ಅತೀ ಕಡಿಮೆ ಬೆಲೆಗೆ ಬರಲಿದೆ IPhone​, ಸಖತ್ತಾಗಿದೆ ಇದರ ಫೀಚರ್ಸ್​​!

ಲಕ್ಸುರಿ ಫೋನ್‌ಗೆ ಮತ್ತೊಂದು ಹೆಸರೇ ಐಫೋನ್. ಲಕ್ಷಕ್ಕಿಂತ ಹೆಚ್ಚಿನ ಬೆಲೆಯಲ್ಲಿ ಬರುತ್ತಿರುವ ಹೊಸ ಹೊಸ ಐಫೋನ್‌ ಸರಣಿಗಳು ಸಾಮಾನ್ಯ ಜನರ ಕೈಗೆ ಎಟಕುವಂತಹ ಫೋನ್‌ಗಳಲ್ಲ. ಐಫೋನ್‌ ಅಂದರೆ ದುಡ್ಡಿದ್ದವರಿಗೆ ಮಾತ್ರ ಅನ್ನುವಂತಿದೆ ಅದರ ಬೆಲೆಗಳು. ಐಫೋನ್‌ ಖರೀದಿ ಮಾಡಬೇಕು, ಅದನ್ನು ಬಳಕೆ ಮಾಡಬೇಕು ಎನ್ನುವುದು ಫೋನ್‌ ಬಳಕೆದಾರರ ಒಂದು ಕನಸು. ಆದರೆ ಬಜೆಟ್‌ ಅಂತಾ ಬಂದಾಗ ಕಡಿಮೆ ಬೆಲೆಯ ಫೋನ್‌ಗಳ ಮೇಲೆ ನಮ್ಮ ಕಣ್ಣು ಹೋಗುವುದು.

ಇದಕ್ಕೆ ಆಪಲ್‌ ಕಂಪನಿ ಭಾರತೀಯ ಮಾರುಕಟ್ಟೆಯನ್ನು ಗುರಿಯಾಗಿಟ್ಟುಕೊಂಡು ಬಜೆಟ್ ಸ್ನೇಹಿ ಐಫೋನ್‌ವೊಂದನ್ನು ಬಿಡುಗಡೆ ಮಾಡುತ್ತಿದೆ.

ಬಜೆಟ್‌ ಸ್ನೇಹಿ ಐಫೋನ್‌ SE 4:  ಐಫೋನ್‌ 14ರ ನಂತರ ಐಫೋನ್ 15 ಸರಣಿಯ ನಿರ್ಮಾಣದಲ್ಲಿ ಆಪಲ್ ತೊಡಗಿಸಿಕೊಂಡಿದ್ದು ಅದರ ಜೊತೆ ಜೊತೆಯಲ್ಲಿಯೇ ಬಜೆಟ್‌ ಐಫೋನ್‌ SE 4 ಮೇಲೂ ಕೆಲಸ ಮಾಡುತ್ತಿದೆ ಎಂದು ವರದಿಗಳು ತಿಳಿಸಿವೆ.

2024 ರಲ್ಲಿಯೇ ಬಿಡುಗಡೆ: ಆಪಲ್‌ ಕಂಪನಿ ಎಲ್ಲರೂ ಖರೀದಿ ಮಾಡಲು ಸಾಧ್ಯವಾಗುವಂತಹ ಬೆಲೆಯಲ್ಲಿ ಐಫೋನ್ SE 4 ಅನ್ನು ಬಿಡುಗಡೆ ಮಾಡುತ್ತದೆ ಎಂದು ಹೇಳಲಾಗುತ್ತಿದೆ. ಹಾಗೇ ಈ ಫೋನ್‌ ಖರೀದಿಸಲು ಬಳಕೆದಾರರು ಹೆಚ್ಚಿನ ಸಮಯ ಕೂಡ ಕಾಯಬೇಕಿಲ್ಲ, ಏಕೆಂದರೆ ಇದು ಮಂದಿನ ವರ್ಷ ಅಂದರೆ 2024 ರಲ್ಲಿಯೇ ಬಿಡುಗಡೆಯಾಗುವ ಸಾಧ್ಯತೆಗಳಿವೆ.

