ಕೋಲಾರದಲ್ಲಿ ಸ್ಥಳೀಯರಿಂದಲೇ ರಸ್ತೆ ದುರಸ್ಥಿ ಕಾರ್ಯ; ವೃದ್ಧಾಪ್ಯ ವೇತನ ನೀಡಿದ ಇಬ್ಬರು ವೃದ್ಧರು

ಕೋಲಾರ‌ ಜಿಲ್ಲಾ ಕೇಂದ್ರ ಕೋಲಾರ ನಗರದಲ್ಲಿ, ಜನಸಂಖ್ಯೆ ಹೆಚ್ಚಾಗಿ ಇದ್ದರೂ ಸಹ ಇನ್ನೂ ಮೂಲಭೂತ ಸೌಕರ್ಯಗಳನ್ನು ಒದಗಿಸುವುದರಲ್ಲಿ ನಗರಸಭೆ ಹಾಗೂ ಜಿಲ್ಲಾಡಳಿತ ಸಂಪೂರ್ಣವಾಗಿ ವಿಫಲವಾಗಿದೆ. ಈಗಾಗಲೇ ಅಮೃತಸಿಟಿ ಯೋಜನೆಯಡಿ ಒಳಚರಂಡಿ ಕಾಮಗಾರಿ ನಡೆಸಲು, ರಸ್ತೆಯನ್ನ ಎರಡೆರಡು ಬಾರಿ ಅಗೆದು ಮುಚ್ಚಿದ್ದು, ಹಳ್ಳ-ಕೊಳ್ಳಗಳನ್ನು ಮುಚ್ಚದೆ ನಿರ್ಲಕ್ಷ್ಯ ತೋರಲಾಗಿದೆ.

ಇನ್ನು ಅಗೆದ ಹಳ್ಳಕೊಳ್ಳಗಳನ್ನ ಮುಚ್ಚಿಸಿ ಹಾಳಾದ ರಸ್ತೆಗಳಿಗೆ ತೇಪೆ ಹಾಕಿಸುವುದರಲ್ಲೂ ಜಿಲ್ಲಾಡಳಿತ ಸಂಪೂರ್ಣವಾಗಿ ವಿಫಲವಾಗಿದೆ. ಅದರ ಪರಿಣಾಮವಾಗಿ ಸಾರ್ವಜನಿಕರು ನಿತ್ಯ ಪರದಾಡುವಂತಾಗಿದೆ. ಹೀಗೆ ಜಿಲ್ಲಾ ಕೇಂದ್ರವಾಗಿದ್ದರೂ, ಒಂದು ರಸ್ತೆಯ ಎರಡು ಬದಿಯಲ್ಲಿ ಎಲ್ಲೂ ಪುಟ್ ಬಾತ್ ಕಾಣಸಿಗಲ್ಲ. ರಸ್ತೆಯ ಎರಡು ಬದಿಯಲ್ಲೂ ಅಕ್ರಮವಾಗಿ ಮಾರಾಟ ಮಾಡುವ ಬಂಡಿಗಳದ್ದೆ ದರ್ಬಾರು. ಇಲ್ಲೆ ಅರ್ಥವಾಗುತ್ತೆ ನಗರ ಪ್ರದೇಶ ಯಾವ ಮಟ್ಟಿಗೆ ಅಭಿವೃದ್ಧಿ ಹೊಂದಿದೆ ಎಂದು.

ಇನ್ನು ನಗರ ಪ್ರದೇಶಗಳಲ್ಲಿ ಬಡಾವಣೆಗಳಿಗೆ ಸಂಪರ್ಕಿಸುವ ರಸ್ತೆಗಳು ಹದಗೆಟ್ಟಿದ್ದು, ಇಲ್ಲಿಯವರೆಗು ಡಾಂಬರು ಕಾಣದಿರುವ ಅದೆಷ್ಟೋ ರಸ್ತೆಗಳಿವೆ. ರಸ್ತೆಯನ್ನು ದುರಸ್ತಿಪಡಿಸಿ ಎಂದು ಸಾರಿ ಸಾರಿ ಮನವಿ ಮಾಡಿದರೂ ಸರಿಪಡಿಸದೇ ನಿರ್ಲಕ್ಷ್ಯ ತೋರಿದ್ದಕ್ಕೆ, ಬಡಾವಣೆ ವಾಸಿಗಳೇ ಹದಗೆಟ್ಟ ರಸ್ತೆ ಕಾಯಕಲ್ಪ ನೀಡಿದ್ದಾರೆ.

ಮತ್ತೊಂದು ಗಮನಿಸಬೇಕಾದ ಅಂಶವೆಂದರೆ, ಟಿಪ್ಪರ್,ಜೆಸಿಬಿ ಖರ್ಚಿಗೆ ವೃದ್ಧರು ತಮ್ಮ  ವೃದ್ದಾಪ್ಯ ವೇತನವನ್ನೇ ನೀಡಿದ್ದಾರೆ. ವಾರ್ಡ್​ನ ಜನರಿಂದಲೇ ರಸ್ತೆ ದುರಸ್ತಿ ಕಾರ್ಯ ನಡೆಯುತ್ತಿದೆ.

