Facebook: ಉದ್ದೇಶಪೂರ್ವಕವಾಗಿ ಬ್ಯಾಟರಿ ಖಾಲಿ ಮಾಡುತ್ತಾ ಫೇಸ್​ಬುಕ್? ಶಾಕಿಂಗ್ ರಹಸ್ಯ ಬಿಚ್ಚಿಟ್ಟ ಮಾಜಿ ಉದ್ಯೋಗಿ!

ಈ ಹಿಂದೆ ಕಂಪನಿಯಲ್ಲಿ ಡೇಟಾ ಸೈಂಟಿಸ್ಟ್​ ಆಗಿ ಕೆಲಸ ಮಾಡಿದ ಮಾಜಿ ಫೇಸ್‌ಬುಕ್ ಉದ್ಯೋಗಿ ಜಾರ್ಜ್ ಹೇವರ್ಡ್ ಮಾತನಾಡಿ, ಮೆಟಾ ಒಡೆತನದ ಫೇಸ್​ಬುಕ್ ನೆಗೆಟಿವ್ ಟೆಸ್ಟಿಂಗ್​ಗೆ ಸೇರಲು ನಿರಾಕರಿಸಿದ್ದಕ್ಕೆ ವಜಾಗೊಳಿಸಲಾಗಿದೆ ಎಂದು ಹೇಳಿದ್ದಾರೆ.

ಈ ಬಗ್ಗೆ ಮತ್ತಷ್ಟು ಮಾತನಾಡಿದ ಜಾರ್ಜ್, 'ನಾನು ನನ್ನ ಮ್ಯಾನೇಜರ್‌ಗೆ ಅದು ಯಾರಿಗಾದರೂ ಹಾನಿ ಮಾಡುತ್ತದೆ ಎಂದು ಎಚ್ಚರಿಸಿದ್ದೆ. ಆದರೆ ಇದಕ್ಕೆ ಪ್ರತಿಕ್ರಿಯಿಸಿದ್ದ ಮ್ಯಾನೇಜರ್ ಕೆಲವರಿಗೆ ಹಾನಿ ಮಾಡಿದರೂ ಹೆಚ್ಚು ಜನರಿಗೆ ಸಹಾಯ ಮಾಡಬಹುದು ಎಂದು ಹೇಳಿದರು ಎಂದಿದ್ದಾರೆ.

ನವೆಂಬರ್‌ನಲ್ಲಿ ಜಾರ್ಜ್ ಅವರನ್ನು ಫೇಸ್‌ಬುಕ್‌ನಿಂದ ವಜಾಗೊಳಿಸಲಾಗಿತ್ತು. ಅವರು ಮೂಲತಃ ಮ್ಯಾನ್‌ಹ್ಯಾಟನ್ ಫೆಡರಲ್ ಕೋರ್ಟ್‌ನಲ್ಲಿ ಟೆಕ್ ಕಂಪನಿಯ ವಿರುದ್ಧ ಮೊಕದ್ದಮೆ ಹೂಡಿದ್ದರು.

ಮೂವತ್ತಮೂರು ವರ್ಷದ ಜಾರ್ಜ್ ಫೇಸ್‌ಬುಕ್‌ನ ಮೆಸೆಂಜರ್ ಅಪ್ಲಿಕೇಶನ್ ಅಭಿವೃದ್ಧಿಯಲ್ಲಿ ನೇರವಾಗಿ ತೊಡಗಿಸಿಕೊಂಡಿದ್ದರು.

ಮೊಕದ್ದಮೆಯಲ್ಲಿ, ಹೇವರ್ಡ್ ಅವರ ವಕೀಲ ಡಾನ್ ಕೈಸರ್ ಅವರು ಬಳಕೆದಾರರ ಸ್ಮಾರ್ಟ್‌ಫೋನ್‌ನ ಬ್ಯಾಟರಿಯನ್ನು ಖಾಲಿ ಮಾಡುವುದರಿಂದ ಅವರು ಅಪಾಯಕ್ಕೆ ಸಿಲುಕಬಹುದು ಎಂದು ಹೇಳಿದ್ದರೆಂದೂ ತಿಳಿಸಿದ್ದಾರೆ.

ಆದಾಗ್ಯೂ, ಮೆಟಾ ಅವರ ಉದ್ಯೋಗದ ನಿಯಮಗಳಂತೆ ಹೇವರ್ಡ್ ತನ್ನ ಮೊಕದ್ದಮೆಯನ್ನು ಕೈಬಿಡುವಂತೆ ಒತ್ತಾಯಿಸಿತ್ತು. ಅಲ್ಲದೇ ಪ್ರಕರಣವನ್ನು ಮಧ್ಯಸ್ಥಿಕೆಗೆ ಒಳಪಡಿಸಿತು. ಫೋನ್ ಅರೆನಾ ತನ್ನ ವರದಿಯೊಂದರಲ್ಲಿ ಈ ಮಾಹಿತಿಯನ್ನು ನೀಡಿದೆ.

ಕೈಸರ್ ಪ್ರಕಾರ, ಫೇಸ್‌ಬುಕ್‌ನಂತಹ ಸಾಮಾಜಿಕ ಮಾಧ್ಯಮ ದೈತ್ಯರು ಉದ್ದೇಶಪೂರ್ವಕವಾಗಿ ನಿಮ್ಮ ಬ್ಯಾಟರಿಯನ್ನು ಖಾಲಿ ಮಾಡಬಹುದು ಎಂದು ಹೆಚ್ಚಿನ ಜನರಿಗೆ ತಿಳಿದಿಲ್ಲ. ಕಂಪನಿಯು ಈ ಹಿಂದೆಯೂ ಅವರಿಗೆ ತರಬೇತಿ ದಾಖಲೆಯನ್ನು ನೀಡಿತ್ತು ಎಂದು ಹೇವರ್ಡ್ ಮಾಹಿತಿ ನೀಡಿದರು.

ಈ ಡಾಕ್ಯುಮೆಂಟ್‌ನ ಶೀರ್ಷಿಕೆಯು 'ನೆಗೆಟಿವ್ ಟೆಸ್ಟಿಂಗ್ ಹೇಗೆ ಮಾಡುವುದು' ಎಂದಾಗಿದೆ. ಹೀಗಿರುವಾಗ ಮೆಟಾ ಸಾಮಾನ್ಯವಾಗಿ ಇಂತಹ ಟೆಸ್ಟ್​ ನಡೆಸುತ್ತದೆ ಎಂದು ಹೇಳಬಹುದು.