WhatsApp: ಅಪರಿಚಿತರಿಂದ ಕಾಲ್​​ ಬರ್ತಾ ಇದ್ರೆ ಟೆನ್ಷನ್​ ಬೇಡ, ವಾಟ್ಸಾಪ್​ನಲ್ಲಿ ಬರ್ತಿದೆ ‘ಮ್ಯೂಟ್​‘ ಮಾಡೋ ಫೀಚರ್​

ಜನಪ್ರಿಯ ಮೆಸೇಜಿಂಗ್ ಪ್ಲಾಟ್‌ಫಾರ್ಮ್ ವಾಟ್ಸಾಪಪ್​ ಪ್ರಪಂಚದಾದ್ಯಂತ ಇತ್ತೀಚೆಗೆ ಬಹಳಷ್ಟು ಜನಪ್ರಿಯತೆಯನ್ನು ಪಡೆದಿದೆ. ಕುಟುಂಬದ ಸದಸ್ಯರಿಂದ ಪರಿಚಯಸ್ಥರವರೆಗೂ ಅನೇಕ ಜನರು ಸಂವಹನಕ್ಕಾಗಿ ವಾಟ್ಸಾಪ್ ಅನ್ನು ಅವಲಂಬಿಸಿದ್ದಾರೆ. ಆದರೆ ಲಕ್ಷಾಂತರ ಜನರು ಬಳಸುವ ವಾಟ್ಸಾಪ್​​ನಲ್ಲಿ ಕೆಲವು ಪ್ರಮುಖ ಗೌಪ್ಯತೆ ವೈಶಿಷ್ಟ್ಯಗಳ ಕೊರತೆಯಿಂದ ಅನೇಕ ಜನರು ತೊಂದರೆಗೊಳಗಾಗಿದ್ದಾರೆ. ಆದರೆ ಈ ಎಲ್ಲಾ ಸಮಸ್ಯೆಗಳನ್ನು ನಿವಾರಿಸಲು ವಾಟ್ಸಾಪ್ ಇದೀಗ ಹೊಸ ಫೀಚರ್ ಅನ್ನು ಪರಿಚಯಿಸಿದೆ.

ತಿಳಿದಿರುವ ಕಾಂಟ್ಯಾಕ್ಟ್​​ಗಳನ್ನು ಬ್ಲಾಕ್​ ಮಾಡುವ ಸೌಲಭ್ಯವನ್ನು ವಾಟ್ಸಾಪ್​ ಹೊಂದಿದೆ ಆದರೆ ಹೊಸ ಸಂಖ್ಯೆಗಳಿಂದ ಬಂದ ಕರೆಗಳನ್ನು ನಿರ್ಬಂಧಿಸಲು ಅಥವಾ ಮ್ಯೂಟ್​​ ಗೊಳಿಸಲು ಯಾವುದೇ ಆಯ್ಕೆಗಳಿಲ್ಲ. ಆದರೆ ಈ ಸಮಸ್ಯೆಯನ್ನು ಹೋಗಲಾಡಿಸಲು ವಾಟ್ಸಾಪ್​ ಪ್ರಸ್ತುತ "Silence Unknown Callers" ವೈಶಿಷ್ಟ್ಯದಲ್ಲಿ ಕಾರ್ಯನಿರ್ವಹಿಸುತ್ತಿದೆ.

ಸ್ಕ್ಯಾಮ್ ಕರೆಗಳಿಗಾಗಿ ಪರಿಶೀಲಿಸಿ: ಈ ವೈಶಿಷ್ಟ್ಯವು ಬಳಕೆದಾರರಿಗೆ ಪರಿಚಿತ ಸಂಖ್ಯೆಗಳಿಂದ ಕರೆಗಳ ಮಾಹಿತಿಯ ನಾಟಿಫಿಕೇಶನ್​ ಮತ್ತು ಕಾಲ್​ ಲೀಸ್ಟ್​ನಲ್ಲಿ ಪ್ರದರ್ಶಿಸಿದಾಗ ಅವುಗಳನ್ನು ಮ್ಯೂಟ್​ ಮಾಡಲು ಸಹಾಯ ಮಾಡುತ್ತದೆ. ವಾಟ್ಸಾಪ್​ ಟ್ರ್ಯಾಕರ್ ವಾಬೀಟಾಇನ್ಫೋ(WABetaInfo) ಈ ವೈಶಿಷ್ಟ್ಯವನ್ನು ಪ್ರಸ್ತುತ ವಾಟ್ಸಾಪ್​ ಆಂಡ್ರಾಯ್ಡ್​ ಬೀಟಾ ಆವೃತ್ತಿಗಾಗಿ ಅಭಿವೃದ್ಧಿಪಡಿಸಲಾಗಿದೆ ಎಂದು ಬಹಿರಂಗಪಡಿಸಿದೆ. ಈ ವೈಶಿಷ್ಟ್ಯವು ಸ್ಪ್ಯಾಮ್ ಕರೆಗಳನ್ನು ಪರಿಣಾಮಕಾರಿಯಾಗಿ ಎದುರಿಸಲು ಸಹಾಯ ಮಾಡುತ್ತದೆ.

