ಬೆಲೆಯೂ ಭಾರಿ, ಸಂಖ್ಯೆಯೂ ಭಾರಿ- ಒಂದಕ್ಕಿಂದ ಒಂದು ಭಾರಿ ಭಾರಿ- ಇದು ಶ್ರೀ ಸಿದ್ಧರಾಮೇಶ್ವರ ದನಗಳ ಜಾತ್ರೆಯ ವಿಶೇಷ

ಒಂದು ಹೋರಿಯ ಬೆಲೆ ರೂ. 4 ಲಕ್ಷ. ಮತ್ತೊಂದು ಹೋರಿಯ ಬೆಲೆ ರೂ. 2 ಲಕ್ಷ. ಹೀಗೆ ಬೆಲೆ ಅಬ್ಬಾ ಎನ್ನುವಂತಿದ್ದರೂ ಜಾನುವಾರುಗಳು ಮಾರಾಟವಾಗುತ್ತಿಲ್ಲ. ಬಂದಿರುವ ಜಾನುವಾರುಗಳ ಸಂಖ್ಯೆಯೂ ಕಡಿಮೆ. ಇದು ಬಸವ ನಾಡಿನಲ್ಲಿ ನಡೆಯುವ ದಕ್ಷಿಣ ಭಾರತದ ದನಗಳ ಅತಿ ದೊಡ್ಡ ಜಾತ್ರೆಯಲ್ಲಿ ಕಂಡು ಬಂದ ವಾಸ್ತವಿಕ ಸ್ಥಿತಿ. ಈ ಜಾತ್ರೆ ಎಲ್ಲಿ ನಡೆಯಿತು? ಅಲ್ಲಿಯ ಮತ್ತೀತರ ವಿಷಯಗಳೇನು? ಎಂಬುದರ ಕುರಿತ ಒಂದು ವಿಶೇಷ ವರದಿ ಇಲ್ಲಿದೆ ನೋಡಿ....

ಇದು ಇಡೀ ದಕ್ಷಿಣ ಕರ್ನಾಟಕದಲ್ಲಿಯೇ ಅತೀ ಹೆಚ್ಚು ಸಂಖ್ಯೆಯಲ್ಲಿ ದನಗಳು ಸೇರುವ ಜಾತ್ರೆ. ಕನಿಷ್ಠ 50 ಸಾವಿರಕ್ಕೂ ಹೆಚ್ಚು ಜಾನುವಾರುಗಳು ಇಲ್ಲಿ ನೆರೆದಿವೆ. ಇಲ್ಲಿರುವ 110 ಎಕರೆ ಪ್ರದೇಶದಲ್ಲಿ ಎಲ್ಲಿ ನೋಡಿದರೂ ಜಾನುವಾರುಗಳೇ ಕಣ್ಣಿಗೆ ರಾಚುತ್ತಿವೆ.

ಕಣ್ಣು ಹಾಯಿಸಿ ನೋಡಿದಷ್ಟೂ ಎತ್ತು, ಹೋರಿಗಳದ್ದೆ ಕಾರಬಾರು. ಈ ದೃಶ್ಯಗಳು  ಕಂಡು ಬಂದದ್ದು, ಬಸವನಾಡು ವಿಜಯಪುರ ಜಿಲ್ಲೆಯ ತೊರವಿ ಬಳಿ. ಇಲ್ಲಿಯ ಎಪಿಎಂಸಿಗೆ ಸೇರಿದ ಜಾಗದಲ್ಲಿ ನಡೆಯುವ ಶ್ರೀ ಸಿದ್ಧೇಶ್ವರ ಜಾನುವಾರುಗಳ ಜಾತ್ರೆಯಲ್ಲಿ.

