Traffic Fines Discount: ರಿಯಾಯಿತಿ ದರದಲ್ಲಿ ಟ್ರಾಫಿಕ್​​ ಫೈನ್​ ಕಟ್ಟಲು ಇವತ್ತೇ ಕೊನೆ ದಿನ; ₹100 ಕೋಟಿ ಮೀರುತ್ತಾ ದಂಡ ಸಂಗ್ರಹ ಮೊತ್ತ?

ಬೆಂಗಳೂರು: ಟ್ರಾಫಿಕ್ ಫೈನ್ ಕಟ್ಟಲು ಶೇಕಡಾ 50ರಷ್ಟು ರಿಯಾಯಿತಿ ನೀಡಿರುವ ಹಿನ್ನೆಲೆಯಲ್ಲಿ ನಿನ್ನೆ 8ನೇ ದಿನ ಸರ್ಕಾರದ ಬೊಕ್ಕಸಕ್ಕೆ ಕೋಟಿ ಕೋಟಿ ರೂಪಾಯಿ ಹಣ ಹರಿದು ಬಂದಿದೆ.

ನಿನ್ನೆ 6,70,602 ಪ್ರಕರಣಗಳಲ್ಲಿ 17.61 ಕೋಟಿ ರೂಪಾಯಿ ದಂಡ ಸಂಗ್ರಹವಾಗಿದೆ. ಫೆಬ್ರವರಿ 03 ರಿಂದ ಕಳೆದ 8 ದಿನದಲ್ಲಿ ಒಟ್ಟು 31,11,546 ಲಕ್ಷ ಪ್ರಕರಣಗಳಲ್ಲಿ 85,83,07,541 ಕೋಟಿ ರೂಪಾಯಿ ದಂಡ ಕಲೆಕ್ಷನ್ ಆಗಿದೆ.

ದಂಡ ಕಟ್ಟಲು ಕೊನೆ ಎರಡು ದಿನಗಳಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಹಣ ಸಂಗ್ರಹವಾಗುವ ನಿರೀಕ್ಷೆ ಮಾಡಲಾಗಿತ್ತು. ಇದರಂತೆ ನಿನ್ನೆ ಹೆಚ್ಚಿನ ಸಂಖ್ಯೆಯಲ್ಲಿ ದಂಡದ ಹಣವನ್ನು ವಾಹನ ಸವಾರರು ಪಾವತಿ ಮಾಡಿದ್ದಾರೆ.

ಉಳಿದಂತೆ ಕಡಾ 50ರಷ್ಟು ರಿಯಾಯಿತಿಯಲ್ಲಿ ದಂಡ ಪಾವತಿಗೆ ಇಂದು ಕೊನೆ ದಿನವಾಗಿದ್ದು, ದಂಡ ಪಾವತಿಸಲು ವಾಹನ ಸವಾರರ ದಂಡು ಹರಿದು ಬರುವ ಸಾಧ್ಯತೆ ಇದೆ. ಕೊನೆಯ ದಿನವಾದ ಇಂದು ದಂಡದ ಮೊತ್ತ 100 ಕೋಟಿ ರೂಪಾಯಿಗೆ ಮುಟ್ಟುವ ಸಾಧ್ಯತೆ ಇದೆ.

ಫೆಬ್ರವರಿ 11ರ ವರೆಗೂ ಶೇಕಡಾ 50ರ ದರಲ್ಲಿ ಪಾವತಿ ಮಾಡಲು ಕರ್ನಾಟಕ ಸರ್ಕಾರ ಅವಕಾಶವನ್ನು ನೀಡಿತ್ತು. ಆದರೆ ರಿಯಾಯಿತಿ ವಿಸ್ತರಣೆ ಸದ್ಯಕ್ಕೆ ಇನ್ನೂ ತೀರ್ಮಾನವಾಗಿಲ್ಲ. ಹೀಗಾಗಿ ರಿಯಾಯಿತಿಯಲ್ಲಿ ದಂಡ ಕಟ್ಟಬೇಕು ಎಂದರೆ ಇವತ್ತೇ ಕೊನೆ ದಿನವಾಗಿದೆ.

ಯಾವ್ಯಾವ ದಿನ ಎಷ್ಟೆಷ್ಟು ದಂಡ ವಸೂಲಾಗಿದೆ ಅಂತ ನೋಡುವುದಾದರೆ, ಫೆಬ್ರವರಿ 3ರಂದು 2.24 ಲಕ್ಷ ಕೇಸ್, 7 ಕೋಟಿ ರೂಪಾಯಿ ಮತ್ತು ಫೆಬ್ರವರಿ 4ರಂದು 3 ಲಕ್ಷ ಕೇಸ್, 9 ಕೋಟಿ ರೂಪಾಯಿ ದಂಡ ಸಂಗ್ರಹವಾಗಿತ್ತು. ಫೆಬ್ರವರಿ 5ರಂದು 2.87 ಲಕ್ಷ ಕೇಸ್, 7.49 ಕೋಟಿ ರೂಪಾಯಿ, ಫೆಬ್ರವರಿ 06ರಂದು 3.34 ಲಕ್ಷ ಕೇಸ್, 9.57 ಕೋಟಿ ರೂಪಾಯಿ ದಂಡ ಹರಿದು ಬಂದಿತ್ತು.

ಉಳಿದಂತೆ ಫೆಬ್ರವರಿ 7ರಂದು 3.45 ಲಕ್ಷ ಕೇಸ್, 9.70 ಕೋಟಿ ರೂಪಾಯಿ ದಂಡ. ಫೆಬ್ರವರಿ 8ರಂದು 3.87 ಲಕ್ಷ ಕೇಸ್, 10 ಕೋಟಿ ರೂಪಾಯಿ ದಂಡ. ಫೆಬ್ರವರಿ 9ರಂದು 5.51 ಲಕ್ಷ ಕೇಸ್, 14.64 ಕೋಟಿ ರೂಪಾಯಿ ದಂಡ. ಫೆಬ್ರವರಿ 10ರಂದು 6.70 ಲಕ್ಷ ಕೇಸ್, 17.61 ಕೋಟಿ ರೂಪಾಯಿ ದಂಡ ಸಂಗ್ರಹಿಸಲಾಗಿದೆ.