ಸಾಮಾನ್ಯವಾಗಿ, ನೀವು ಯಾವುದೇ ಗುಂಪಿಗೆ ಸೇರಿದರೆ, ಆ ಗುಂಪಿನಲ್ಲಿರುವ ಅಪರಿಚಿತ ವ್ಯಕ್ತಿಗಳಿಂದ ನಿಮಗೆ ಕರೆಗಳು ಬರುತ್ತವೆ. ಇವುಗಳಿಂದ ತೊಂದರೆಯೂ ಉಂಟಾಗುತ್ತದೆ. ಆದರೆ ಹೊಸ ವೈಶಿಷ್ಟ್ಯವು ಲಭ್ಯವಾದರೆ, ಬಳಕೆದಾರರಿಗೆ ಯಾರು ಕರೆ ಮಾಡಿದರೂ, ಬಳಕೆದಾರರಿಗೆ ಯಾವುದೇ ಸಮಸ್ಯೆ ಎದುರಾಗುವುದಿಲ್ಲ. ಏಕೆಂದರೆ ಅವರ ಫೋನ್ ಕರೆಗಳು ಮ್ಯೂಟ್​ ಆಗಿಡುವಂತೆ ಮಾಡಬಹುದು.

ಇನ್ನು ವಾಬೀಟಾಇನ್ಫೋ ಈ ಮುಂಬರುವ ವೈಶಿಷ್ಟ್ಯದ ಕುರಿತು ಸ್ಕ್ರೀನ್‌ಶಾಟ್ ಅನ್ನು ಸಹ ಹಂಚಿಕೊಂಡಿದೆ. ಇದರಲ್ಲಿ ವಾಟ್ಸಾಪ್  ಸೆಟ್ಟಿಂಗ್ಸ್ ನಲ್ಲಿ 'ಸೈಲೆನ್ಸ್ ಅನ್ ನೋನ್ ಕಾಲರ್ಸ್' ಫೀಚರ್ ಕಾಣಿಸಿಕೊಂಡಿದೆ. ಈ ಫೀಚರ್​ ಮೂಲಕ ಅಪರಿಚಿತ ನಂಬರ್​ಗಳಿಂದ ಬರುವಂತಹ ಕಾಲ್​ಗಳನ್ನು ಮ್ಯೂಟ್​ ಮಾಡಲು ಆಯ್ಕೆಗಳನ್ನು ನೀಡಲಾಗುತ್ತದೆ.

ಒಂದು ವೇಳೆ ಬೇಡವಾದರೆ ಅದನ್ನು ಆಫ್ ಸಹ ಮಾಡಬಹುದು. ಇನ್ನು ಈ ಫೀಚರ್​ ಮೂಲಕ ಬರುವಂತಹ ಕರೆಯನ್ನು ಮ್ಯೂಟ್ ಮಾಡಿಡಬಹುದು. ನಂತರ ಯಾವ ನಂಬರ್​ನಿಂದ ಕಾಲ್​ ಬಂದಿದೆ ಎಂದು ಚೆಕ್​ ಮಾಡಬಹುದು.

ಸ್ಪ್ಲಿಟ್​ ವ್ಯೂ ಫೀಚರ್​: ಇದುವರೆಗೆ ಕೇವಲ ಸ್ಮಾರ್ಟ್​​ಫೋನ್​ಗಳಲ್ಲಿ ಎರಡು ಆ್ಯಪ್​ಗಳನ್ನು ಒಂದೇ ಬಾರಿಗೆ ಬಳಕೆ ಮಾಡಬಹುದಿತ್ತು. ಆದರೆ ಇನ್ಮುಂದೆ ವಾಟ್ಸಾಪ್​ನಲ್ಲೂ ಈ ಫೀಚರ್​ ಬರ್ತಾ ಇದೆ. ಈ ಮೂಲಕ ವಾಟ್ಸಾಪ್​ನಲ್ಲಿ ಚಾಟ್​ ಮಾಡ್ತಾನೇ ಬೇರೆ ಅಪ್ಲಿಕೇಶನ್​ಗಳನ್ನು ಓಪನ್ ಮಾಡ್ಬಹುದು.