ಕರ್ನಾಟಕವಷ್ಟೇ ಅಲ್ಲ, ನೆರೆಯ ಮಹಾರಾಷ್ಟ್ರ, ಆಂಧ್ರ ಪ್ರದೇಶದಿಂದಲೂ ಇಲ್ಲಿಗೆ ಜಾನುವಾರುಗಳು ಬಂದಿರುವುದು ವಿಶೇಷ. ಇಲ್ಲಿ ಒಂದು ಹೋರಿಯ ಬೆಲೆ ರೂ. 4 ಲಕ್ಷ ರೂ. ಮತ್ತೊಂದು ಎತ್ತಿನ ಬೆಲೆ 2.ರೂ ಲಕ್ಷ ಹೀಗೆ ಸಾಗುತ್ತದೆ.  4 ಲಕ್ಷ ರೂ. ಎಂದು ಹೇಳುತ್ತಿರುವ ರಾಜುಗೌಡ ಚಂದ್ರಶೇಖರ ಬಿರಾದಾರ ತಮ್ಮ ಹೋರಿಗಾಗಿ ಪ್ರತಿನಿತ್ಯ ರೂ. 300 ರಿಂದ 400 ರೂಪಾಯಿ ಖರ್ಚು ಮಾಡುತ್ತಾರಂತೆ.

ಆಕಳ ಜೊತೆ ಸಂಪರ್ಕಕ್ಕಾಗಿ ಪ್ರತಿ ಬಾರಿ ಇವರು ತಮ್ಮ ಹೋರಿಗೆ ರೂ. 1001 ಹಣ ಪಡೆಯುತ್ತಾರೆ. ವರ್ಷಕ್ಕೆ ಕನಿಷ್ಠ ಮೂರ್ನಾಲ್ಕು ಲಕ್ಷ ರೂಪಾಯಿ ಈ ಹೋರಿಯಿಂದ ಆದಾಯ ಬರುತ್ತದೆ ಎನ್ನುತ್ತಾರೆ ಅವರು.

ಕಳೆದ ಬಾರಿಗೆ ಹೋಲಿಸಿದರೆ ಈ ಸಲ ಜಾನುವಾರುಗಳ ಸಂಖ್ಯೆ ಕಡಿಮೆಯಾಗಿವೆ. ಬೆಳಗಾವಿ ಜಿಲ್ಲೆಯಲ್ಲಿ ಉಂಟಾದ ಪ್ರವಾಹ, ಬರ ಹೀಗೆ ನಾನಾ ಕಾರಣಗಳಿಂದಾಗಿ ದನಗಳನ್ನು ಸಾಕುವವರ ಸಂಖ್ಯೆಯೂ ಕಡಿಮೆಯಾಗಿದೆ. ಬಹುತೇಕ ರೈತರು ಹೈನುಗಾರಿಕೆಗಾಗಿ ಜರ್ಸಿ ತಳಿಯ ಆಕಳುಗಳ ಮೊರೆ ಹೋಗುತ್ತಿದ್ದಾರೆ.

ಉಳಿದ ಜವಾರಿ ತಳಿಯ ದನಗಳು ಕಸಾಯಿಖಾನೆಯ ಪಾಲಾಗುತ್ತಿರುವುದರಿಂದ ಈ ಬಾರಿ ವಿಜಯಪುರ ಸಂಕ್ರಾಂತಿ ಜಾತ್ರೆಗೆ ಬಂದಿರುವ ದನಗಳ ಸಂಖ್ಯೆ ಕಡಿಮೆಯಾಗಿದೆ ಎನ್ನುತ್ತಾರೆ ಬೆಳಗಾವಿ , ಅಥಣಿ ತಾಲೂಕಿನ ತ್ಯಾವರಟ್ಟಿ ಗ್ರಾಮದ ರೈತರಾದ ಭೀಮಪ್ಪ ಮಾಣಿಕೋಲ ಮತ್ತು ಮದಗೊಂಡ ಸಿದ್ದಪ್ಪ ತರಗಿ.