ಕೋಲಾರ ನಗರದ ಚೌಡೇಶ್ವರಿ ಬಡಾವಣೆಯ ಮುಖ್ಯ ರಸ್ತೆ ಇದುವರೆಗೂ ಡಾಂಬರು ಮುಖವನ್ನೇ ಕಂಡಿಲ್ಲ. ಇನ್ನು  ಹದಗೆಟ್ಟಿರುವ ಮಣ್ಣಿನ ರಸ್ತೆಯನ್ನೇ ಸರಿಪಡಿಸಿ ಎಂದು ನಗರಸಭೆಗೆ ಮನವಿ ಮಾಡಿದರೂ ಸಹ ಯಾವುದೇ ಸ್ಪಂದನೆಯಿಲ್ಲ. ಮಳೆ ಬಂದು ರಸ್ತೆ ಕೊಚ್ಚೆಯಂತಾಗಿದ್ದು ಜನರು ತಿರುಗಾಡಲು ಹರಸಾಹಸ ಪಡಬೇಕು. ಹೀಗಾಗಿ ಬಡಾವಣೆಯ ಜನರೇ ಮುಂದೆ ಬಂದು ರಸ್ತೆ ಸರಿಪಡಿಸಿದ್ದಾರೆ.

ಇದಕ್ಕಾಗಿ 50 ಟ್ರಾಕ್ಟರ್ ಲೋಡ್ ನಷ್ಟು ಕೆರೆ ಮಣ್ಣನ್ನು ತಂದು ರಸ್ತೆಗೆ ಸುರಿದು,  ಜೆಸಿಬಿ ಸಹಾಯದಿಂದ ಮಣ್ಣನ್ನು ರಸ್ತೆಗೆ ಮೇಲೆ ಹಾಕಿಸಿ ಹದ ಮಾಡಿದ್ದಾರೆ. ಜೊತೆಗೆ ಮಳೆ‌ನೀರು‌ ಮುಂದೆ ಹರಿಯಲು ಒಂದು ಬದಿ ಮೋರಿಯನ್ನು ಅಗೆಸಿದ್ದಾರೆ.

ಈ ಕಾರ್ಯದಲ್ಲಿ ವೃದ್ದರು, ವಯಸ್ಕರು, ಯುವಕರು ಸೇರಿಕೊಂಡು ಅನಗತ್ಯವಾದ ಕಲ್ಲು ಮಣ್ಣನ್ನು ರಸ್ತೆಯಿಂದ ತೆರವು ಮಾಡಿದ್ದಾರೆ. ಇದಕ್ಕಾಗಿ ಬಡಾವಣೆಯ ಕೀರಪ್ಪ ಮತ್ತು ಮುನಿಯಪ್ಪ ಎನ್ನುವರು ತಮ್ಮ‌ ತಿಂಗಳ ವೃದ್ಧಾಪ್ಯ ವೇತನವನ್ನು ನೀಡಿ ಧಾರಾಳತೆ ಪ್ರದರ್ಶಿಸಿದ್ದಾರೆ.

ಕೆರೆಯಿಂದ ಮಣ್ಣು  ತಂದು ಹಾಕಲು ಪ್ರತಿ ಲೋಡ್ ಗೆ 600 ರೂಪಾಯಿ ತಗುಲಿದ್ದು, ಹಳ್ಳದಿಣ್ಣೆಗಳನ್ನು ಮುಚ್ಚಿ ರಸ್ತೆ ದುರಸ್ತಿ ಮಾಡಲು‌ 46 ಸಾವಿರ ರೂಪಾಯಿ ಹಣ ಖರ್ಚಾಗಿದ್ದು, ಸ್ಥಳೀಯರೇ ಈ ವೆಚ್ಚವನ್ನು ಭರಿಸಿದ್ದಾರೆ.

ಈ ಬಗ್ಗೆ ಮಾತನಾಡಿರುವ ನಿವಾಸಿಗಳು ವಾರ್ಡ್ ನ ಜನಪ್ರತಿನಿಧಿಗಳಿಗೆ ರಸ್ತೆ ಸಮಸ್ಯೆಗಳನ್ನು ತಿಳಿಸಿದ್ದೇವೆ.  ಆದರೆ ಅವರು ಚುನಾಯಿತರಾಗಿದ್ದು, ಇನ್ನು ಪ್ರಮಾಣವಚನ ಸ್ವೀಕಾರ ಮಾಡಿಲ್ಲ ಅಂತಿದ್ದಾರೆ. ಓಟು ಕೇಳಲು ಬರುವ ರಾಜಕೀಯ ನಾಯಕರು ಸಮಸ್ಯೆ ಆಲಿಸಲು ಬರುತ್ತಿಲ್ಲವೆಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಒಟ್ಟಿನಲ್ಲಿ ನಗರ ಪ್ರದೇಶಗಳಲ್ಲಿನ ರಸ್ತೆ ಸಮಸ್ಯೆಗಳೇ ಹೀಗಾದರೆ ಇನ್ನು ಗ್ರಾಮೀಣ ಭಾಗದ ರಸ್ತೆಗಳ ಸ್ಥಿತಿ ಹೇಗಿರಬಹುದು ಎಂಬುದನ್ನ ಊಹಿಸಲು, ಇದೊಂದು ಸಣ್ಣ ಉದಾಹರಣೆ ಎಂದರೆ ತಪ್ಪಾಗಲಾರದು.  ಸದ್ಯ ಕೋವಿಡ್ ಸಂದರ್ಭವನ್ನು ನಿಭಾಯಿಸಲು ಹರಸಾಹಸ ಪಡುತ್ತಿರುವ ಕೋಲಾರ ಜಿಲ್ಲಾಡಳಿತ, ಸಾರ್ವಜನಿಕರ ಸಮಸ್ಯೆಗಳತ್ತ ಎಂದು ತಿರುಗಿನೋಡುತ್ತದೆಯೋ ಕಾದುನೋಡಬೇಕಿದೆ.