Peenya Flyover ಮೇಲೆ ಲಾರಿ, ಬಸ್​ಗಳ ಸಂಚಾರ ಯಾವಾಗ?

ತುಮಕೂರು ರಸ್ತೆ ಪೀಣ್ಯ ಮೇಲ್ಸೇತುವೆ ಕೇಬಲ‌್ ಬದಲಿಸಲು ಎನ್‌ಎಚ್‌ಎಐ ನಿರ್ಧಾರ ಮಾಡಿದೆ. ಬಾಗಿರುವ ಕೇಬಲ್‌ಗಳು ಮಾತ್ರವಲ್ಲದೇ ಎಲ್ಲಾ ಬದಲಾಯಿಸಲು ಎನ್​​ಎಚ್​​ಎಐ ಮುಂದಾಗಿದೆ.

ಭಾರತೀಯ ವಿಜ್ಞಾನ ಸಂಸ್ಥೆಯ ತಜ್ಞರ ಸಲಹೆಯಂತೆ ಎರಡು ಹಂತಗಳಲ್ಲಿ ಕಾಮಗಾರಿ ಕೈಗೆತ್ತಿಕೊಳ್ಳಲಾಗುತ್ತಿದೆ.  ಮೊದಲ ಹಂತದ ಕಾಮಗಾರಿಗೆ ಟೆಂಡರ್ ಪ್ರಕ್ರಿಯೆ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ ಪೂರ್ಣಗೊಳಿಸಿದೆ.

ಸೇತುವೆಯ ಪ್ರತಿ ಸೆಗ್ಮೆಂಟ್‌ನಲ್ಲಿ 10 ಕೇಬಲ್‌ಗಳಿದ್ದು, ಮೊದಲ ಹಂತದಲ್ಲಿ ಎರಡು ಕೇಬಲ್‌ಗಳನ್ನು ಹೆಚ್ಚುವರಿಯಾಗಿ ಅಳವಡಿಸಿ ಸೇತುವೆಯನ್ನು ಬಲಿಷ್ಠಗೊಳಿಸಲಾಗುತ್ತದೆ. ಈ ಕಾಮಗಾರಿ ನಾಲ್ಕು ತಿಂಗಳಲ್ಲಿ ಪೂರ್ಣಗೊಳ್ಳುವ ಸಾಧ್ಯತೆ ಇದೆ.

ಅಲ್ಲದೆ‌ ಈಗಾಗಲೇ ಇರುವ ಕೇಬಲ್‌ಗಳು ಭವಿಷ್ಯದಲ್ಲಿ ತುಕ್ಕು ಹಿಡಿಯಬಹುದು ಎಂಬ ಕಾರಣಕ್ಕೆ ಬದಲಿಸಬೇಕು ಎಂಬ ಶಿಫಾರಸನ್ನು ಐಐಎಸ್‌ಸಿ ಮಾಡಿದೆ.

ಹೀಗಾಗಿ ಹೆಚ್ಚುವರಿ ಕೇಬಲ್ ಅಳವಡಿಕೆ ಮಾಡಲು ಎನ್​ಎಚ್​ಎಐ ಮುಂದಾಗಿದೆ. ನಂತರ ಸೇತುವೆ ಸದೃಢವಾದ ಬಳಿಕ ಬಸ್‌, ಲಾರಿ ಸೇರಿ ಎಲ್ಲಾ ವಾಹನಗಳ ಸಂಚಾರಕ್ಕೆ ಅನುವು ಮಾಡಲಾಗುತ್ತದೆ.

ಎರಡನೇ ಹಂತದಲ್ಲಿ ಎಲ್ಲಾ ಕೇಬಲ್‌ ಬದಲಿಸುವ ಕಾಮಗಾರಿ ಮುಂದುವರಿಯಲಿದೆ. ಈ ಕಾಮಗಾರಿ ಒಂದೂವರೆ ವರ್ಷ ಹಿಡಿಯುವ ಸಾಧ್ಯತೆಗಳಿವೆ ಎಂದು ತಿಳಿದು ಬಂದಿದೆ.

ಲಾರಿ, ಬಸ್ ಸೇರಿದಂತೆ ಭಾರೀ ಗಾತ್ರದ ವಾಹನಗಳು ಕೆಳ ರಸ್ತೆಯಲ್ಲಿ ಸಂಚರಿಸುವ ಕಾರಣ ಜಾಲಹಳ್ಳಿ ಕ್ರಾಸ್, ದಾಸರಹಳ್ಳಿ ಹಾಗೂ ಎಂಟನೇ ಮೈಲಿ ಸಿಗ್ನಲ್​ನಲ್ಲಿ ಟ್ರಾಫಿಕ್ ಉಂಟಾಗಲಿದೆ.