ಈ ಜಾತ್ರೆಯಲ್ಲಿ ಕಿಲಾರಿ, ಜವಾರಿ, ಕಾರೆಕಾರ, ಮುರ್ರಾ, ಇನ್ನೂ ಹಲ್ಲು ಬಾರದ, ಎರಡು ಹಲ್ಲಿನ, ನಾಲ್ಕು ಹಲ್ಲಿನ ಹೋರಿಗಳ ಪ್ರದರ್ಶನ ಹಾಗೂ ಮಾರಾಟ ಇದ್ದದ್ದು ವಿಶೇಷ. ಆದರೆ, ಖರೀದಿದಾರರೇ ಇಲ್ಲದಿರುವುದು ವಿಪರ್ಯಾಸ. ಕೆವರು ಕಟ್ಟುಮಸ್ತಾದ ದನಗಳನ್ನು ಖರೀದಿ ಮಾಡಿದರೆ, ಮಧ್ಯಮ ಮತ್ತು ಸಣಕಲು ಮೈಮಾಟದ ಜಾನುವಾರುಗಳನ್ನು ಕೇಳುವವರೇ ಇಲ್ಲ.

ಈ ಜಾತ್ರೆಯಲ್ಲಿ ರೈತರ ಜೀವನಾಡಿಯಾಗಿರುವ ಜಾನುವಾರುಗಳ ಜೊತೆಗೆ  ರೈತರ ಭದ್ರತೆ ನೀಡುವ ಶ್ವಾನಗಳೂ ಸಾಥ್ ನೀಡಿವೆ. ಈ ಶ್ವಾನಗಳಿಗೆ ತಗಲುವು ರೆಬಿಸ್ ಕಾಯಿಲೆ, ಈ ಕಾಯಿಲೆಯಿಂದ ಶ್ವಾನಗಳನ್ನು ರಕ್ಷಿಸಲು ಶ್ವಾನಗಳ ಪ್ರದರ್ಶನವೂ ಇಲ್ಲಿ ನಡೆಯಿತು.

ಪಿಟ್​ಬುಲ್​, ಜರ್ಮನ್ ಶಫರ್ಡ್, ಮುಧೋಳ ಡಾಗ್, ಡ್ಯಾಶ್​ಹುಂಡ್​, ಗ್ರೆಡನ್​ ಸೇರಿ ಸುಮಾರು 20 ತಳಿಗಳ 100 ಶ್ವಾನಗಳೂ ಪಾಲ್ಲೊಂಡು ಎಲ್ಲರ ಗಮನ ಸೆಳೆದವು.

ಈ ಶ್ವಾನ ಮೇಳದಲ್ಲಿ ರೈತರಿಗೆ ನಾಯಿಗಳ ಸಾಕಣೆ ಮತ್ತು ಸಂರಕ್ಷಣೆಯ ಕುರಿತು ಪಶುಸಂಗೋಪನೆ ಇಲಾಖೆಯ ಮುಖ್ಯ ಪಶು ವೈದ್ಯಾಧಿಕಾರಿ ಡಾ. ಬಸವರಾಜ ಕನಮಡಿ ಮಾಹಿತಿ ನೀಡುವ ಮೂಲಕ ಗಮನ ಸೆಳೆದರು.

ಈ ಜಾತ್ರೆಯಲ್ಲಿ  ಪಾಲ್ಗೊಳ್ಳುವ ಜಾನುರುಗಳಿಗೆ ಅವುಗಳ ಆರೋಗ್ಯಕ್ಕೆ ಅನುಗುಣವಾಗಿ ನೀಡಲಾಗುವ ಪ್ರಥಮ, ದ್ವಿತೀಯ ಹಾಗೂ ತೃತಿಯ ಬಹುಮಾನಗಳೇ ಈ ರೈತರು ದನಗಳ ಜಾತ್ರೆಯಲ್ಲಿ ಪಾಲ್ಗೊಳ್ಳಲು ಪ್ರೋತ್ಸಾಹ ನೀಡುತ್ತಿವೆ.

ಆದರೆ, ಪ್ರತಿಬಾರಿ ಸೇರುತ್ತಿದ್ದ ಜಾನುವಾರುಗಳ ಸಂಖ್ಯೆ ಈ ಬಾರಿ ಕಡಿಮೆಯಾಗಿದೆ. ಅಷ್ಟೇ ಅಲ್ಲ, ಮಾರಾಟವೂ ಕಡಿಮೆಯಾಗಿರುವುದು ರೈತರ ಬಾಳಿನ ಗೋಳಿನ ಪ್ರತಿಕವಾಗಿದೆ.

ಮುಧೋಳ ನಾಯಿ