Women Fight for Saree: ಸೀರೆಗಾಗಿ ಜುಟ್ಟು ಹಿಡಿದು ಹೊಡೆದಾಡಿಕೊಂಡ ಮಹಿಳೆಯರು! ಡಿಸ್ಕೌಂಟ್​ ಸೇಲ್​ನಲ್ಲಿ ಸೀರೆ ಕೊಳ್ಳುವಾಗ ನಡೀತು ಮಾರಾಮಾರಿ

ಮಹಿಳೆಯರಿಗೆ ಸೀರೆ ಅಂದರೆ ತುಂಬಾ ಇಷ್ಟ ಪಡ್ತಾರೆ ಎಂಬುದು ಎಲ್ಲರಿಗೂ ಗೊತ್ತಿರುವ ವಿಷಯ. ಅವುಗಳನ್ನು ಬಳಸುತ್ತಾರೋ, ಬಿಡ್ತಾರೋ ಗೊತ್ತಿಲ್ಲ, ಆದರೆ ಕಣ್ಣಿಗೆ ಚೆಂದವಾಗಿ ಕಾಣುವ ಸೀರೆಗಳನ್ನು ಖರೀದಿಸುವಲ್ಲಿ ಎಂದಿಗೂ ಮುಂದಿರುತ್ತಾರೆ. ಇನ್ನೂ ಡಿಸ್ಕೌಂಟ್ ಇದೆ ಅಂದರೆ ಕೇಳಬೇಕಾ?  ನಾ ಮುಂದು.. ತಾ ಮುಂದು ಎಂದು ಮುಗಿ ಬೀಳುತ್ತಾರೆ. ಹೀಗಿ ಡಿಸ್ಕೌಂಟ್​ನಲ್ಲಿ ಸೀರೆ ಖರೀದಿಸುವಾಗ ಸೀರೆಗಾಗಿ ಇಬ್ಬರು ಮಹಿಳೆಯರು ರಂಪಾಟ ನಡೆಸಿರುವ ವಿಡಿಯೋ ಭಾರೀ ವೈರಲ್ ಆಗಿದೆ.

ಈ ಘಟನೆ ಬೆಂಗಳೂರಿನ ಮಲ್ಲೇಶ್ವರಂನಲ್ಲಿ ನಡೆದಿದೆ ಎಂದು ತಿಳಿದುಬಂದಿದೆ. ಡಿಸ್ಕೌಂಟ್​ ಸೀರೆ ಕೊಳ್ಳಲು ಬಂದಾಗ ಜಡೆ ಹಿಡಿದು ಎಳೆದಾಡಿ, ಬಡಿದಾಡಿಕೊಂಡಿರುವ ಘಟನೆ ನಡೆದಿದ್ದು, ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದೆ.

ಮಲ್ಲೇಶ್ವರಂನ 8ನೇ ಮುಖ್ಯರಸ್ತೆಯಲ್ಲಿರುವ ಮೈಸೂರು ಸಿಲ್ಕ್ ಸ್ಯಾರಿಸ್‌ನಲ್ಲಿ ಶೇ.35ರಷ್ಟು ಡಿಸ್ಕೌಂಟ್​ ಸೇಲ್​ನಲ್ಲಿ ಸೀರೆಗಳನ್ನು ಮಾರಾಟ ಮಾಡಲಾಗುತ್ತಿತ್ತು. ಈ ವಿಚಾರ ತಿಳಿದು ನೂರಾರು ಮಹಿಳೆಯರು ಶಾಪ್​ಗೆ ದೌಡಾಯಿಸಿ ಸಾಲಾಗಿ ನಿಂತು ಸೀರೆ ಕೊಳ್ಳುತ್ತಿದ್ದರು.

ಕೇವಲ 5 ದಿನಗಳಿಗೆ ಮಾತ್ರ ಈ ರಿಯಾಯಿತಿ ದರಲ್ಲಿ ಸೀರೆಗಳನ್ನು ಮಾರಾಟ ಮಾಡಲಾಗುತ್ತದೆ ಎಂದು ಬೋರ್ಡ್ ಹಾಕಿದ್ದರು. ಈ ಕಾರಣದಿಂದ ಸೀರೆ ಖರೀದಿಗೆ ನೂರಾರು ಮಹಿಳೆಯರು ಮುಗಿಬಿದ್ದರು. ಅಂಗಡಿ ತುಂಬಿ ಹೊರಗಡೆಯೂ ಸಾಲಾಗಿ ನಿಂತು ಸೀರೆಗಳನ್ನು ಖರೀದಿಸುತ್ತಿದ್ದದ್ದು ಕಂಡು ಬಂದಿತು.

ಆದರೆ ಡಿಸ್ಕೌಂಟ್ ಸೇಲ್​ನಲ್ಲಿ ಸೀರೆಗಳನ್ನು ಖರೀದಿಸಲು ಬಂದಿದ್ದ ಸಂದರ್ಭದಲ್ಲಿ ಸೀರೆಯ ಆಯ್ಕೆ ಮಾಡುವ ಸಂದರ್ಭದಲ್ಲಿ ಇಬ್ಬರು ಮಹಿಳೆಯರ ನಡುವೆ ವಾಗ್ವಾದ ನಡೆದಿದೆ.

ಇಬ್ಬರ ಜಗಳ ವಿಕೋಪಕ್ಕೆ ತಿರುಗಿ ಅಂಗಡಿಯಲ್ಲೇ ಜಡೆ ಹಿಡಿದು ಎಳೆದಾಡಿದ್ದಾರೆ. ಈ ಮಹಿಳೆಯರ ಜಗಳವನ್ನು ಬಿಡಿಸಲು ಅಲ್ಲಿದ್ದ ಸಿಬ್ಬಂದಿಗಳು, ಸ್ಥಳೀಯರು ಹರಸಾಹಸ ಪಟ್ಟಿದ್ದು ವಿಡಿಯೋದಲ್ಲಿ ಕಂಡುಬಂದಿದೆ. ಕೊನೆಗೆ ಅಂಗಡಿಯವರು ಇಬ್ಬರು ಮಹಿಳೆಯರ ಜಗಳ‌ ನಿಲ್ಲಿಸಿ ಅಲ್ಲಿಂದ ಹೊರ ಕಳುಹಿಸಿದ್ದಾರೆ ಎಂದು ತಿಳಿದುಬಂದಿದೆ.

ಆದರೆ ಈ ಜಡೆಜಗಳ ಗ್ರಾಹಕರ ಮೊಬೈಲ್​ಗಳಲ್ಲಿ ರೆಕಾರ್ಡ್​ ಆಗಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದೆ.