Karnataka Election​ Result: ಕಾಂಗ್ರೆಸ್ ಗೆಲುವಿನ ಬಗ್ಗೆ ಸಮೀಕ್ಷೆಗಳು ಹತ್ತಾರು, ನಿಖರ ಭವಿಷ್ಯ ನುಡಿದಿದ್ದು ಯಾರು?

ಕರ್ನಾಟಕ ವಿಧಾನಸಭಾ ಚುನಾವಣೆಯ ಫಲಿತಾಂಶ ಶನಿವಾರ ಹೊರಬಿದ್ದಿದ್ದು, ಕಾಂಗ್ರೆಸ್​ 136 ಕ್ಷೇತ್ರ ಗೆದ್ದು ಬಹುಮತ ಪಡೆದುಕೊಂಡಿದೆ. ಜೊತೆಗೆ ಇಬ್ಬರು ಪಕ್ಷೇತರ ಶಾಸಕರು ಕೂಡ ಕಾಂಗ್ರೆಸ್​ ಸೇರುವುದು ಕಾಂಗ್ರೆಸ್​ ಸ್ಥಾನಗಳ ಸಂಖ್ಯೆ 138ಕ್ಕೆ ಏರಿಕೆಯಾಗಿದೆ.

ಹಲವು ಚುನಾವಣೋತ್ತರ ಸಮೀಕ್ಷೆಗಳು ಭವಿಷ್ಯ ನೀಡಿದಂತೆ ಕಾಂಗ್ರೆಸ್​ ರಾಜ್ಯದ ದೊಡ್ಡ ಪಕ್ಷವಾಗಿ ಹೊರಹೊಮ್ಮಿದೆ. ಯಾವೆಲ್ಲಾ ಸಮೀಕ್ಷೆಗಳು ಕಾಂಗ್ರೆಸ್​ ಅಧಿಕಾರಕ್ಕೆ ಬರಲಿದೆ ಎಂದು  ಭವಿಷ್ಯ ನುಡಿದಿದ್ದವು ಎಂಬುದರ ಬಗ್ಗೆ ಇಲ್ಲಿದೆ ಮಾಹಿತಿ.

ಇಂಡಿಯಾ ಟುಡೇ- ಆಕ್ಸಿಸ್ ಮೈ ಇಂಡಿಯಾ ಕಾಂಗ್ರೆಸ್​ಗೆ ಸ್ಪಷ್ಟ ಬಹುಮತ ಸಿಗಲಿದೆ ಎಂದು ಭವಿಷ್ಯ ನುಡಿದಿತ್ತು. ಈ ಸಮೀಕ್ಷೆಯಲ್ಲಿ ಕಾಂಗ್ರೆಸ್‌ ಪಕ್ಷ 122–140 ಸ್ಥಾನ ಗೆಲ್ಲಲಿದೆ ಎಂದು ಘೋಷಿಸಲಾಗಿತ್ತು. ಜೊತೆಗೆ ಬಿಜೆಪಿ 62–80 ಸ್ಥಾನ, ಜೆಡಿಎಸ್‌ 20–25 ಸ್ಥಾನ ಮತ್ತು 0–3 ಕ್ಷೇತ್ರಗಳಲ್ಲಿ ಗೆಲ್ಲಬಹುದು ಎಂದು ಹೇಳಿತ್ತು. ಇದೀಗ ಭವಿಷ್ಯ ಬಹುತೇಕ ನಿಜವಾಗಿದೆ.

ಕನ್ನಡದ ನ್ಯೂಸ್‌ ವೆಬ್‌ಸೈಟ್‌  'ಈ ದಿನ' ಕೂಡ ಕಾಂಗ್ರೆಸ್​ ಪಕ್ಷ ಬಹುಮತಕ್ಕಿಂಗಲೂ ಹೆಚ್ಚಿನ ಸ್ಥಾನ ಕಾಂಗ್ರೆಸ್​ ಪಾಲಾಗಲಿದೆ ಎಂದು ಹೇಳಿತ್ತು. ಅದು ಕಾಂಗ್ರೆಸ್‌  132 ರಿಂದ  140, ಬಿಜೆಪಿ 57 ರಿಂದ  65 ಸ್ಥಾನ ಸಿಗಬಹುದು. ಜೆಡಿಎಸ್‌ 19ರಿಂದ 25 ಕ್ಷೇತ್ರಗಳಿಗೆ ಸೀಮಿತವಾಗಿದೆ ಎಂದು ತಿಳಿಸಿತ್ತು. ಇದೀಗ ಈ ದಿನ ಸಮೀಕ್ಷೆ ಕೂಡ ಫಲಿತಾಂಶಕ್ಕೆ ಹತ್ತಿರವಾಗಿದೆ.

ನ್ಯೂಸ್​ 24-ಟುಡೇಸ್​ ಚಾಣಕ್ಯ ಎಕ್ಸಿಟ್ ಪೋಲ್​ನಲ್ಲಿ ಕಾಂಗ್ರೆಸ್​ ಪಕ್ಷ 120 ಸ್ಥಾನಗಳನ್ನು ಗೆಲ್ಲಲಿದೆ ಎಂದು ಹೇಳಿತ್ತು. ಬಿಜೆಪಿ 92 ಸ್ಥಾನ, ಜೆಡಿಎಸ್​ಗೆ  12-19 ಸ್ಥಾನ ಸಿಗಬಹುದು ಎಂದು ಹೇಳಿತ್ತು. ಇದು ಫಲಿತಾಂಶಕ್ಕೆ ಹೆಚ್ಚು ಕಡಿಮೆ  ಹೊಂದಿಕೊಂಡಿದೆ.

ಟೈಮ್ಸ್​ ನೌ ಎಕ್ಸಿಟ್​ ಪೋಲ್ ಕೂಡ ಕಾಂಗ್ರೆಸ್​ ಕಾಂಗ್ರೆಸ್​ 106ರಿಂದ 120 ಕ್ಷೇತ್ರ ಸಿಗಬಹುದು ಎಂದು ಸಮೀಕ್ಷಾ ವರದಿಯಲ್ಲಿ ತಿಳಿಸಿತ್ತು. ಅದು ಬಿಜೆಪಿಗೆ 78ರಿಂದ 92, ಜೆಡಿಎಸ್​ಗೆ 20-26 ಕ್ಷೇತ್ರಗಳಲ್ಲಿ ಗೆಲ್ಲಬಹುದು ಎಂದು ಹೇಳಿತ್ತು. ಇದೀಗ ಬಹುತೇಕ ಸಮೀಕ್ಷಾ ವರದಿ ನಿಜವಾಗಿದೆ.

ಸದ್ಯ  ಬಹುತೇಕ ಎಲ್ಲಾ ಕ್ಷೇತ್ರಗಳ ಫಲಿತಾಂಶ ಹೊರಬಿದ್ದಿದೆ. ಕಾಂಗ್ರೆಸ್‌ 136 ಕ್ಷೇತ್ರಗಳಲ್ಲಿ ಗೆಲುವು ಸಾಧಿಸಿದೆ. ಬಿಜೆಪಿ 65 ಸ್ಥಾನಗಳಲ್ಲಿ ಜಯ ಕಂಡಿದ್ದು, ಜೆಡಿಎಸ್‌ಗೆ 19 ಸ್ಥಾನಗಳು ದಕ್ಕಿವೆ. ಉಳಿದ 4 ಸ್ಥಾನಗಳು ಇತರರ ಪಾಲಾಗಿವೆ.