Mobile: ಬೆಂಗಳೂರಿಗರು ಮಲಗ್ತಾ ಮಲಗ್ತಾ ಮೊಬೈಲ್‌ನಲ್ಲಿ ಇವನ್ನೆಲ್ಲಾ ನೋಡ್ತಾರಂತೆ! ಸಮೀಕ್ಷೆಯಲ್ಲಿ ಹೊರಬಿತ್ತು ಸ್ಫೋಟಕ ಮಾಹಿತಿ

ಸ್ಮಾರ್ಟ್​ಫೋನ್​ಗಳು ಇಂದಿನ ದಿನದಲ್ಲಿ ಪ್ರತಿಯೊಬ್ಬರ ಅಗತ್ಯ ಸಾಧನವಾಗಿಬಿಟ್ಟಿದೆ. ಎದ್ದರೂ, ಕೂತರೂ, ಎಲ್ಲಿ ಹೋದರೂ ಕೈಯಲ್ಲೊಂದು ಸ್ಮಾರ್ಟ್​​ಫೋನ್ ಇದ್ದೇ ಇರುತ್ತದೆ. ಒಂದು ಹೊತ್ತಿನ ಊಟ ಇಲ್ಲದಿದ್ದರೂ ಇಂದು ಸುಮ್ಮನಿರುತ್ತಾರೆ. ಆದರೆ ಸ್ಮಾರ್ಟ್​ಫೋನ್​ ಇಲ್ಲದಿದ್ದರೆ ಒಂದು ನಿಮಿಷವೂ ಇರುವುದಿಲ್ಲ. ಅಷ್ಟು ಮೊಬೈಲ್ ಅನ್ನು ಹಚ್ಚಿಕೊಂಡಿದ್ದಾರೆ.

ಸ್ಮಾರ್ಟ್​​ಫೋನ್​ಗಳು ಎಷ್ಟು ಉಪಯೋಗವೋ ಅಷ್ಟೇ ಅದರಿಂದ ದುರುಪಯೋಗ ಸಹ ಇದೆ. ಯಾವುದೇ ಕೆಲಸವನ್ನು ಈಗ ನಾವು ಕ್ಷಣಮಾತ್ರದಲ್ಲಿ ಸ್ಮಾರ್ಟ್​​​ಫೋನ್​ನಲ್ಲೇ ಮಾಡಿಮುಗಿಸಬಹುದು. ಒಂದು ರೀತಿಯಲ್ಲಿ ಮೊಬೈಲ್​ ಅನ್ನು ಮಿನಿ ಲ್ಯಾಪ್​ಟಾಪ್​​ ಎಂದರೂ ತಪ್ಪಾಗುವುದಿಲ್ಲ. ಆದರೆ ಇದರಿಂದ ಎಷ್ಟೋ ಜನರು ಆರೋಗ್ಯದ ಸಮಸ್ಯೆಯನ್ನೂ ಎದುರಿಸುತ್ತಿದ್ದಾರೆ.

ಇನ್ನು ಬೆಂಗಳೂರಿನಲ್ಲೊಂದು ಮೊಬೈಲ್​​ ಬಳಕೆಯ ಬಗ್ಗೆ ಸಮೀಕ್ಷೆ ನಡೆಸಿದ್ದು,ಈ ಸಮೀಕ್ಷೆಯ ಪ್ರಕಾರ ಸ್ಮಾರ್ಟ್​ಫೋನ್ ಅನ್ನು ಬಹಳಷ್ಟು ಜನರು ಬಳಸುತ್ತಾರೆ, ಇದರಲ್ಲಿ ಎಷ್ಟೋ ಜನರನ್ನು ಮೊಬೈಲ್​​ನಿಂದ ಬೇರ್ಪಡಿಸಲು ಆಗುವುದೇ ಇಲ್ಲ ಎಂದು ತಿಳಿದುಬಂದಿದೆ.

ಇನ್ನು ಮೊಬೈಲ್​​ ಬಳಕೆಯ ಬಗ್ಗೆ ಸಮೀಕ್ಷೆ ನಡೆಸಿದಾಗ, ಅದಕ್ಕೆ ಬಂದ ಪ್ರತಿಕ್ರಿಯೆಯಲ್ಲಿ ಶೇಕಡಾ 91 ರಷ್ಟು ಜನರು ಮಲಗುವ ಮೊದಲು ಹಾಸಿಗೆ, ಬೆಡ್​ನಲ್ಲೇ ಸ್ಮಾರ್ಟ್​ಫೋನ್ ಅನ್ನು ಬಳಸುತ್ತಾರೆ ಎಂದು ಹೇಳಲಾಗಿದೆ. ಇನ್ನು ಇದರಲ್ಲಿ ಶೇಕಡಾ 31 ರಷ್ಟು ಜನರು ಸೋಶಿಯಲ್ ಮೀಡಿಯಾಗಳನ್ನು ಬಳಸುತ್ತಿದ್ರೆ, ಹಾಗೆಯೇ ಶೇಕಡಾ 29 ರಷ್ಟು ಜನರು ಕೆಲಸದಿಂದ ವಜಾಗೊಂಡ ಕಾರಣ ನಿದ್ದೆಯಿಲ್ಲದೆ ಪರದಾಡುತ್ತಿದ್ದಾರೆ ಎಂದು ತಿಳಿದುಬಂದಿದೆ.

