ಕೃತಜ್ಞರಾಗಿರುತ್ತೇವೆ. ಕಳೆದ ಕೆಲವು ತಿಂಗಳುಗಳಿಂದ ನಮ್ಮ ಭಾರತೀಯ ಗೇಮಿಂಗ್ ಸಮುದಾಯದ ಬೆಂಬಲ ಮತ್ತು ತಾಳ್ಮೆಗಾಗಿ ನಾವು ನಮ್ಮ ಕೃತಜ್ಞತೆಯನ್ನು ಸಲ್ಲಿಸಲು ಬಯಸುತ್ತೇವೆ. BATTLEGROUNDS MOBILE INDIA ಶೀಘ್ರದಲ್ಲೇ ಡೌನ್‌ಲೋಡ್‌ಗೆ ಲಭ್ಯವಾಗಲಿದೆ ಎಂದು ಘೋಷಿಸಲು ನಾವು ಉತ್ಸುಕರಾಗಿದ್ದೇವೆ ಎಂದು ಹೇಳಿದ್ದಾರೆ.

ಜುಲೈ 28, 2022 ರಂದು ಐಟಿ ಸೆಕ್ಷನ್ ACT 69A ಅಡಿಯಲ್ಲಿ ನಿಷೇಧಿಸಲಾದ Google Play Store ಮತ್ತು Apple App Store ನಿಂದ ಗೇಮ್ ಅನ್ನು ತೆಗೆದುಹಾಕಿ ಸುಮಾರು 10 ತಿಂಗಳಾಗಿದೆ. ಆದರೆ ಶೀಘ್ರದಲ್ಲೇ ಈ ಅಪ್ಲಿಕೇಶನ್​ಗಳಿಗೆ ಬ್ಯಾಟಲ್​ಗ್ರೌಂಡ್ಸ್​ ಮೊಬೈಲ್ ಇಂಡಿಯಾ ಈ ಸೈಟ್​ಗಳಲ್ಲಿ ಡೌನ್​ಲೋಡ್​ಗೆ ಲಭ್ಯವಾಗಲಿದೆ.