ಹೇಗಿರಲಿದೆ ಬಜೆಟ್‌ ಬೆಲೆಯ ಐಫೋನ್‌ SE 4 : ಐಫೋನ್ SE 4 ಐಫೋನ್ SE ವಿನ್ಯಾಸದ ಮುಂದುವರೆದ ಭಾಗವಾಗಿರಲಿದೆ. ಹೆಚ್ಚು ಕಮ್ಮಿ ಹೊಸ ಮಾದರಿಗಳನ್ನು ಹೋಲುವ ವೈಶಿಷ್ಟ್ಯಗಳಿದ್ದರೂ ಕೆಲ ಅಗ್ಗದ ವಸ್ತುಗಳನ್ನು ಬಳಸುವ ಮೂಲಕ ವೆಚ್ಚವನ್ನು ಕಡಿತಗೊಳಿಸಬಹುದು.

ಪ್ಯಾನೆಲ್: Apple iPhone SE 4 ನಲ್ಲಿ ಅಗ್ಗದ OLED ಪ್ಯಾನೆಲ್ ಅನ್ನು ಬಳಸುವ ಮೂಲಕ ವೆಚ್ಚವನ್ನು ಕಡಿತಗೊಳಿಸಬಹುದು ಎನ್ನಲಾಗಿದೆ. ಐಫೋನ್ SE 4 ಐಫೋನ್ 14 ತರಹದ ವಿನ್ಯಾಸವನ್ನು ಹೊಂದಿರುತ್ತದೆ ಎಂದು ಹೇಳಲಾಗುತ್ತಿದ್ದು, ಅಂದರೆ ಸುತ್ತಲೂ ನಾಚ್ ಮತ್ತು ಸ್ಲಿಮ್ ಬೆಜೆಲ್‌ಗಳು ಇರುತ್ತವೆ.

ಕ್ಯಾಮೆರಾ: ಐಫೋನ್ SE 4 ಡ್ಯುಯಲ್ ಹಿಂಬದಿಯ ಕ್ಯಾಮೆರಾ ವ್ಯವಸ್ಥೆಯನ್ನು ಸಹ ಹೊಂದಿರುವ ಸಾಧ್ಯತೆ ಇದೆ. ಈ ಹಿಂದೆ ಬಂದ SE ಸರಣಿಗೆ ಹೋಲಿಸಿದರೆ ಐಫೋನ್ SE 4 ಹಲವು ಅಪ್‌ಡೇಟ್‌ ಜೊತೆ ಬರಲಿದೆ.

ಚಿಪ್‌ಸೆಟ್ ಮತ್ತು ಡಿಸ್ಪ್ಲೇ: ಐಫೋನ್ SE 4,‌ ಕೊನೆಗೆ ಬಂದ ಐಫೋನ್ 14 ನಂತೆಯೇ A15 ಬಯೋನಿಕ್ ಚಿಪ್‌ಸೆಟ್ ಅನ್ನು ಹೊಂದಿರಬಹುದು. ಮತ್ತು ಈ ಫೋನ್‌ 6.1-ಇಂಚಿನ ಡಿಸ್ಪ್ಲೇ ಅನ್ನು ಹೊಂದಿರುತ್ತದೆ.

ಬೆಲೆ: ಐಫೋನ್ SE 4 ಬೆಲೆ ಬಗ್ಗೆ ಇನ್ನೂ ಸಹ ಯಾವುದೇ ಮಾಹಿತಿ ಇಲ್ಲ. ತಜ್ಞರು ಹೇಳುವ ಪ್ರಕಾರ ಹೊಸದಾಗಿ ಬರುವ ಈ ಫೋನ್‌ ಹೆಚ್ಚುಕಮ್ಮಿ ಐಫೋನ್‌ SE ಬೆಲೆಗಳ ಮಾದರಿಯನ್ನೇ ಹೋಲಬಹುದು ಎಂದಿದ್ದಾರೆ.

ಮಾರುಕಟ್ಟೆಯಲ್ಲಿರುವ iPhone SE ಮಾದರಿಯ ಬೆಲೆ ಭಾರತದಲ್ಲಿ 49,990 ರೂ.ಗಳಿಂದ ಪ್ರಾರಂಭವಾಗುತ್ತದೆ. ಹೀಗಾಗಿ ಮುಂಬರುವ ಐಫೋನ್ SE 4 ಆಸುಪಾಸು ಇದೇ ಬೆಲೆಯನ್ನು ಹೊಂದಿರಬಹುದೆಂದು ನಿರೀಕ್ಷಿಸಲಾಗಿದೆ.