ಇನ್ನು ನಿದ್ರೆಗೆ ಸಂಬಂಧಿಸಿದಂತೆ ಹಾಸಿಗೆ ತಯಾರಿಕ ವೇಕ್​ಫಿಟ್​​ನಿಂದ ಫೆಬ್ರವರಿ 2022 ರಿಂದ ಮಾರ್ಚ್ 2023ರವರೆಗೆ ಬೆಂಗಳೂರು ಮತ್ತು ದೇಶದ ಕೆಲ ಪ್ರದೇಶಗಳಲ್ಲಿ ‘ಗ್ರೇಟ್​ ಇಂಡಿಯನ್ ಸ್ಲೀಪ್​ ಸ್ಕೋರ್​​ಗಾರ್ಡ್​’ ಎಂಬ ಟೈಟಲ್​​ ಮೂಲಕ ಸಮೀಕ್ಷೆ ನಡೆಸಲಾಯಿತು.

ಇನ್ನು ಈ ಸಮೀಕ್ಷೆಯಲ್ಲಿ ಒಟ್ಟು 10 ಸಾವಿರ ಜನರು ಒಳಪಟ್ಟಿದ್ದರು. ಅದರಲ್ಲಿ ಬೆಂಗಳೂರಿನಿಂದ 4 ಸಾವಿರ ಜನರಿದ್ದರು. ಇವರಲ್ಲಿ ಬೇರೆ ಬೇರೆ ರೀತಿಯಲ್ಲಿ, ವಯಸ್ಸಿಗೆ ಅನುಗುಣವಾಗಿ, ಈ ರೀತಿಯಲ್ಲೆಲ್ಲಾ ಸಮೀಕ್ಷೆಯನ್ನು ಮಾಡಿದ್ದಾರೆ.

ಈ ಸಮೀಕ್ಷೆಯಲ್ಲಿ ಶೇಕಡಾ 26ರಷ್ಟು ಜನರಿಗೆ ನಿದ್ರಾಹೀನತೆ ಸಮಸ್ಯೆ ಎದುರಾಗಿದೆ ಎನ್ನಲಾಗಿದೆ. ಅದ್ರಲ್ಲೂ ಶೇಕಡಾ 61 ರಷ್ಟು ಜನರು ರಾತ್ರಿ 11 ಗಂಟೆಯ ನಂತರ ಮಲಗುವವರು ಎಂದು ಪ್ರತಿಕ್ರಿಯಿಸಿದ್ದಾರೆ. ಇನ್ನು ಬೆಂಗಳೂರಿನಲ್ಲಿ ಪ್ರತಿಕ್ರಿಯಿಸಿದವರಲ್ಲಿ ಶೇ 29 ರಷ್ಟು ಜನರು ಬೆಳಿಗ್ಗೆ 7 ರಿಂದ 8 ಗಂಟೆಯವರೆಗೆ ಮತ್ತು ಶೇ.60 ರಷ್ಟು ಜನರು ಕೆಲಸದ ಸಮಯದಲ್ಲಿ ಮಲಗುತ್ತಾರೆ ಎಂದು ಹೇಳಿದ್ದಾರೆ.

ಇನ್ನು ಸಮೀಕ್ಷೆಯನ್ನು ನೋಡಿದ ನ್ಯಾಷನಲ್ ಇನ್​ಸ್ಟಿಟ್ಯೂಟ್​ ಆಫ್​ ಹೆಲ್ತ್​ ಆ್ಯಂಡ್​ ನ್ಯೂರೋಸೈನ್ಸ್​​ನಲ್ಲಿ ಕ್ಲಿನಿಕಲ್​ ಪ್ರೊಫೆಸರ್​ ಆಗಿ ಕಾರ್ಯನಿರ್ವಹಿಸುತ್ತಿರುವ ಡಾ. ಮನೋಜ್ ಕುಮಾರ್​ ಶರ್ಮಾ ಅವರ ಪ್ರಕಾರ, ವಯಸ್ಕರು ದಿನಕ್ಕೆ 6 ರಿಂದ 7 ರವರೆಗೆ ನಿದ್ರೆ ಮಾಡಬೇಕಾಗುತ್ತದೆ. ಇದಕ್ಕಾಗಿ ಸ್ಮಾರ್ಟ್​​ಫೋನ್​ ಬಳಕೆಯನ್ನು ಕಡಿಮೆ ಮಾಡೋದು ಉತ್ತಮ ಎಂದಿದ್ದಾರೆ.