Weekend With Ramesh: ಮಗಳನ್ನ ಮದುವೆ ಮಾಡಿಕೊಡಲು ಒಪ್ಪದ ದೇವೇಗೌಡರನ್ನ ಒಪ್ಪಿಸಿದ್ದೇಗೆ ಡಾ ಮಂಜುನಾಥ್?

ಈ ವಾರದ ವೀಕೆಂಡ್ ವಿತ್ ರಮೇಶ್ ಕಾರ್ಯಕ್ರಮಕ್ಕೆ ಖ್ಯಾತ ಹೃದ್ರೋಗ ತಜ್ಞ, ಜಯದೇವ ಆಸ್ಪತ್ರೆ ನಿರ್ದೇಶಕ ಡಾ ಸಿಎನ್ ಮಂಜುನಾಥ್ ಅವರು ಅತಿಥಿಯಾಗಿ ಬಂದಿದ್ದರು. ತಮ್ಮ ಜೀವನದ ಕತೆಯನ್ನು ಹೇಳಿದ್ದಾರೆ. ಅದರಲ್ಲೂ ಮಾಜಿ ಪ್ರಧಾನಿ ದೇವೇಗೌಡರು ಮಗಳನ್ನು ಕೊಡುವಾಗ ಏನ್ ಅಂದಿದ್ದರು ಎಂದು ಮನ ಬಿಚ್ಚಿ ಮಾತನಾಡಿದ್ದಾರೆ.

ಮಂಜುನಾಥ್ ಅವರಿಗೆ ದೇವೇಗೌಡರ ಕುಟುಂಬದ ಮೇಲೆ ತುಂಬಾ ಗೌರವಿದೆ. ಮೈಸೂರಿನಲ್ಲಿ ಎಂಎಸ್ ಮಾಡುವಾಗಲೇ ದೇವೇಗೌಡರಿಗೆ ಮಗಳು ಅನುಸೂಯ ಅವರನ್ನು ಮದುವೆಯಾಗುವುದಾಗಿ ಕೇಳಿದ್ರಂತೆ. ಆದ್ರೆ ದೇವೇಗೌಡರು ಒಪ್ಪಿರಲಿಲ್ವಂತೆ.

ದೇವೇಗೌಡರು ಮಂಜುನಾಥ್ ಅವರನ್ನು ಅನುಮಾನದಿಂದ ನೋಡಿದ್ರಂತೆ.'ನಾನು ವಿಧಾನಸಭೆ ಸದಸ್ಯನೂ ಅಲ್ಲ. ನನ್ನ ಬಳಿ ಎಲ್‍ಐಸಿಯ 75,000 ಹಣ ಬಿಟ್ಟರೆ ಬೇರೇನೂ ಇಲ್ಲ. ನನ್ನ ಬಳಿ ಹಣ ಇದೆಯೆಂದೋ ಅಥವಾ ರಾಜಕೀಯ ಕುಟುಂಬವೆಂದೋ ಮದುವೆಯಾಗಲು ಇಚ್ಚಿಸಿದ್ದರೆ ಆ ಭ್ರಮೆ ಬಿಟ್ಟು ಬಿಡಿ' ಎಂದು ಹೇಳಿದ್ರಂತೆ.

ಮಂಜುನಾಥ್ ಅವರು ದೇವೇಗೌಡರನ್ನು ಕಬ್ಬನ್ ಪಾರ್ಕ್ ಗೆ ಕರೆದುಕೊಂಡು ಹೋಗಿ, ನಿಮ್ಮ ಮಗಳನ್ನು ಮದುವೆಯಾಗ್ತೀನಿ. ಚೆನ್ನಾಗಿ ನೋಡಿಕೊಳ್ತೇನೆ ಎಂದು ಒಪ್ಪಿಸಿದ್ರಂತೆ. ನಂತರ ದೇವೇಗೌಡರು ಮದುವೆಗೆ ಒಪ್ಪಿಗೆ ಸೂಚಿಸಿದ್ರು.

ಮಂಜುನಾಥ್ ಮತ್ತು ಅನುಸೂಯ ಅವರ ವಿವಾಹ ಒಕ್ಕಲಿಗರ ಸಮುದಾಯ ಭವನದಲ್ಲಿ ಸರಳವಾಗಿ ನಡೆಯಿತಂತೆ. ದೇವೇಗೌಡರಿಂದ ಯಾವುದೇ ಉಡುಗೊರೆಯನ್ನೂ ಮಂಜುನಾಥ್ ಅವರು ಸ್ವೀಕರಿಸಲಿಲ್ವಂತೆ.

ದೇವೇಗೌಡರು ಅಳಿಯನಿಗಾಗಿ ಒಂದು ಸೂಟ್ ಹೊಲಿಸಿದ್ದರಂತೆ. ಅದನ್ನೂ ಸಹ ಮಂಜುನಾಥ್ ಅವರು ಬೇಡ ಅಂದಿದ್ರಂತೆ. ಆದರೆ ದೇವೇಗೌಡರು ಮಂಜುನಾಥ್ ಅವರಿಗೆ ಉಂಗುರವನ್ನು ಗಿಫ್ಟ್ ಆಗಿ ನೀಡಿದರಂತೆ. ಅದನ್ನು ಮಂಜುನಾಥ್ ಅವರು ಸದಾ ಧರಿಸಿರುತ್ತಾರೆ.

ತಮ್ಮ ತಂದೆ ಮಂಜುನಾಥ್ ಅವರು ಅನುಮಾದಿಂದ ಏಕೆ ನೋಡಿದ್ರು ಎಂದು ಅನುಸೂಯ ಅವರು ಹೇಳಿದ್ದಾರೆ. ಮಂಜುನಾಥ್ ಅವರಿಗಿಂತ ಮೊದಲು ಬೇರೆ ಗಂಡ ನೋಡೋಕೆ ಬಂದಿದ್ರು. ಅವರು ನಿಮ್ಮ ಮಗಳ ಹೆಸರಲ್ಲಿ ಎಷ್ಟು ಎಫ್‍ಡಿ ಇಟ್ಟಿದ್ರಿ ಎಂದು ಕೇಳಿದ್ರಂತೆ. ಅದಕ್ಕೆ ನಮ್ಮ ತಂದೆಯವರು ಅನುಮಾನದಿಂದ ನೋಡಿದ್ರು ಎಂದು ಹೇಳಿದ್ದಾರೆ.

ವೀಕೆಂಡ್ ವಿತ್ ರಮೇಶ್‍ನಲ್ಲಿ ಮಾತನಾಡಿದ ಚೆನ್ನಮ್ಮನವರು, ನನ್ನ ಅಳಿಯ ಮಹಾನ್ ಬುದ್ಧಿವಂತ, ಮಹಾನ್ ಸಮಾಜ ಸೇವಕ ಎಂದು ಹೊಗಳಿದ್ದಾರೆ.