Rummy: ಪಬ್​​ಜಿ ಬೆನ್ನಲ್ಲೇ ಬ್ಯಾನ್ ಆಯ್ತು ರಮ್ಮಿ, ಪೋಕರ್!; ಯಾವ ರಾಜ್ಯದಲ್ಲಿ ಗೊತ್ತಾ?

ಕೇಂದ್ರ ಸರ್ಕಾರ ಬುಧವಾರದಂದು 118 ಆ್ಯಪ್​​ಗಳನ್ನು ಬ್ಯಾನ್ ಮಾಡಿದೆ. ಅದರಲ್ಲಿ ಜನಪ್ರಿಯವಾಗಿದ್ದ ಪಬ್​ಜಿ ಆ್ಯಪ್ ಅನ್ನು ಕೂಡ ನಿಷೇಧ ಮಾಡಿದೆ.

ಇದೀಗ ಆಂಧ್ರ ಪ್ರದೇಶ ಸರ್ಕಾರ  ಆನ್​ಲೈನ್​ ರಮ್ಮಿ ಮತ್ತು ಪೋಕರ್ ಗೇಮ್​ ಅನ್ನು ನಿಷೇಧ ಮಾಡಿದೆ. ಆ ಮೂಲಕ  ಜನರು ಆನ್​ಲೈನ್​ ಗೇಮ್​ಗಳ ವ್ಯಸನಗಳಿಗೆ ತುತ್ತಾದಂತೆ ದಿಟ್ಟ ನಿರ್ಧಾರ ಕೈಗೊಂಡಿದೆ.

ಇತ್ತೀಚೆಗೆ ಯುವ ಜನರು ಆನ್​ಲೈನ್​ ಗೇಮ್​ಗಳ ಮೊರೆ ಹೋಗುತ್ತಿದ್ದಾರೆ. ಮಾತ್ರವಲ್ಲದೆ ಅದರ ವ್ಯಸನಕ್ಕೆ ತುತ್ತಾಗುತ್ತಿದ್ದಾರೆ. ಹಾಗಾಗಿ ಇಂತಹ ಸ್ಥಿತಿಗತಿ ನಿರ್ಮಾಣವಾಗದಂತೆ ಆಂಧ್ರ ಪ್ರದೇಶ ಸರ್ಕಾರ  ಎಚ್ಚೆತ್ತುಕೊಂಡು ರಮ್ಮಿ, ಪೋಕರ್ ಗೇಮ್ ಅನ್ನು ತಮ್ಮ ರಾಜ್ಯದಲ್ಲಿ ನಿಷೇಧಿಸಿದೆ.

ಆಂಧ್ರ ಪ್ರದೇಶದ ಮುಖ್ಯಮಂತ್ರಿ ಜಗನ್ ಮೋಹನ್ ರೆಡ್ಡಿ ನೇತೃತ್ವದಲ್ಲಿ ನಡೆದ ಕ್ಯಾಬಿನೆಟ್ ಸಭೆಯಲ್ಲಿ ಈ ನಿರ್ಧಾರ ಕೈಗೊಳ್ಳಲಾಗಿದೆ.

ಇನ್ನು ಆನ್​ಲೈನ್​ ಜೂಜಾಟ ಸಂಘಟಕರಿಗೆ ಒಂದು ವರ್ಷ ಜೈಲು ಶಿಕ್ಷೆಯನ್ನು ಹಾಗೂ ದಂಡವನ್ನು ವಿಧಿಸಲಾಗುವುದು ಎಂದು ಆಂಧ್ರ ಸರ್ಕಾರ ಎಚ್ಚರಿಕೆ ನೀಡಿದೆ.

ಅದರಂತೆ ನಿಷೇಧದ ನಂತರ ರಮ್ಮಿ, ಪೋಕರ್ ಅಪ್ಲಿಕೇಶನ್ ಬಳಸಿದರೆ ಅವರಿಗೆ ಆರು ತಿಂಗಳ ಶಿಕ್ಷೆಯನ್ನು ವಿಧಿಸಲಾಗುವುದು ಎಂದಿದೆ.

ಈ ಮೊದಲು ಕರ್ನಾಟಕದಲ್ಲೂ ರಮ್ಮು ಆನ್​​ಲೈನ್​ ಗೇಮ್​  ಬಗ್ಗೆ ದೊಡ್ಡದಾಗಿ ಚರ್ಚೆ ಶುರುವಾಗಿತ್ತು. ಸ್ಯಾಂಡಲ್ವುಡ್ ನಟ ರಮ್ಮಿ ಜಾಹೀರಾತಿನಲ್ಲಿ ಕಾಣಿಸಿಕೊಂಡಿದ್ದಕ್ಕೆ ಸಾಮಾಜಿಕ ಜಾಲತಾಣದಲ್ಲಿ ಚರ್ಚೆ ಶುರುವಾಗಿತ್ತು.

ಕಿಚ್ಚ ಸುದೀಪ್ ರಮ್ಮಿ ಜಾಹೀರಾತಿನಲ್ಲಿ ಕಾಣಿಸಿಕೊಂಡಿದ್ದಕ್ಕೆ ಬರಹಗಾರ ಆಹೋರಾತ್ರ ಅವರು ಆಕ್ಷೇಷ ವ್ಯಕ್ತಪಡಿಸಿದ್ದರು. ಸ್ಟಾರ್ ನಟರೊಬ್ಬರು ಜೂಜಾಟಕ್ಕೆ ಪ್ರಚೋದನೆ ನೀಡುವ ಜಾಹೀರಾತಿನಲ್ಲಿ ಕಾಣಿಸಿಕೊಳ್ಳುವ ಮೂಲಕ ಜನರಿಗೆ ತಪ್ಪು ಮಾಹಿತಿ ನೀಡುತ್ತಿದ್ದಾರೆ ಎಂದಿದ್ದರು.