Chikkamagaluru: ಒಂದೇ ಊರಿಗೆ ಎರಡೆರಡು ಸೇತುವೆ ಭಾಗ್ಯ; ಶಾಸಕರಿಂದ ಗುದ್ದಲಿ ಪೂಜೆ, ಗ್ರಾಮಸ್ಥರು ಶಾಕ್

ಚಿಕ್ಕಮಗಳೂರು: ಜಿಲ್ಲೆಯ ಕಳಸ (Kalasa, Chikkamagaluru) ತಾಲೂಕಿನ ಮುಂಡುಗದಮನೆ (Mundugadamane Village) ಗ್ರಾಮಕ್ಕೆ ಎರಡು ಸೇತುವೆಗಳು (Bridge) ಮಂಜೂರು ಆಗಿವೆ.

2018ರಲ್ಲಿ ಮಂಜೂರು ಆಗಿದ್ದ ಸೇತುವೆ ಕಾಮಗಾರಿ (Bridge Construction) ಮುಗಿಯುವ  ಹಂತಕ್ಕೆ ಬಂದಿದೆ. ಈಗ ಇದೇ ಗ್ರಾಮಕ್ಕೆ ಮತ್ತೊಂದು ಸೇತುವೆ  ನಿರ್ಮಾಣಕ್ಕೆ ಎರಡನೇ ಬಾರಿ ಹಣ ಮಂಜೂರು ಆಗಿದೆ.

ಕಳಸ ತಾಲೂಕಿನ ಮುಂಡುಗದಮನೆ ಗ್ರಾಮದಲ್ಲಿ ಸುಮಾರು 20 ಕುಟುಂಬಗಳು ವಾಸವಾಗಿವೆ. ಮಳೆಗಾಲದಲ್ಲಿ (Rainy Season) ಈ ಗ್ರಾಮ ದ್ವೀಪವಾಗಿ ಬದಲಾಗುತ್ತದೆ. ಆದ್ದರಿಂದ ಗ್ರಾಮಕ್ಕೆ ಸೇತುವೆ ನಿರ್ಮಿಸಬೇಕು ಎಂದು ಗ್ರಾಮಸ್ಥರು ಆಗ್ರಹಿಸಿದ್ದರು.

ಗ್ರಾಮಸ್ಥರ ಆಗ್ರಹದ ಹಿನ್ನೆಲೆ 2018ರಲ್ಲಿ ಆರಂಭವಾದ 38 ಲಕ್ಷ ವೆಚ್ಚದ ಸೇತುವೆ ಕಾಮಗಾರಿನ ಮುಕ್ತಾಯದ ಹಂತಕ್ಕೆ ತಲುಪಿದೆ.

ಈಗ ಇದೇ ಗ್ರಾಮಕ್ಕೆ ಮತ್ತೊಂದು ಸೇತುವೆ ಕಾಮಗಾರಿಗೆ ಸ್ಥಳೀಯ ಶಾಸಕ ಎಂಪಿ ಕುಮಾರಸ್ವಾಮಿ ಗುದ್ದಲಿ ಪೂಜೆ ಮಾಡಿದ್ದಾರೆ. ಎರಡನೇ ಸೇತುವೆಗೆ ಎರಡು ಕೋಟಿ ರೂಪಾಯಿ ಅನುದಾನ ಮೀಸಲಿರಿಸಲಾಗಿದೆ.

ಈಗಾಗಲೇ ಒಂದು ಸೇತುವೆ ಕಾಮಗಾರಿ ಮುಕ್ತಾಯದ ಹಂತಕ್ಕೆ ತಲುಪಿದೆ. ಆದ್ರೂ ಎರಡನೇ ಸೇತುವೆಗೆ ಗುದ್ದಲಿ ಪೂಜೆ ಮಾಡಲಾಗಿದೆ. ಎರಡೆರಡು ಸೇತುವೆ ತೆಗೆದುಕೊಂಡು ನಾವೇನು ಮಾಡೋದು ಎಂದು ಗ್ರಾಮಸ್ಥರು ಪ್ರಶ್ನೆ ಮಾಡಿದ್ದಾರೆ.

ನಮ್ಮ ಗ್ರಾಮಕ್ಕೆ ಬಂದಿರುವ ಅನುದಾನವನ್ನು ನಮ್ಮೂರಿನ ಅಭಿವೃದ್ಧಿ ಕಾರ್ಯಗಳಿಗೆ ಬಳಸಬೇಕು. ಅನುದಾನವನ್ನು ವಾಪಸ್ ಕಳುಹಿಸಬಾರದು ಎಂದು ಗ್ರಾಮಸ್ಥರು ಆಗ್ರಹಿಸಿದ್ದಾರೆ.